MI GEBORE na tapu 10 december 1968 na ini Ilocos Norte, na den Filippijnen èn mi ben de a di fu seibi fu tin pikin. Neleki furu fu den sma na ini den Filippijnen, wi kweki leki Lomsu. Mi klari a heiskoro na ini 1986 èn baka dati mi ben wani tron wan ati-oso zuster. Ma dati no pasa, fu di mi kon siki seryusu. Fu taki en leti, mi ben denki taki mi ben o dede. Fu di mi no ben sabi moro san fu du, meki mi begi Gado fu yepi mi èn mi taigi en taki te mi ben o kon betre, mi ben o dini en mi heri libi langa.

Di mi kon betre baka wan langa pisi ten, mi memre san mi ben pramisi Gado. Sobun, na ini yuni 1991 mi go na a Bijbelskoro fu a Pinkster Gemeente. Wan fu den sani di wi ben musu fu ondrofeni na a skoro, na fu kisi „a santa yeye di Gado e gi sma fu soso”. Mi ben wani abi a krakti fu meki sma kon betre. Na a skoro wi ben leri taki wi ben kan du dati te wi ben e faste èn te wi ben e begi. Wan leisi mi ben wani sori taki mi ben abi a „santa yeye” disi. Sobun, di a klas fu wi ben e begi, dan sondro taki den sabi, mi ben sidon arki fa wan meisje fu a klas ben begi tranga na ini wan uku. Leti fosi a kaba begi, mi lon esi-esi go na a presi baka pe mi ben saka kindi begi. Bakaten, mi fruteri en soifri san a ben begi Gado èn a ben bribi taki now mi ben kisi „a santa yeye di Gado e gi sma fu soso”!

Na a pisi ten di mi studeri na a skoro, mi ben abi furu aksi. Fu eksempre, Mateyus 6:9 e taki fu a „Tata” nanga a „nen” fu en. Mi ben poti aksi soleki „Suma na a Tata di Yesus ben taki fu en?” èn „Sortu nen musu kon de santa?” Nofo tron den leriman fu mi no ben man gi krin piki èn mi no ben breiti nanga den piki fu den. Den ben e taki dati Gado, a Manpikin nanga a santa yeye na wán, ma taki disi na wan dangra leri. A sani disi ben bruya mi. Ma toku mi tan teki leri fu tron wan domri.

Na a Bijbelskoro wi ben leri taki Yehovah Kotoigi ben de a moro ogri falsi bribi. Boiti dati, sma ben si den leki feanti fu Krestes. Mi bigin teige a bribi disi.

Di mi ben de tu yari na tapu a skoro, dan mi go na oso fu luku mi papa nanga mama na ini a fakansi. Carmen, wan fu den bigi sisa fu mi, yere taki mi ben de drape èn a kon luku mi. A ben de wan dopu Kotoigi fu Yehovah kaba èn a ben e gebroiki furu fu en ten fu preiki. Di a pruberi fu leri mi sani fu Gado, mi ati bron èn mi taigi en: „Mi sabi a Gado kaba di mi e  dini!” Baka di mi bari en èn mi taigi en hati sani, mi pusu en gowe èn mi no ben gi en nowan tra okasi moro fu taki nanga mi.

Di mi go baka na a Bijbelskoro, Carmen seni mi wan brochure Moet u geloof stellen in de Drieëenheid? * (Yu musu poti bribi na ini a Dri-wánfasi?) Wantewante mi kroiki a brochure, dan mi iti en na ini a faya. Mi ati ben bron ete nanga en.

Di mi tan studeri na a Bijbelskoro, mi ben man meki tra sma tron bribiman. Mi ben breiti spesrutu di mi mama nanga mi bigi brada tron memre fu a Pinkster Gemeente tu.

