යොහන් 18:1-40
18 ඒ දේවල් පැවසූ පසු යේසුස් තම ගෝලයන් සමඟ කිද්‍රොන් නිම්නය+ හරහා ගොස් උයනකට පැමිණියේය. ඔහුද ඔහුගේ ගෝලයෝද ඒ උයනට ඇතුල් වූහ.+
2 යේසුස් තම ගෝලයන් සමඟ අවස්ථා කිහිපයකදීම එම ස්ථානයේදී කාලය ගත කළ නිසා ඔහුව පාවා දීමට සිටි යූදස්ද ඒ ස්ථානය ගැන දැන සිටියේය.+
3 එහෙයින් යූදස්, හේවා පිරිසක්ද නායක පූජකයන්ගේ සහ පරිසිවරුන්ගේ නිලධාරීන්ද සමඟ එම ස්ථානයට ගියේය. ඔවුන් එම ස්ථානයට පැමිණියේ පන්දම්, පහන් හා ආයුධ රැගෙනය.+
4 තමාට මුහුණ දීමට සිදු වන සියල්ල ගැන දැන සිටි යේසුස්+ ඉදිරියට ගොස්, “ඔබ සොයන්නේ කාවද” කියා ඔවුන්ගෙන් ඇසුවේය.
5 ඔවුහුද, “අපි සොයන්නේ නාසරෙත් නුවරින් පැමිණි යේසුස්වයි”+ කියා පිළිතුරු දුන්නෝය. “ඒ මමයි” කියා යේසුස් ඔවුන්ට කීවේය. ඒ අවස්ථාවේදී ඔහුව පාවා දුන් යූදස්ද+ එතැනට පැමිණි පිරිස සමඟ සිටියේය.
6 “ඒ මමයි” කියා යේසුස් පැවසූ විට ඒ පිරිස පස්සෙන් පස්සට ගොස්+ බිම ඇද වැටුණෝය.
7 එහෙයින් යේසුස් නැවතත්, “ඔබ සොයන්නේ කාවද” කියා ඔවුන්ගෙන් ඇසුවේය. ඔවුහුද, “නාසරෙත් නුවරින් පැමිණි යේසුස්වයි” කියා පිළිතුරු දුන්නෝය.
8 එවිට යේසුස් මෙසේ පැවසුවේය. “ඒ මම කියා දැන් ඔබට කිව්වා නේද? ඔබ හොයන්නේ මාව නම් මේ අයට යන්න දෙන්න.”
9 ඔහු ඒ දේ පැවසුවේ, “ඔබ මට භාර දුන් අයගෙන් එක් කෙනෙකුටවත් හානියක් වුණේ නැහැ”+ කියා ඔහු පැවසූ දේ ඉටු වීමටයි.
10 එවිට කඩුවක් බැඳගෙන සිටි සීමොන් පේතෘස් එය පිටතට ඇද, උත්තම පූජකයාගේ දාසයාට පහර දුන්නේය. ප්‍රතිඵලයක් ලෙස ඔහුගේ දකුණු කන කැපී ගියේය.+ ඒ දාසයාගේ නම මැල්කස්ය.
11 නමුත් යේසුස් පේතෘස්ට මෙසේ කීවේය. “ඔය කඩුව නැවතත් කොපුවේ දමාගන්න.+ පියාණන් මට බොන්න දී ඇති කුසලානයෙන්* මම අනිවාර්යයෙන්ම පානය කළ යුතුයි.”+
12 එවිට හේවා පිරිසද සෙන්පතිද යුදෙව්වරුන්ගේ නිලධාරීහුද එකතු වී යේසුස්ව අල්ලා ඔහුගේ අත් බැන්දෝය.
13 ඔහුව මුලින්ම ගෙන ගියේ අන්නස් වෙතටය. එයට හේතුව වූයේ අන්නස් ඒ අවුරුද්දේ උත්තම පූජකයාව සිටි කායෆස්ගේ+ භාර්යාවගේ පියා වූ නිසාය.
14 සියල්ලන් වෙනුවෙන් එක මිනිසෙකු මිය යෑම ප්‍රයෝජනවත් වන බව යුදෙව්වරුන්ට කලින් පැවසුවේ කායෆස්ය.+
15 මේ අතර සීමොන් පේතෘස් සහ තවත් ගෝලයෙක් යේසුස් පසුපස ගියෝය.+ උත්තම පූජකයා ඒ ගෝලයාව දැන සිටි නිසා ඔහුද යේසුස් සමඟ උත්තම පූජකයාගේ නිවසෙහි ඇතුල් මළුවට ගියේය.
