Le Poto e Tosina Atu ai i Tatou i le Atua
O Lē na foafoaina i tatou e lē gata e malosi ae e iai foʻi ona uiga matagofie. E finagalo ia tatou iloa o ia ma faalatalata atu iā te ia. (Ioane 17:3; Iakopo 4:8) O le māfuaaga lenā ua ia faailoa mai ai le tele o mea e faatatau iā te ia.
E Iai le Suafa Patino o Lē na Foafoaina i Tatou
“Ina ia iloa ai e tagata o oe e ou le suafa o Ieova, e na o oe lava o Lē e Silisili Ese i le lalolagi uma.”—SALAMO 83:18.
Ua faailoa mai i le Tusi Paia o Ieova o le Atua moni e toʻatasi. O Lē na foafoaina le vateatea ma meafaiola uma ma e na o ia e tatau ona tatou tapuaʻi i ai.—Faaaliga 4:11.
O Ieova o se Atua Alofa
“O le Atua o le alofa lava ia.”—1 IOANE 4:8.
Ua faailoa mai e Ieova i le Tusi Paia ma mea na ia foafoaina le ituaiga Atua e iai o ia. O le alofa o lona uiga autū ma e uunaʻia ai mea uma e na te faia. O le tele tatou te aʻoaʻoina ai e faatatau iā Ieova o le tele foʻi lenā tatou te alolofa ai iā te ia.
O Ieova o se Atua Lotofaamagalo
“O oe, o le Atua e faamagalo sala.”—NEEMIA 9:17.
E silafia e Ieova e tatou te lē lelei atoatoa. O lea, ua ia faamagaloina i tatou. Pe a taʻutino atu ua tatou salamō ma taumafai e ʻalofia le faia o mea leaga, o le a ia faamagaloina i tatou ma e na te lē toe manatua na agasala.—Salamo 103:12, 13.
E Finagalo Ieova ia Tatou Tatalo Atu Iā te ia
“E latalata Ieova iā i latou uma e valaau atu iā te ia . . . E faafofoga foʻi o ia i a latou alaga.”—SALAMO 145:18, 19.
E lē manaʻomia e Ieova ni sauniga faapitoa po o ni faatusa e tatou te tapuaʻi atu ai iā te ia. E na te faafofoga mai i a tatou tatalo e pei ona faalogologo o se matua alofa i lana fanau pele.
E te Ono Fiafia Foʻi
TALIINA O FESILI FAALE-TUSI PAIA
O ai Ieova?
Po o ia o se Atua mo na o se tagata se toʻatasi e pei o le nuu o Isaraelu?