Na ini maart 1994 mi klari a Bijbelskoro fu a Pinkster Gemeente. Soleki fa mi ben fruteri na a bigin, dan wan domri kon luku a gemeente fu wi na a ten dati. Wi alamala di klari a skoro ben wani de nanga en, fu di wi ben bribi taki a ben abi a krakti fu meki sma kon betre. Di wi go na en na tapu a podium, wi dyompodyompo e naki anu, aladi wan band ben e prei poku. Ne ibriwan fu den sma di a ben fasi, fadon na gron fu di „a yeye naki den”. * Di a fasi mi, dan mi fadon na gron tu èn mi flaw. Di mi kisi misrefi baka, mi ben frede. Ma mi ben e firi taki mi ben abi a krakti now fu meki sma kon betre èn dati meki mi ben e firi koloku.

Syatu baka dati, mi gebroiki a krakti disi fu meki wan pikin kon betre di ben siki srefisrefi èn di ben abi hei korsu. Di mi begi, dan wantewante a pikin bigin sweti èn a korsu gowe. Te fu kaba, mi ben firi taki mi ben man du san mi pramisi Gado. Ma toku mi ben firi leigi. Dipi na ini mi ati mi ben bribi taki wán Gado nomo de, ma taki mi no ben sabi a Gado disi trutru. Boiti dati, mi ben tweifri na den furu leri fu a kerki.

Baka di den sani disi pasa, mi kisi moro bita-ati gi Yehovah Kotoigi. Te mi ben feni buku fu den Kotoigi, mi ben bron den. Ne wan sani pasa di mi no ben fruwakti. Mi skreki srefisrefi di mi kon sabi taki mi mama no ben wani abi noti moro fu du nanga a kerki fu wi. Carmen ben studeri Bijbel nanga en! Mi ati ben bron so te nanga mi sisa.

Ne mi feni wan Ontwaakt! na mi mama oso. Fosi, mi ben o bron en. Ma fu di mi ben wani sabi san mi mama ben e leisi, meki mi luku san skrifi na ini. Mi ai fadon na tapu wan tori fu wan sma di ben e bribi den kerkileri fayafaya. Ma di a bigin leisi den buku fu den Kotoigi makandra nanga Bijbel, a kon si taki Bijbel no e leri den sani disi soleki a leri taki Gado, a Manpikin nanga a santa yeye na wán, a leri fu a helfaya èn a leri fu wan sili di e libi go doro te wan sma dede. Den sani disi naki mi ati. Disi na den sani di mi ben wani frustan langa ten kaba. Sensi a ten dati, mi ben angri fu kon frustan den tru tori fu Bijbel.

 Na ini na Ontwaakt! mi leisi ete wan tori fu wan sopiman di ben abi a takru gwenti fu gebroiki drugs, ma di ben kenki en libi fu di a ben studeri Bijbel. Baka di mi leisi den tori disi, mi bigin leisi moro buku fu den Kotoigi. Mi ben feni wan brochure di nen De Goddelijke Naam die eeuwig zal blijven bestaan. * (A nen fu Gado di sa tan fu têgo.) Di mi leisi a brochure, mi leri taki Gado nen na Yehovah. Mi ben breiti so te taki mi ben kon leri suma na a wan-enkri tru Gado!​—Deuteronomium 4:39; Yeremia 10:10.

Sondro fu sma sabi, mi tan leisi den buku èn mi leri moro fu Bijbel. Fu eksempre, na a Bijbelskoro fu a Pinkster Gemeente, mi ben leri taki Yesus na Gado, ma Bijbel leri mi taki Yesus na „a Manpikin fu a libilibi Gado”.​—Mateyus 16:15, 16.

Di mi si Carmen baka, a ben fruwondru taki mi aksi en a brochure De Goddelijke Naam die eeuwig zal blijven bestaan, nanga tra buku. Aladi mi ben de furu yari na tapu a Bijbelskoro, toku mi no ben leri san tru. Den ben tapu mi ai. Ma now di mi ben kon leri sabi san Bijbel e leri trutru, mi ati ben e prisiri srefisrefi. Mi ben frustan den wortu fu Yesus bun now: „Unu o sabi san tru èn dati o meki unu kon fri” (Yohanes 8:32). Den tru leri disi fu Bijbel bigin kenki mi libi.