16 නමුත් පේතෘස් සිටියේ දොරකඩ අසලය.+ එහෙයින් උත්තම පූජකයා දැන සිටි අනික් ගෝලයා පිටතට ගොස් දොරටු පාලිකාවට කතා කර, පේතෘස්ව ඇතුළට ගෙන ආවේය.
17 එවිට දොරටු පාලිකාව ලෙස සිටි සේවිකාව පේතෘස්ගෙන් මෙසේ ඇසුවාය. “ඔබත් මේ මිනිසාගේ ගෝලයෙක් නේද?” ඔහුද, “නැහැ” කියා පිළිතුරු දුන්නේය.+
18 එය ශීත රාත්‍රියක් විය. ඒ නිසා දාසයෝද නිලධාරීහුද ගිනිමැලයක් වටා+ සිටගෙන ගිනි තපිමින් සිටියෝය. පේතෘස්ද ඔවුන් සමඟ ගිනි තපිමින් සිටියේය.
19 මේ අතර නායක පූජකයා යේසුස්ගේ ගෝලයන් ගැනත් ඔහුගේ ඉගැන්වීම් ගැනත් යේසුස්ගෙන් ප්‍රශ්න කළේය.
20 යේසුස් ඔහුට මෙසේ පිළිතුරු දුන්නේය. “මම සෑම දෙයක්ම ඉගැන්වූයේ ප්‍රසිද්ධියේයි. මම නිතරම ඉගැන්වූයේ යුදෙව්වරුන් සියලුදෙනා එක් රැස් වන සිනගෝගයකදී නැත්නම් දේවමාලිගාවේදීයි.+ මම කිසිම දෙයක් රහසින් කිව්වේ නැහැ.
21 ඔබ මගෙන් මේ ප්‍රශ්න අසන්නේ ඇයි? මා පැවසූ දේවල් අසාගෙන සිටි අයගෙන් අහලා බලන්න. මා කතා කළ දේවල් ගැන ඔවුන් දන්නවා.”
22 ඔහු ඒ දේවල් පැවසූ විට ළඟ සිටගෙන සිටි එක් නිලධාරියෙක් යේසුස්ගේ කම්මුලට පහර දී,+ “ඔබ නායක පූජකයාට පිළිතුරු දෙන්නේ මෙහෙමද” කියා ඇසුවේය.
23 යේසුස් ඔහුට මෙසේ පිළිතුරු දුන්නේය. “මා කී දේ වැරදි නම් ඒ වරද මොකක්ද කියලා මට කියන්න. නමුත් මම පැවසූ දේවල වරදක් නැත්නම් ඔබ මට පහර දෙන්නේ ඇයි?”
24 එවිට අන්නස් අත් බැඳ සිටි යේසුස්ව උත්තම පූජකයා වූ කායෆස් වෙතට යැව්වේය.+
25 මේ අතරේ සීමොන් පේතෘස් සිටගෙන ගිනි තපිමින් සිටියේය. එවිට ඔහු සමඟ සිටි අය, “ඔබත් ඔහුගේ ගෝලයෙක් නේද” කියා ඔහුගෙන් ඇසූහ. ඔහුද, “නැහැ” කියා පවසමින් ඔවුන් පැවසූ දේ ප්‍රතික්ෂේප කළේය.+
26 ඒ පිරිස අතර උත්තම පූජකයාගේ තවත් දාසයෙක් සිටියේය. ඔහු පේතෘස් විසින් පහර දී කන කපා දැමූ මිනිසාගේ නෑදෑයෙකි.+ ඔහු පේතෘස්ව දැක, “ඔබ ඔහු සමඟ උයනේ සිටිනවා මම දැක්කා” කියා ඔහුට පැවසුවේය.
27 නමුත් පේතෘස් නැවතත් ඔවුන් පැවසූ දේ ප්‍රතික්ෂේප කළේය. ඒ මොහොතේම කුකුළෙක් හැඬලුවේය.+
28 ඉන්පසු ඔවුහු යේසුස්ව කායෆස් සිටි තැනින් ආණ්ඩුකාරයාගේ මාලිගාවට ගෙන ගියෝය.+ එය සිදු වූයේ හිමිදිරි උදෑසනය. නමුත් ඔවුහු ආණ්ඩුකාරයාගේ මාලිගාවට ඇතුල් නොවූහ. එයට හේතුව පාස්කු භෝජනයට සහභාගි වීමට සිටි ඔවුන්, එසේ කිරීමෙන් තමන් අපවිත්‍ර වෙයි කියා සිතූ නිසාය.+
29 එහෙයින් පිලාත් ඔවුන් වෙනුවෙන් පිටතට ඇවිත්, “ඔබ මේ මිනිසාට විරුද්ධව නඟන චෝදනාව මොකක්ද”+ කියා ඇසුවේය.
