Mitto mancho seekke egennate, hakku manchi konni albaanni maa assinoronna hiikkonne fonqolo qeele sainoro afa hasiissanno. Hatteente gede, Magano seekke afate isi konni albaanni assinore rosa hasiissannohe. Isi konni albaanni assinori xa kaaˈlanni noonke garanna albillitte kaaˈlannonke gara afatto woyite dhagge assiˈrattora dandaatto.

Baalankare kalaqinohu Yihowaati. “Alame kalaqantuhunni kayise mannaho leellannokkihu Maganu dani, hegere wolqasinna Maganimmasi, isi kalaqino kalaqami aana xabbe leeltanno.” (Roomu Sokka 1:20) Isi ‘wolqasinni baatto kalaqino; egennosinni kalqe xintino; afasinni gordo diriirsino.’ (Ermiyaasi 10:12) Qoleno Maganunnihu dhagge ikkanno kalaqami, isi ninke daafira hedannota leellishanno.

Hanni Yihowa manna “umisi daninni” kalaqasi heeshshonke hagiirru woˈminota ikkitanno gede assitino gara hedi. (Kalaqama 1:27) Hatto yaa, shiimu deerrinnino ikkiro, dhagge ikkitanno akattasi leellisha dandiineemmo yaate. Yihowa ayyaanaamittete coye woy isi laonna seera huwatate dandoo heedhannonke gede asse kalaqinonke. Isi seeri garinni heeˈrate sharrammeemmoha ikkiro, albinni roore hagiirru woˈmino heeshsho heeˈneemmo. Qoleno Maganu isi ledo jaalooma kalaqiˈrate qoosso uyinonke.

Uulla kalaqantino gari, Maganu ninkera noosi lao leellishanno. Soqqamaasinchu Phaawuloosi tenne daafira coyiˈranni togo yiino: “Shaqqado Magano ikkasi leellishannoha dancha looso loosa diagurino. Gordunni xeena soyannoˈne; gideno yannatenni aannoˈne; sagaletenninna hagiirrunni wodana kassi assannoˈne.” (Soqqamaasinete Looso 14:17) Maganu heeshshotenni heeˈrate hasiisannore calla kalaqe diagurino. Hatteentenni isi hagiidhinanni heeˈneemmo gede, babbaxxinoha hagiirsiisanno coye uyinonke. Ikkollana, kuri Maganu ninkera kalaqinori giddo boodeholla.

Yihowa uulla kalaqinohu mannu oosora hegeri qae ikkitanno gedeeti. Qullaawu Maxaafi Yihowa ‘baatto mannaho uyinotanna’ “kalaqinosehu fano heedhara” ikkinokkita kulanno. (Faarso 115:16; Isayaasi  45:18) Maganu uulla kalaqinohu hiittoo manni heeˈranno gedeeti? “Keeraano baatto ragidhanno; ise aanano hegerera heedhanno.”—Faarso 37:29.

Yihowa umi meyatanna labbaaha yaano Addaaminna Heewani kalaqi gedensaanni, baatto “loosannonna agaranno gede” Gannatete worinonsa. (Kalaqama 2:8, 15) Maganu insara lame hagiirsiisanno looso uyinonsa; togo yiinonsa: “Ille ilamme, sirchiˈne baatto woˈmo; baattono kiˈne gashshitinannita ikkito.” (Kalaqama 1:28) Konnira Addaaminna Heewani uullate aana hegerera heeˈrate qoosso afiˈrino. Hige ma assinanni, insa Maganoho hajajama giwe ‘uulla ragidhanno keeraano’ wido ikkate qoossonsa huˈnino. Ikkollana, konninni aanchine laˈneemmonte gede insa finqilansa Maganu mannu oosorano ikko uullate hedinore wonshannokki gede diassitanno. Hakkuyira albaanni, hanni Maganu uyinonkeha wole coye laˈno.

Qullaawu Maxaafi Maganu Qaaleeti. Yihowa Qullaawa Maxaafa uyinonkehu mayiraati? Hatto assinohu qaru korkaati isi daafira ronseemmo gedeeti. (Lawishsha 2:1-5) Qullaawu Maxaafi Maganu daafira xaˈminanni xaˈmuwa baalate dawaro qolannonke yaa diˈˈikkino; qoleno togo assa dandaanno maxaafi heeˈrara didandaanno. (Rosiisaancho 3:11) Ikkollana Qullaawu Maxaafi giddo borreessinoonniti mitte mittenti hedo, Maganu daafira rosiissannonke. Qullaawa Maxaafa nabbambeemmo woyite, Maganu hiittoo manna baxannoronna hiittoo manna giwannoro anfeemmo. (Faarso 15:1-5) Qoleno magansiˈrate, amanyootunna maalaamittete coyi daafira mayi lao noosiro ronseemmo. Hattono Maganu Beetto ikkinohu Yesuusi Kiristoosi coyiˈrinonna assinore kultannoti Qullaawu Maxaafi xagge, Yihowa akatta xabbe leeltannonke gede assitannote.—Yohaannisi 14:9.

