Jehovaj testigosnenqa kallpachakuyku Jesuspa kamachisqanman jina tukuy imata ruwanaykupaj, apostolesninpis chayta ruwarqanku. Kaypi uj chhikanta yachakunki imaspichus creeyku chayta.

1.   Dios. Noqaykoqa tukuy imata ruwaj Diosta yupaychayku. Paypa sutenqa Jehová (Salmo 83:18; Apocalipsis 4:11). Payqa Abrahanpa, Moisespa, Jesuspa Diosnin (Éxodo 3:6; 32:11; Juan 20:17).

2.   Biblia. Noqaykoqa creeyku Dios Biblianejta runasman parlashasqanta (Juan 17:17; 2 Timoteo 3:16). Runasqa Bibliata tʼaqanku Ñaupa Testamentopi, Mosoj Testamentopiwan. Entero Bibliataj 66 librosniyoj kashan. Noqaykutaj tukuynin Bibliaj nisqanpi creeyku. Chaymanta parlaspa uj profesor nerqa: “Jehovaj testigosnenqa tukuy imata Bibliaman jina ruwanku, creesqankutaj chayman jina kashan. Manataj Bibliata munasqankuman jinachu qʼewinku chayri cambianku”, nispa. a

    Tukuynin Bibliaj nisqanpi creeyku. Bibliaqa niwanchej imaschus pasasqanta, imaschus pasanantapis. Chantapis entiendeyku Bibliaj wakin partesnin kikinchaykuna kasqanta, waj jinamantataj entiendekunan kasqanta (Apocalipsis 1:1).

3.   Jesús. Noqaykoqa Jesuspa yachachisqanta kasukuyku, paypa ejemplontataj qhatiyku. Paytataj jatunpaj qhawayku, imaraykuchus payqa Diospa Wawan, runasta salvananpajtaj jamorqa (Mateo 20:28; Hechos 5:31). Chay jinapi rikuchiyku cristianos kasqaykuta (Hechos 11:26). Chaywanpis Bibliaqa mana yachachinchu Jesuswan tukuy atiyniyoj Dioswan ujlla kasqankuta, mana ni parlallanpischu kay “trinidad” nisqa yachachiymantapis (Juan 14:28).

4.   Diospa Gobiernon. Chay gobiernoqa cielopi kashan, manataj cristianospa sonqonpichu. Chay gobiernotaj kay jallpʼa patapi kaj gobiernosta tukuchenqa, Diospa munaynintaj kay jallpʼa patapi juntʼakonqa (Daniel 2:44; Mateo 6:9, 10). Chayqa tumpitamantawan juntʼakonqa, imaraykuchus Biblia nisqanman jina ‘tukukuy pʼunchaykunapiña’ kashanchej (2 Timoteo 3:1-5; Mateo 24:3-14).

    Diospa Gobiernonpeqa Jesús presidente jina gobernashan. Payqa 1914 watamantapachaña gobernamushan (Apocalipsis 11:15).

5.   Salvasqa kanamanta. Jesús kausayninta qosqanrayku runasqa juchamanta, wañuymantawan kacharichisqa kayta atinchej (Mateo 20:28; Hechos 4:12). Chaypajqa Jesuspi creenanchej tiyan, kausayninchejta cambiananchej tiyan, bautizakunanchejtaj tiyan (Mateo 28:19, 20; Juan 3:16; Hechos 3:19, 20). Uj runaqa ruwasqasninwan rikuchin creeyniyojchus manachus kasqanta (Santiago 2:24, 26). Chaywanpis salvakunanchejqa mana uj imata ruwasqanchejmantachu kashan, manachayqa Dios mayta khuyakuwasqanchejmanta kashan (Gálatas 2:16, 21).

6.   Cielo. Jehovawan Jesuswan angeleswan imaqa cielopi tiyakunku (Salmo 103:19-21; Hechos 7:55). b 144.000 runaslla wañuymanta kausarimuspa cieloman renqanku Jesuswan khuska cielomantapacha gobernamunankupaj (Daniel 7:27; 2 Timoteo 2:12; Apocalipsis 5:9, 10; 14:1, 3).

7.   Jallpʼa. Diosqa jallpʼata ruwarqa runas chaypi wiñaypaj tiyakunankupaj (Salmo 104:5; 115:16; Eclesiastés 1:4). Paytaj kasukoj runasta bendicenqa, kay jallpʼapi uj kʼachitu paraisopi mana onqospa wiñaypaj tiyakunankupaj (Salmo 37:11, 34).

8.   Llakiykunamanta, ñakʼariykunamantawan. Bibliaqa niwanchej uj ángel Diospa contranpi oqharikusqanta. Chay kutimantapachataj ñakʼariy, llakiykunapis tiyan (Juan 8:44). Chay angeltaqa ninchej “Satanás” chayri “Kuraj Supay” nispa. Payqa ñaupa tatasninchejta engañarqa ladonmanta kanankupaj. Chaynejta ñakʼariykuna rikhurimorqa (Génesis 3:1-6; Romanos 5:12). Diosqa saqeshallan llakiykunas kananta Satanás qhasimanta tumpasqanta rikuchinanpaj. Chaywanpis mana saqenqachu unayta llakiykuna kananta.

