ናይ መን ጸሎት ዚምልስ ይመስለካ፧

• ናይ ኵሉ

• ናይ ገሊኦም

• ናይ ዋላ ሓደ

መጽሓፍ ቅዱስ እንታይ ይብል፧

“የሆዋ . . . ንዅሎም እቶም ብሓቂ ዚጽውዕዎ ቐረባኦም እዩ።”—መዝሙር 145:18።

ካብ መጽሓፍ ቅዱስ እንታይ ተወሳኺ ነገር ንምሃር፧

• ኣምላኽ ንጸሎት እቶም ኣንጻሩ ዚዓልዉ ሰባት ኣይሰምዖን እዩ። (ኢሳይያስ 1:15) ኰይኑ ግና፡ መገድታቶም ብምቕያር፡ ምስኡ ‘ነገሮም ኬቕንዑ’ ይኽእሉ እዮም።—ኢሳይያስ 1:18።

• ኣምላኽ ንጸሎት ኪምልሶ እንተ ዀይኑ፡ እቲ ጸሎት ምስቲ ኣብ መጽሓፍ ቅዱስ ዚርከብ፡ ኣምላኽ ከነማልኦ ዚሓትተና ብቕዓታት ዚሰማማዕ ኪኸውን ኣለዎ።—1 ዮሃንስ 5:14።

ገሊኦም ሰባት ኪጽልዩ ኸለዉ ዅሉ ግዜ ኺምብርከኹ፡ ርእሶም ኬድንኑ ወይ ኣእዳዎም ብሓደ ኼጣምሩ ዘለዎም ኰይኑ ይስምዖም። ንስኻኸ እንታይ ይመስለካ፧

መጽሓፍ ቅዱስ እንታይ ይብል፧

ኣምላኽ ነቲ ኣገልገልቱ ‘ተቐሚጦም’ ወይ “ደው ኢሎም” ወይ ‘ተደፊኦም’ ወይ ከኣ ‘ተምበርኪኾም’ ዘቕረብዎ ጸሎት ተቐቢልዎ እዩ። (1 ዜና መዋእል 17:16፣ 2 ዜና መዋእል 30:27፣ እዝራ 10:1፣ ግብሪ ሃዋርያት 9:40) ስለዚ እምበኣር፡ ክንጽሊ ኸለና ፍሉይ ኣካላዊ ኣቃውማ ኺህልወና ኣይሓትትን እዩ።

ካብ መጽሓፍ ቅዱስ እንታይ ተወሳኺ ነገር ንምሃር፧

• ኣምላኽ ንትሑታት ይሰምዖም እዩ።—መዝሙር 138:6።

• ብዝዀነ ይኹን ቋንቋ ወይ ብልብኻ ኽትጽሊ ትኽእል ኢኻ።—2 ዜና መዋእል 6:32, 33፣ ነህምያ 2:1-6።