Wan pisi ten mi ben denki taki mi ben o man dini Yehovah Gado sondro taki sma sabi èn taki mi ben o man tan wroko leki domri. Syatu baka dati, mi kon si taki furu fu den kerkileri, mi no ben man leri den sma moro. Awansi fa a no fa, mi ben e kon frede. Fa mi ben o wroko moni efu mi no ben o de wan domri moro? A ben o de wan bigi syen gi a kerki efu wan fu den domri fu den tron wan Yehovah Kotoigi! Dati meki mi tan gi leri leki domri, ma mi no ben leri sma den falsi kerkileri moro.

Di mi si mi sisa Carmen baka, a gi mi deki-ati fu go na den konmakandra fu Yehovah Kotoigi. Son leisi mi ben musu go na a mamakerki fu wi na ini a foto Laoag. Ma sondro fu sma sabi mi ben go tu na a Kownukondre zaal pe den Kotoigi ben e hori konmakandra. Drape mi miti Alma Preciosa Villarin, di den kari „Precious”. Na uma disi ben de wan sma di ben e gebroiki furu fu en ten fu preiki. Aladi mi no ben lobi den Kotoigi ete, toku mi ben feni en bun taki Precious leri mi sani fu Bijbel.

Mi ben si kaba taki mi sisa ben abi furu pasensi di a ben taki nanga mi fu den tru tori fu Bijbel. Now mi ben si taki Precious ben abi a srefi pasensi dati. A du furu fu yepi mi frustan Bijbel, srefi te mi ati ben e bron, te mi ben e  pruberi fu haritaki nanga en èn son leisi te mi ben e opo mi sten, fu di mi ben feni nomonomo taki sonwan fu den sani di mi ben leri fosi, ben tru. A naki mi ati trutru taki Precious nanga den tra Kotoigi ben e broko den ede nanga mi èn taki den ben abi sakafasi nanga safri-ati. Den sani disi ben gi mi deki-ati fu dini Yehovah.

Na ini yuli 1995 mi kon frustan taki tra fasi no ben de leki fu libi a domriwroko. Fu san ede? Na wan agersi fasi Openbaring 18:4 e taki disi fu falsi kerki: „Komoto drape, mi pipel, efu unu no wani abi prati nanga en na den sondu fu en èn efu unu no wani taki den rampu fu en kon na un tapu tu.” Ma fa mi ben o wroko moni? Hebrewsma 13:5 ben leri mi taki efu wi e du a wani fu Gado, dan a e pramisi wi: „Mi no o libi yu kwetikweti èn noiti mi o gowe fu yu.”

Mi papa nanga mi brada ben gens mi hebi now. Ma toku tu wiki fosi mi dopu leki wan Kotoigi, mi teki deki-ati fu go na oso fu bron ala den sani di mi ben gebroiki fosi leki domri. Baka dati, mi kon si taki mi no ben abi a spesrutu krakti moro. Fosi, te mi ben sribi, dan mi ben firi leki wan sani ben e kon didon na mi tapu. Now mi no e firi a sani dati moro. Noiti moro mi si den skaduw di mi ben gwenti si na a fensre fu mi kamra. Fu di mi studeri Bijbel meki mi leri taki a krakti di sma e kisi now fu meki sma kon betre, no e kon fu Gado, ma fu ogri yeye. Mi breiti so te taki mi kon fri fu den ogri yeye, neleki a meisje di ben kisi yepi fu Paulus. A meisje dati ben abi „wan ogri yeye na en tapu di ben e meki taki a ben man du lukuman-wroko”.​—Tori fu den apostel 16:16-18.

Mi ben prisiri trutru di mi nanga mi mama teki dopu leki Yehovah Kotoigi na ini september 1996. Baka di mi tron wan Yehovah Kotoigi, mi bigin gebroiki furu fu mi ten fu preiki èn mi e du dati furu yari kaba.

Now mi trow nanga wan man di nen Silver. Wi ala tu e du tranga muiti fu leri wi umapikin den tru tori fu Bijbel. Sonwan fu den brada fu mi e dini Yehovah tu. Aladi mi e firi sari taki furu yari langa mi no ben sabi Gado trutru, mi de koloku taki now mi sabi a Gado di mi e dini.