“Ia faaauau . . . ona fefaamagaloaʻi ma le lotoatoa pe afai ua faia e se tasi se mea e tigā ai le isi.”​—KOLOSE 3:13.

O i tatou uma lava e faia mea sesē. Atonu e tatou te faatigā i isi pe faatigā mai foʻi isi iā i tatou. O lona uiga la, e tatau ona tatou faamagalo atu ma e manaʻomia foʻi ona faamagalo i tatou e isi. Pe a faamagalo atu, o le a taofia ai i tatou mai i le ita faamoemoe i lē na faatigā mai. E tatou te lē mananaʻo e “taui atu le leaga i le leaga,” ma faamanatu atu i taimi uma i le tagata ana mea sesē po o ona vaivaiga. (Roma 12:17) Ae a pe afai ua matuā tigā ma faigatā ona faagalo le mea na tupu? E tatau ona lua talanoa na o oulua i se auala faaaloalo. O lo tatou sini o le taumafai e faatupu le filemu nai lo o le taumafai e suʻe po o ai e saʻo.​—Roma 12:18.

“Ia faia ma le lotomaulalo, i le manatu ua sili isi iā te outou.”​—FILIPI 2:3.

Pe a lotomaulalo ma faamaulalo o le a fiafia tagata iā i tatou. E latou te iloa e tatou te agamalu, magafagafa, ma e tatou te lē faatigā ma le loto iai i o latou faalogona. Pe a tatou manatu e sili atu i tatou nai lo o isi, pe mananaʻo e faia mea i la tatou lava auala, o le a tatou faatupuina ai fefinauaʻiga  ma faafitauli. O le a ʻalofia ai i tatou e tagata, ma o le a lē tele ni uō tatou te maua pe afai foʻi e iai ni a tatou uō.

“E moni ua ou iloa, e lē faailogaina tagata e le Atua, ae o lē e mataʻu iā te ia i nuu uma lava, ma fai le amiotonu, e talia e ia.”​—GALUEGA 10:34, 35.

E lē silasila Lē na foafoaina i tatou i isi tagata e sili atu nai lo o isi, o o latou atunuu, gagana, tulaga aloaʻia, po o latou lanu. “Na ia faia foʻi nuu uma mai i le tagata e toʻatasi.” (Galuega 17:26) O lona uiga, e aiga tagata uma. Pe a tatou feutagaʻi ma tagata uma i le faamaoni ma le agalelei, e lē gata o le a tatou maua uma le fiafia ae o le a faafiafiaina ai foʻi Lē na foafoaina i tatou.

“Ia oofu outou i le . . . agamalu.”​—KOLOSE 3:12.

O lo tatou faaalia o le agamalu o le a faatoʻafilemu ai isi. O le a latou saʻoloto e talanoa mai ma faasaʻo i tatou, ona latou te iloa e tumau ona tatou agamalu. Pe a latou feita, o le tatou tali atu ma le agamalu o le a faatoʻafilemu ai lenā tagata. Ua faapea mai le Faataoto 15:1: “O le tali filemu e liliueseina ai le ita, a o le upu faatigā e tupu ai le ita.”

“E sili le fiafia e maua i le foaʻi atu i lo o le talia mai.”​—GALUEGA 20:35.

E toʻatele tagata i aso nei e matapeʻapeʻa ma manatu mo na o lo latou lava lelei. Peitaʻi, o le fiafia moni e maua mai i le limafoaʻi. (Luka 6:38) O tagata limafoaʻi e fiafia ona e sili atu lo latou alolofa i tagata nai lo o meafaitino. O lenā alofa e uunaʻia ai i latou e faaalia le lotofaafetai ma le lototalisapaia, pe a foaʻi atu e isi ni mea iā i latou. (Kolose 3:15) Ia fesili ifo, ʻPe ou te manaʻo e avea aʻu o sē e limamau ma lē lotofaafetai, po o sē e limafoaʻi ma faaalia le lotofaafetai?’ O le manatu autū, ia agalelei i isi e pei ona e manaʻo e agalelei mai isi iā te oe.​—Mataio 7:12.