BANYALANI
4: Ho Tshwarela
HO BOLELANG?
Ho tshwarela ho bolela hore o lebala ka ntho e o kgopisitseng ebile ha o tshware motho ya o kgopisitseng ka pelo. Ho tshwarela ha ho bolele hore o nyenyefatsa phoso kapa o iphapanyetsa yona.
MOLAOMOTHEO WA BIBELE: “Tswelang pele le mamellana le ho tshwarelana ka bolokolohi haeba le ha e le mang a ena le sesosa sa pelaelo kgahlanong le e mong.”—Bakolose 3:13.
“Ha o rata motho ha o amehe ka diphoso tsa hae, ho ena le hoo, o ameha ka dintho tse ntle tseo a lekang ho di etsa.”—Aaron.
KE HOBANENG HA SEE E LE SA BOHLOKWA?
Haeba o tshwara motho ka pelo o ka lemala mmeleng le maikutlong, o ka boela wa senya le lenyalo la hao.
“Ka nako e nngwe monna wa ka o ile a kopa tshwarelo ka mora hore a etse ntho e neng e nkutlwisitse bohloko haholo. Ho ne ho le thata ho re ke mo tshwarele. Ke ile ka qetella ke mo tshwaretse, le hoja ke itshola hore e be ke nkile nako pele ke etsa seo. Taba ena e ile ya baka dikgohlano ho sa hlokahale.”—Julia.
SEO O KA SE ETSANG
ITLHAHLOBE
Nakong e tlang ha o utlwisitswe bohloko ke ntho eo molekane wa hao a e buileng kapa a e entseng, ipotse:
-
‘Na ke sefela pelwana?’
-
‘Na o nkutlwisitse bohloko hoo ke hlokang hore a tlo kopa tshwarelo kapa ke ntho eo nka lebalang ka yona?’
BUISANA LE MOLEKANE WA HAO
-
Re nka nako e kae pele re tshwarelana?
-
Re ka etsang e le hore re tshwarelane kapele?
DINTHO TSE KA O THUSANG
-
O se ke wa nahanela molekane wa hao dintho tse mpe hobane feela a entse phoso.
-
Leka ho tshwarela molekane wa hao mme o hopole hore “kaofela re kgoptjwa hangata.”—Jakobo 3:2.
“Ho bonolo ho tshwarelana ha phoso e le ya lona le le babedi empa ha ho bonahala e le ya a le mong, ho thatanyana. Ho tshwarela ho hloka boikokobetso.”—Kimberly.
MOLAOMOTHEO WA BIBELE: “Lokisa ditaba kapele.”—Matheu 5:25.
Haeba o tshwara motho ka pelo o ka lemala mmeleng le maikutlong, o ka boela wa senya le lenyalo la hao
