Biblia nin juicio pʼunchaypi manchay ñakʼariy kananta. Mateo 24:21, 22 nin: “Chaypacha manchay ñakʼariy kanqa; kay pacha qallarikusqanmantapacha manaraj chay jina karqachu [...]. Chay pʼunchaykunachus mana pisiyachisqa kankuman chayqa, mana pipis salvasqachu kanman”, nispa. Chantapis Biblia nillantaj: “Kay pachaqa tukukapushan, [...] Diospa munayninta ruwajrí, wiñaypaj kawsanqa”, nispa (1 Juan 2:17).

Juicio pʼunchaymanta salvakuyta munanki chayqa, ¿imatá ruwawaj? Yarqhaymantawan, chʼakiymantawan mana wañunaykipaj, ¿tukuy imatachu waqaychayta qallarinayki kanqa? Mana. Biblia nin: “Ajinata tukuy ima nina larwaypi tukuchisqa kananta yachaspa, astawanraj juchamanta tʼaqasqa, cheqan kajman jina kawsanaykichej tiyan. Ajinata Señorpa jamunan pʼunchayta suyaspa”, nispa (2 Pedro 3:10-12). ¿Imataj tukuchisqa kanqa? Tukuy gobiernos, Diospa Reinonpa contranpi kajkuna ima. Rikunchej jina, juicio pʼunchay chayamojtenqa, tukuy imata waqaychasqanchejpis qhasillapaj kanqa.

Juicio pʼunchaypi salvakunanchejpajqa, Diospa munayninta ruwananchej, sonqonta kusichinanchejpaj jinataj kausakunanchej tiyan (Sofonías 2:3). Nerqanchej jina, runasqa señalesta rikushaspapis, mana reparankuchu juicio pʼunchay qayllapiña kasqanta. Noqanchejqa ama paykuna jinachu kanachej. Astawanpis juicio pʼunchay chayamunanta ama qonqanachu. Jehovaj testigosnintaj Bibliawan yachachisunkuman imatachus salvakunaykipaj ruwanaykita.