A BOTO fu wi e go na a pikin èilanti Gavdos, wan pikin bergi na ini a Mindrikondre Se. Te wi e gowe, a gersi leki safrisafri den bigi Levká-bergi fu na èilanti Kreita e kon moro pikin. Na ini a boto wi e sidon nanga wan grupu fu 13 sma èn wi e angri fu go preiki na Gavdos di de te na a zuidsei pisi fu Europa.

A gersi leki nowan problema o miti wi na tapu a waran dei disi. Ma te fu yu denki, a winti e bigin wai so tranga taki a se e kon krasi èn a e meki a heri boto e sekiseki leki wan korku. Mi e firi siki èn mi e memre a Bijbel tori di e taki fu na apostel Paulus. Hondrohondro yari pasa, wan tranga winti ben miti en tu na a srefi se disi. Na a ten dati sma ben sabi Gavdos leki Kawda (Tori fu den apostel 27:13-17). Ma mi howpu taki wi o doro Gavdos sondro taki wi kisi mankeri.

Te fu kaba wi e si a presi pe wi musu go, wan bergibergi kontren di gersi wan tu bigi ston di sma fringi go na ini a se. Te yu e teki en gersi nanga tra bergi, dan a plata. A no hei moro leki 300 meter èn a no abi hei bergi-ede tu. A moro bigi pisi fu na èilanti, di no bigi moro leki 26 fokanti kilometer, lai busi fu pinabon nanga tra sortu bon. Na son presi yaneifer-bon de fu feni te na a sesyoro.

Wan ten ben de taki sowan 8000 sma ben libi na tapu na èilanti. Na ini a ten disi, den sma di e libi drape, no e doro 40 sma srefi. A gersi leki Gavdos tan leki fa a ben de na ini owruten. Oliboto nanga sipi di e tyari bigi lai e pasa na èilanti nofo tron. Toku a no de so makriki fu feni wan boto di e komoto na Kreita fu go na a èilanti disi èn a e pasa furu leisi taki boto e kon lati noso taki den no e kon srefisrefi moro fu di a weer takru.

Wi ben musu fu kon na Gavdos fu tyari wan sani kon gi den sma so taki den kan firi prisiri èn den kan kisi deki-ati. A sani dati na a howpu fu abi wan moro betre tamara èn fu libi fu têgo sondro fu kon siki. A boto fu wi de fu go na a lanpe èn wi e angri fu go na syoro fu preiki a bun nyunsu disi.

Yu kan si na wi fesi taki a waka fu go na Gavdos no ben de wan switi wan, fu di a boto seki wi so wan fo nanga afu yuru langa. Ma baka te wi rostu pikinso èn wi dringi wan kopi kofi, wi e firi bun baka. Dan  wi e luku a Bijbel tori baka di e taki fu a waka di na apostel Paulus ben teki. Baka dati wi e begi. Now wi de srekasreka fu go du wi wroko.

Den sma fu na èilanti abi switifasi. Den meki wi kon na ini den oso èn den gi wi wan sani fu dringi. Boiti taki wi e preiki a bun nyunsu fu Bijbel gi den, wi e yepi den tu te dati de fanowdu. Na so wi e sori den fa wi breiti taki den sori wi switifasi. Wan fu wi na wan brada di sabi wroko nanga stroom. Di a taki nanga wan uma, a si wan broko masyin na ini a wenkri fu na uma disi èn a aksi en efu a kan meki a masyin gi en. A sani disi naki na ati fu na uma èn a teki den buku di wi gi en. A prèise wi tu taki wi ben e preiki. Wan tra uma di breiti nanga san wi e du, e taki: „A wroko fu unu na a wroko fu Gado èn no fu libisma. Disi de krin fu si, fu di unu kon fu preiki na a farawe èilanti disi.”

Den sma fu na èilanti lobi den buku di wi tyari kon gi den. Wan man e teki A Waktitoren nanga Ontwaakt! èn a wani moro buku so taki a kan leisi den na ini a kowru ten fu a yari. Wan tra man no wani buku gi ensrefi nomo, ma a e aksi wi moro fu poti dati na ini a wenkri fu en so taki den sma di e kon bai sani drape kan leisi den. A e gi wi en adres fu seni den tijdschrift kon gi en ibri mun. Te wi e sori wan osofamiri taki Bijbel e taki fu a pikin èilanti fu den, dan dati e naki den ati. Den e prisiri tu fu teki den tijdschrift fu wi.

Aladi a e gi wi deki-ati fu si taki someni sma fu Gavdos wani arki, toku sonwan fu wi e memre wan tu sari sani di pasa dyaso. Krosibei fu Sarakíniko Bay, yu abi wan oso pe strafuman ben tan di no ben wani horibaka gi a tiri fu a kondre. Baka 1930 den seni Emmanuel Lionoudakis, wan Kotoigi fu Yehovah, kon dyaso leki strafuman fu di a ben preiki a bun nyunsu. * Na a ten dati, sma ben taki fu Gavdos taki a ben de „wan drei èilanti pe soso ogri kruktutere ben man libi. A gron fu na èilanti ben drei sote taki furu sma drape dede fu angri noso fu di den siki èn den no ben man feni den sani di den ben abi fanowdu fu tan na libi. Dati meki sma kari en na èilanti fu dede.” Lionoudakis, di ben de a wan-enkri Kotoigi drape, ben fanga fisi fu nyan, aladi a ben e preiki tu gi den tra strafuman. Te Brada Lionoudakis en umapikin, a masra fu en umapikin èn en granpikin e si a presi pe a ben tan sowan 70 yari pasa, a e naki den ati. Na eksempre fu en e gi wi deki-ati fu tan dini Gado èn fu tan du a preikiwroko fayafaya.

Gavdos no ben de wan switi presi gi den sma di ben kon dyaso leki strafuman. Ma gi wi a ben de wan switi presi fu di a heri satra nanga sonde wi preiki na ala sei fu na èilanti èn wi libi 46 tijdschrift nanga neigi brochure gi den sma drape di abi switifasi. Wi e angri fu si den nyun mati fu wi baka.

Fosi yu denki, a ten doro taki wi musu gowe. Ma disi leisi tu a weer no moi èn te wi musu lusu feifi yuru bakadina, wi no man. Na mindrineti wi e go na ini a boto èn wi e sreka wisrefi gi wan waka di no o de makriki. Te fu kaba wi e lusu dri yuru mamanten èn baka te a krasi se seki a boto sowan feifi yuru langa, wi e doro na Kreita. Te wi komoto na ini a boto, wi weri èn wi e degedege fu di wi futu swaki. Ma wi breiti taki wi ben man fruteri sma na a èilanti Gavdos san na a nen fu Yehovah (Yesaya 42:12). A heri grupu e agri taki a ben bun taki wi du a sani disi. Heri esi wi frigiti den problema di miti wi, ma wi de seiker taki noiti moro wi o frigiti a waka disi.