Yihowa Qaalesi Qullaawa Maxaafa uyinonkehu wolu korkaati, mannu ooso hagiirru noo heeshsho heeˈra dandiitanno gara affanno gedeeti. Yihowa maatenke hagiirru noota assiˈra, noonkerinni kassi yee heeˈranna yaaddo qeela dandiineemmohu hiittoonniitiro Qullaawu Maxaafi widoonni kulinonke. Qoleno tenne metseete giddo aane noo qoolira ronseemmonte gede, Qullaawu Maxaafi heeshshonke giddo xaˈmineemmote qara qara xaˈmuwara lawishshaho, ‘Qarru batiˈrinohu mayiraati? Albillitte mayi ikkanno?’ yitanno xaˈmuwara dawaro afiˈrate kaaˈlannonke. Qullaawu Maxaafi Maganu hedinore wonshate maa assinorono xawisanno.

Qullaawu Maxaafi addinta baxxino maxaafa ikkinotanna Magano agurranna konne maxaafa wolu borreessiisa dandaannokkita leellishshannoti wole tajeno no. Konne maxaafa 40 meddi yaanno manni 1,600 diri giddo borreessinoha ikkirono, maxaafu Anni Yihowa ikkino daafira, hanafotenni kayise jeefote geeshsha cuˈmosi mittete. (2 Ximootewoosi 3:16) Qullaawu Maxaafi mite hundi borro gede ikkikki, sokkasi soorrantukki yannanke geeshsha iillino; lowo kume ikkitannota angatenni galchinoonni borro xiinxalline tenne huwata dandiineemmo. Qoleno Qullaawa Maxaafa wolu afiira qolle tirrannikki gede, mannaho tuqinsannikkinna nabbambanniki gede assate woˈnaalloonniha ikkirono, hatto assa didandiinoonni. Isinni Qullaawu Maxaafi geeshsha mannaho tunqinsoonnihunna wolu afiira qolle tirroonnihu wolu maxaafi dino. Qullaawu Maxaafi baikkinni yannanke geeshsha iillasi, ‘Maganinke qaali hegerera kaajje heeˈrannota’ leellishshanno.—Isayaasi 40:8.

Maganu assinori giddo wolu, mannu oosora hedinori woˈmikki gatannokkita buuxisate yee qixxeessino qixxaawooti. Aleenni ronsummonte gede, Maganu hedinohu mannu ooso uullate aana hegerera heedhanno gedeeti. Ikkollana Addaami Maganu hajajo diigasi isi calla ikkikkinni albillitte ilantanno oososi hegerera heeˈrate qoossonsa hoogganno gede assitino. “Mittu manchinni kainohunni cubbu tenne alame eino; reyo cubbu widoonni higge daggino. Mannu baalu cubbo loosino daafira, reyo manna baala amaddino.” (Roomu Sokka 5:12) Addaami loosino cubbinni kainohunni Maganu hedinori woˈmikki gatino. Ikkina Yihowa maa assiyya?

Yihowa assinori akattasi ledo sumuu yaannoreeti. Taashshosi, Addaaminna Heewani loosino soˈrora xaˈmannonsa gede assitinosi; baxillisi kayinni  albillitte ilantanno oosonsa gato afidhanno qixxaawo qixxeessanno gede assinosi. Qoleno kaˈino finqille biddi assate hayyosi horoonsiˈrino, hattono tennera malu maatiro coyiˈrino. (Kalaqama 3:15) Yihowa mannu ooso Yesuusi Kiristoosi widoonni reyotenna cubbu borojjimmanni wolaphitanno qixxaawo qixxeessino. Hatto assinohu hiittoonniiti?

Maganu mannu ooso Addaami abbino qarrinni gatisate Yesuusa uullara soyino; Yesuusi uullara dayinohu heeshsho afiˈnanni gara rosiisatenna “lowo manna wode” gatisateeti. * (Maatewoosi 20:28; Yohaannisi 14:6) Yesuusi Addaami gede guuta ikkino daafira wodo ikka dandaanno. Ikkollana isi Addaami gede ikkikkinni reyote geeshsha Maganoho hajajamino. Yesuusi reyo hasiissannosiha ikkinokki daafira, Maganu iso reyotenni kayise iima heeˈranno gede assino. Yesuusi Addaami assa dandiinokkire yaano hajajamanno mannira heeshsho aa dandiino. “Mittu manchi Addaami hajajama giweenna lowo manni cubbaataamo ikkinte gede, Kiristoosi hajajamanni lowo manni keeraaˈmanno.” (Roomu Sokka 5:19) Yesuusite wodote kakkalo widoonni Maganu mannu ooso uullate aana hegerera heedhanno yee eino qaali woˈmanno.

Yihowa Addaami hajajama giwasi abbitino qarra hunate qixxeessino qixxaawonni isi daafira lowore ronseemmo. Yihowa hedinore wonshannokki gede hoolasira dandaannori nookkita huwanteemmo; ‘qaalisi woˈmanno.’ (Isayaasi 55:11) Qoleno Yihowa ninke lubbora baxannonketa wodanchineemmo. “Ninkera Maganu baxilli xawinonkehu kunninniiti; isi widoonni heeshsho afiˈneemmo gede, Maganu afiˈrinoha mitto Beettosi tenne gobba soyino. Baxillu togooti; Magano ninke banxoommoha ikkikkinni, isi ninke baxe cubbonke agursiisate Beettosi soyinonke.”—1 Yohaannisi 4:9, 10.

“Mitto Beettosi mararikkinni sayise uyinonke Magani” qaale einonkeha “wole coye baala” wonshannota addaxxa dandiineemmo. (Roomu Sokka 8:32) Maganu albillitte maa asseemmoˈne yee qaale eino? Tenne xaˈmora dawaro afiˈrate aane noo birxicho nabbawatto gede koyinseemmohe.