9.   Wañuy. Uj runa wañujtenqa mana imanpis kausashaj qhepakunchu (Salmo 146:4; Eclesiastés 9:5, 10). Chantapis wañusqasqa mana infiernopichu ñakʼarishanku.

    Jehová Diosqa may chhika wañusqasta kausarichimonqa (Hechos 24:15). Chaywanpis chay kausarimojkunamanta pikunachus mana Diosta kasukonqankuchu chaykunaqa, chinkachisqas kanqanku, niñataj ujtawanpis kausarimonqankuñachu (Apocalipsis 20:14, 15).

10.   Familia. Diosqa uj qharita uj warmitawan ujchaykuspa casado kausayta qallaricherqa. Casadosqa ujninku wasanchajtillan divorciakuyta atinku (Mateo 19:4-9). Noqaykoqa sut’ita reparayku Bibliaj yuyaychaykunasnin sumaj kasqanta, familias kusisqas kausakunankupaj (Efesios 5:22–6:1).

11.   Imaynatachus Diosta yupaychasqaykumanta. Noqaykoqa mana cruztachu nitaj santostachu yupaychayku (Deuteronomio 4:15-19; 1 Juan 5:21). Noqaykoqa kaykunata ruwayku Diosta yupaychanaykupaj:

    •   Diosmanta mañakuyku (Filipenses 4:6).

    •   Bibliata leeyku, estudiaykutaj (Salmo 1:1-3).

    •   Imatachus Bibliamanta yachakusqaykupi t’ukuriyku (Salmo 77:12).

    •   Tantakuyku orakunaykupaj, Bibliata estudianaykupaj, takinaykupaj, purajmanta kallpachanakunaykupajtaj (Colosenses 3:16; Hebreos 10:23-25).

    •   “Diospa Gobiernonmanta sumaj” willaykunata willamuyku (Mateo 24:14).

    •   Pisichikojkunata yanapayku (Santiago 2:14-17).

    •   Jallpʼantinpi Diospa Gobiernonmanta willakunallanpajpuni tantakuna wasista, sucursalesta ruwayku, allinchaykutaj (Salmo 127:1).

    •   Mayqen llajtapipis terremotos kajtin chayri ima llakiypis kajtin yanapakuyku (Hechos 11:27-30).

12.   Imayna organizasqachus kasqaykumanta. Noqaykoqa congregacionespi tʼaqasqa kashayku. Sapa congregacionmantataj uj qotu hermanos encargasqa kashanku, pikunatachus ancianos niyku. Paykunaqa wajkunamanta nisqa mana aswan kurajpajchu qhawasqa kanku, nitaj ima pagotapis japʼinkuchu (Mateo 10:8; 23:8). Mana ni ima diezmota, nitaj ofrendatapis churaykuchu (2 Corintios 9:7). Astawanpis Diospa Gobiernonmanta willakunallanpajpuni sapa uj munasqaykuman jina qolqeta churayku, manataj pipis yachanchu mashkhatachus churasqaykuta.

     Uj qotu experienciayoj hermanostaj centralniykumantapacha jallpʼantinmanta testigosta ñaupajman apashanku. Paykunataqa Diospa Llajtanta Kamachejkuna niyku (Mateo 24:45).

13.   Ujchasqas kashayku. Maymanta kaspapis uj yuyaylla kashayku (1 Corintios 1:10). Ima culturamanta kaspapis, mayqen llajtamanta kaspapis, ima colorniyoj kaspapis kallpachakuyku tukuyta uj rejllata qhawanaykupaj (Hechos 10:34, 35; Santiago 2:4). Ujchasqa kaspapis, Bibliamanta yachakusqaykuman jina sapa uj imatapis ajllayta atiyku (Romanos 14:1-4; Hebreos 5:14).

14.   Imaynachus kasqaykumanta. Noqaykoqa tukuy atisqaykuta kallpachakuyku tukuy imata munakuywan ruwanaykupaj (Juan 13:34, 35). Kallpachakuyku Diosta mana phiñachinaykupaj. Chayrayku yawarwan mana ni ima mana allintapis ruwaykuchu, nitaj churachikuykuchu (Hechos 15:28, 29; Gálatas 5:19-21). Mana chʼajwasta rikhurichiykuchu, nitaj guerramanpis riykuchu (Mateo 5:9; Isaías 2:4). Autoridadesta respetayku, churasqanku leyestapis kasukuyku, Diospa leyesninman churanakojtillan mana kasuykuchu (Mateo 22:21; Hechos 5:29).

15.   Imaynatachus wajkunawan apanakusqaykumanta. Jesusqa nerqa: “Runa masiykita munakunayki tiyan, qan kikiykita jina”, nispa. Chantá nillarqataj: “Mana kay mundomanta runas jinachu kanku”, nispa (Mateo 22:39; Juan 17:16). Chayrayku kallpachakuyku tukuypaj allinta ruwanaykupaj. Chaynejta mana politicaman, nitaj ima iglesiamanpis chhapukuykuchu (Gálatas 6:10; 2 Corintios 6:14). Chaywanpis mana wajkunata obligaykuchu noqayku jina yuyanankupaj (Romanos 14:12).

 Jehovaj testigosninmanta astawan yachayta munanki chayqa, Internetpi paginaykuman yaykuy. Chantapis oficinasniykuman qhelqamuwaykuman chayri wasiyki qayllapi kaj tantakuna wasiman riwaj manachayri uj testigowan parlariwaj.