“Juicio pʼunchay qayllapiña” nisojtinku, ¿imapitaj yuyanki? Ichá yuyanki chay pʼunchay Jesús kay Jallpʼaman jamuytawan paypi mana creejkunata infiernoman wijchʼuykunanta, paypi creejkunatataj janaj pachaman oqharikapunanta. Wakinkunataj chay pʼunchayta mayta manchachikunku, wakintajrí asiykukunku.

Bibliaqa juicio pʼunchay chayrí “tukukoyqa” jamunantapuni nin (Mateo 24:14). Chay pʼunchayta Bibliaqa “Armagedón” chayri ‘Diospa jatun pʼunchayninʼ nillantaj (Apocalipsis 16:14, 16). Religionesqa chay pʼunchaymanta tukuy imata manchachikunapaj jina parlanku. Bibliatajrí, sutʼita niwanchej imachus juicio pʼunchay kasqanta. Chantá nillawanchejtaj qayllitapiña kashasqanta, imaynatachus salvakunanchejta ima. Imatachus juicio pʼunchaymanta Biblia yachachisqanta astawan sutʼincharina. Qhawarinataj imachus chay pʼunchaypi chinkachisqa kananta.

1. JALLPʼAQA MANA NINAWANCHU QʼOLASQA KANQA

   Bibliaqa nin: “Kay pachata cimientosnimpi sayacherqanki mana jaykʼaj kuyuchisqa kanampaj”, nispa (Salmo 104:5). Kay versículo, waj versículos ima sutʼinchawanchej Jallpʼaqa ni jaykʼaj chinkachisqachu kananta (Eclesiastés 1:4; Isaías 45:18).

2. JUICIO PʼUNCHAYQA UNAYMANTAPACHA NISQAÑA KARQA

   Diosqa yachan ima horachus chayri ima pʼunchaychus juiciota kay Jallpʼaman apamunanta. Biblia nin: “Chay pʼunchaymantaqa, chay horamantapis mana pipis yachanchu, ni janaj pachapi angelespis, nitaj Churipis. Dios Tatalla chaymantaqa yachan. Chayrayku qankunaqa wakichisqa kaychej; ama puñurpayaychejchu, imaraykuchus mana yachankichejchu maykʼajchus chay pʼunchay chayamunanta”, nispa (Marcos 13:32, 33). Dios Tatanchejqa “maykʼajchus chay pʼunchay chayamunanta” allinta yachan.

3. JUICIO PʼUNCHAYTAQA MANA UJ RUNACHU, NITAJ WAJ IMASCHU QALLARICHENQA

   ¿Pitaj chayri imataj juicio pʼunchayta qallarichenqa? Biblia nin: “Chaypacha, janaj pachata kicharisqata rikorqani. Uj runa yuraj caballopi lloqʼasqa kasharqa, sutintaj karqa Nisqanta Juntʼaj Kajtaj, Cheqa Kajtaj, imaraykuchus cheqanta kamachej, maqanakojtaj [...]. Rikorqani chay millay animalta, kay pachapi reykunatawan, chay ashkha soldados tantasqatawan wañuchinaku maqanakuman rejta chay caballopi lloqʼasqa kajpa contrampi, soldadosnimpa contrampi ima”, nispa (Apocalipsis 19:11-21). Kay versículos rijchʼanachiypi jina sutʼinchasqanmanta entiendenchej, Dios angelesninta kachamuspa payman churanakojkunata chinkachinanta.

1. JUICIO PʼUNCHAYPEQA TUKUY GOBIERNOS CHINKACHISQA KANQANKU

   Biblia nin: “Chay reykuna kamachishajtinku, janaj pachapi kaj Dios uj reinota sayarichenqa, chaytaj mana jaykʼajpis chinkachisqachu kanqa, manataj mayqen reinopis payta atipanqachu. Tukuynin waj reinosta tukuchenqa, chay atipaj reinotajrí wiñaypaj sayanqa”, nispa (Daniel  2:44). Nerqanchej jina, kay pachamanta reykuna, “caballopi lloqʼasqa kajpa contrampi, soldadosnimpa contrampi ima” oqharikonqanku (Apocalipsis 19:19). Diospa Reinontajrí, paykunata tukuchenqa.

2. JUICIO PʼUNCHAYPI ÑAKʼARIYKUNA CHINKANQA

   Diosqa kay Jallpʼamanta tukuy “chʼajwasta” chayri guerrasta chinkachenqa (Salmo 46:9). Biblia nin: “Cheqanta kawsajkuna mana juchayojkunalla kay pachapi wiñaypaj tiyakonqanku. Juchasapasrí kay pachamanta wijchʼusqa kanqanku; ruwanankuta mana ruwajkunaqa kay pachamanta tʼirasqa kanqanku”, nispa (Proverbios 2:21, 22). Chantapis Diosqa “tukuy imata mosojyach[enqa]” (Apocalipsis 21:4, 5).

3. JUICIO PʼUNCHAYPEQA LLULLA RELIGIONES CHINKACHISQA KANQANKU

   Biblia nin: “Profetasqa llulla kajllata sutʼinchanku, sacerdotestaj munasqankuman jinalla kamachinku [...]. Chaywampis, imanankichejtaj chay tukukuy pʼunchay chayamojtinri?”, nispa (Jeremías 5:31). Jesuspis nillarqataj: “Chay pʼunchaypeqa ashkhas niwanqanku: Señor, Señor. Manachu sutiykipi sutʼincharqayku, sutiykipitaj supaykunata qharqorqayku, sutillaykipitaj ashkha milagrostapis ruwarqayku? nispa. Chaypachataj paykunaman nisaj: Ni jaykʼaj qankunata rejserqaykichejchu. Chinkaychej ñawpaqeymanta, sajrata ruwajkuna”, nispa (Mateo 7:21-23).

4. JUICIO PʼUNCHAYPEQA SAJRA RUNAS CHINKACHISQA KANQANKU

   Jesús nerqa: “Kaytaj chay juchachayqa: Kay pachaman kʼanchay jamorqa, runastaj laqhata kʼanchaymanta nisqaqa astawan munakorqanku, sajra ruwanaspi kawsasqankurayku”, nispa (Juan 3:19). Diospa kamachin Noej tiemponpipis Diosqa juiciota kay jallpʼaman apachimorqa. Bibliaqa nin: “Chaypacha runasqa yakoj pʼampasqan chinkarqanku. Kunanqa Diospa chay nisqannejllatataj cielopis, kay pachapis ninapi qʼolachisqa kanankupaj waqaychasqa kanku juicio pʼunchaykama. Chaypachaqa Diosqa mana cheqan kajman jina kawsaj runasta juzgaspa, chinkarparichenqa”, nispa (2 Pedro 3:5-7).

Bibliapi nin jina jamoj juiciotaqa, Noej tiemponpi juiciowan kikinchashan. Noej tiemponpi Diosqa mana kay Jallpʼatachu chinkacherqa, manaqa enemigosninta. Jamoj juicio pʼunchaypipis, Diosqa enemigosnillantataj chinkachenqa, amigosnintarí Noetawan familiantawan jina waqaychanqa (Mateo 24:37-42).

Dios enemigosninta chinkachejtin Jallpʼaqa may kʼachituman tukonqa. Reparanchej jina Bibliaqa juicio pʼunchaymanta parlaspa mana manchikunapaj jinachu sutʼinchawanchej, manaqa kusikunapaj jina. Jinapis ichá tapurikunki: “¿Biblia nishanmanchu maykʼajchus chay juicio pʼunchay kananta? ¿Qayllapiñachu kashanman? ¿Imaynatá salvakuyman?”, nispa.