30 ඔවුහු මෙසේ පිළිතුරු දුන්නෝය. “මේ මිනිසා වරදකරුවෙක් නොවෙයි නම් අප ඔහුව ඔබට භාර දෙන්නේ නැහැ.”
31 එහෙයින් පිලාත්, “ඔහුව ගෙන ගොස් ඔබේ නීතියට අනුව ඔහුව විනිශ්චය කරන්න”+ කියා ඔවුන්ට කීවේය. යුදෙව්වරුද, “අපට කිසිම කෙනෙක් මරණයට පත් කිරීම තහනම්”+ කියා කීවෝය.
32 ඒ දේ සිදු වූයේ යේසුස් තම මරණය ගැන පැවසූ දේ ඉටු වීම සඳහාය.+
33 එහෙයින් ආණ්ඩුකාර පිලාත් නැවතත් තම මාලිගාවට ඇතුල් වී යේසුස්ව තමන් ළඟට කැඳවා, “ඔබ යුදෙව්වරුන්ගේ රජද”+ කියා ඔහුගෙන් ඇසුවේය.
34 යේසුස් මෙසේ පිළිතුරු දුන්නේය. “ඔබ එහෙම අහන්නේ ඔබට එහෙම හිතෙන නිසාද? නැත්නම් වෙනත් අය මා ගැන ඔබට යම් දේවල් පැවසූ නිසාද?”+
35 පිලාත්ද, “මම යුදෙව්වෙක්ද? ඔබව මට භාර දුන්නේ ඔබේම ජාතියේ මිනිසුන් හා නායක පූජකයනුයි.+ ඔබ මොනවාද කළේ” කියා ඇසුවේය.
36 යේසුස් මෙසේ පිළිතුරු දුන්නේය.+ “මගේ රාජ්‍යය මේ ලෝකයට කිසිම ආකාරයකින් සම්බන්ධ නැහැ.+ මගේ රාජ්‍යය මේ ලෝකයට සම්බන්ධ වී තිබුණා නම් මා යටතේ සිටි අය මා වෙනුවෙන් සටන් කර+ මාව යුදෙව්වරුන්ගේ අතට හසු වෙන්න ඉඩ දෙන්නේ නැහැ. නමුත් මගේ රාජ්‍යය මේ ලෝකයට කිසිම ආකාරයකින් සම්බන්ධ නැහැ.”
37 එවිට පිලාත්, “එසේනම්, ඔබ රජෙක්ද” කියා ඔහුගෙන් ඇසුවේය. යේසුස් මෙසේ පිළිතුරු දුන්නේය. “මම රජෙක් කියා ඔබ අසන ප්‍රශ්නයෙන්ම පැහැදිලියි.+ මා ඉපදුණෙත් මේ ලෝකයේ මිනිසුන් අතරට පැමිණියෙත් සත්‍යය ගැන සාක්ෂි දැරීමටයි.+ සත්‍යයට පක්ෂව සිටින සියලුදෙනාම+ මගේ හඬට සවන් දෙනවා.”+
38 පිලාත්ද, “සත්‍යය? ඒ මොකක්ද” කියා ඔහුගෙන් ඇසුවේය.
පිලාත් ඉන්පසුව නැවතත් පිටත සිටි යුදෙව්වරුන් වෙතට ගොස් ඔවුන්ට මෙසේ කීවේය. “මොහු වරදකරුවෙක් කියා මට නම් පෙනෙන්නේ නැහැ.+
39 පාස්කු කාලයේදී සාමාන්‍යයෙන් සිරිතක් හැටියට මම එක මිනිසෙක්ව නිදහස් කරනවා.+ ඒ නිසා මම යුදෙව්වරුන්ගේ රජුව නිදහස් කරනවාට ඔබ කැමතිද?”
40 එවිට ඔවුහු නැවතත්, “මේ මිනිසාව නිදහස් කරන්න එපා. බරබ්බස්ව නිදහස් කරන්න” කියා කෑගැසුවෝය. ඔවුන් නිදහස් කරන්න කියා කියූ බරබ්බස් නම් මිනිසා කොල්ලකරුවෙකි.+
