ሕቶታት ኣንበብትና፧

ባህርያዊ ሓደጋታት ካብ ኣምላኽ ዚወርድ መቕጻዕቲ ድዩ፧

ኣምላኽ ንንጹሃት ሰባት ባህርያዊ ሓደጋታት ብምውራድ ኣይቐጽዕን እዩ። ከምኡ ገይሩ ኣይፈልጥን: ኣይኪገብርን ድማ እዩ። ስለምንታይ፧ ምኽንያቱ: መጽሓፍ ቅዱስ ኣብ 1 ዮሃንስ 4:8 “ኣምላኽ ፍቕሪ እዩ” ይብል።

ምንጪ ዅሉ እቲ ኣምላኽ ዚገብሮ ነገር ፍቕሪ እዩ። ፍቕሪ: ንጹሃት ሰባት ከም ዚጕድኡ ኣይትገብርን እያ። ከመይሲ: መጽሓፍ ቅዱስ: “ፍቕሪ ንብጻያ እከይ ኣይትገብሮን” እዩ ዚብል። (ሮሜ 13:10) ኣብ እዮብ 34:12 እውን “ብርግጽ: ኣምላኽ ዓመጻ ኣይገብርን” ዚብል ሓሳብ ነንብብ።

ሓቂ እዩ: መጽሓፍ ቅዱስ ኣብ ግዜና ኸም “ምንቅጥቃጥ ምድሪ” ዝኣመሰለ ሓደጋታት ከም ዚኸውን ተነቢዩ እዩ። (ሉቃስ 21:11) እንተ ዀነ ግን: ልክዕ ከምቲ ሓደ ብዛዕባ ዅነታት ኣየር ዚንበ ሰብ ብርቱዕ ህቦብላ ኸም ዚኸውን ምንባዩ ንዚመጽእ ጉድኣት ተሓታቲ ዘይከውን: የሆዋ ድማ ብዛዕባ እቲ ብምኽንያት ሓደጋታት ዚመጸ ዕንወት ተሓታቲ ኣይኰነን። ኣምላኽ በቲ ኣብ ደቂ ሰብ ዚወርድ ባህርያዊ ሓደጋታት ተሓታቲ እንተ ዘይኰይኑ: መን ደኣ እዩ ጠንቂ እዚ ሽግር፧

መጽሓፍ ቅዱስ: “ብዘላ ዓለምውን በቲ እኩይ:” ማለት ብሰይጣን ድያብሎስ ከም እተታሕዘት ይገልጽ። (1 ዮሃንስ 5:19) ሰይጣን ኣብ መጀመርታ ደቂ ሰብ ካብ ዚዓሉ ኣትሒዙ ኽሳዕ እዚ ግዜና ቐታሊ ነፍሲ እዩ። (ዮሃንስ 8:44) ንህይወት ደቂ ሰብ ከም ዋጋ ዘይብሉን ከም ዘይረብሕን ገይሩ እዩ ዚርእዮ። ብናይ ውልቂ ጥቕሚ ተደሪኹ ኺገዝእ ባህጊ ስለ ዘለዎ: ናይ ስስዐ ባህርይ ኣብታ ንሱ ዝወደባ ዓለም ምፍጣሩ ኣየገርምን እዩ። እዛ ሕጂ ዘለናላ ዓለም እትስዕቦ ስርዓት ንምዝመዛ ዕሽሽ ስለ ዚብሎ: ንመሳኪን ዘበሉ ተፈጥሮኣዊ ይኹን ሰብ ዜምጽኦም ሓደጋታት ኣብ ዜጥቅዖ ሓደገኛ ቦታታት ንኺነብሩ የገድዶም ኣሎ። (ኤፌሶን 2:2፣ 1 ዮሃንስ 2:16) ስለዚ እምበኣር: ብገለ ኻብቲ ንብዙሓት ሰባት ግዳያት እቲ ሓደጋ ኪዀኑ ዝገበረ ፍጻመታት: ተሓተትቲ ኪዀኑ ዚግብኦም እዞም ስሱዓት ሰባት እዚኣቶም እዮም። (መክብብ 8:9) ብኸመይ፧

እቲ ብዙሕ ግዜ ዜጋጥም ሓደጋታት እንተ ወሓደ ብኸፊል ሰብ ዜምጽኦ እዩ። ንኣብነት: እቲ ንነበርቲ ኸተማ ኒው ኦርሊየንዝ ሕ.መ.ኣ. ህቦብላ ብዘምጽኦ ምጥልቕላቕ ወይ ነቲ ኣብቲ ኣኽራን ዝበዝሖ ጥቓ ገምገም ባሕሪ ቨነዝወላ ንዝነበረ ኣባይቲ: ጭቃ ሒዙ ብዝመጸ ማይ ከም ዚጠፍእ ዝገበረ ምኽንያት ክንርኢ ንኽእል ኢና። ኣብዝን ኣብ ካልእ ኣጋጣሚታትን: ከም ንፋስን ዝናብን ዝኣመሰለ ባህርያዊ ሓይልታት: ካብቲ ግቡእ ሓሊፉ ንኼዕኑ ዚገብሮ ነገር: እቲ ሰባት ብዛዕባ ኣከባቢ ዘለዎም ድንቍርና: ዝሰርሕዎ ሕሱር ምህንድስና: ዜውጽእዎ ሕማቕ መደብ: መጠንቀቕታታት ዘይምቕላቦም: ከምኡውን ቢሮክራሲያዊ ኣሰራርሓኦም እዩ።

እስከ እቲ ብግዜ መጽሓፍ ቅዱስ ዘጋጠመ ሓደ ሓደጋ ንርኣ። ብግዜ የሱስ ሓደ ግንቢ ብሃንደበት ተደርሚሱ ን18 ሰባት ቀተለ። (ሉቃስ 13:4) እዚ ሓደጋ እዚ ኼጋጥም ዝኸኣለ ምናልባት ብሰንኪ ስሕተት ሰባት ወይ “ጊዜን ኣጋጣምን” ብዜምጽኦ ወይ እውን ብኽልቲኡ ምኽንያት ዘጋጠመ ኪኸውን ኣለዎ እምበር: ኣምላኽ ብዝገበሮ ፍርዲ ግን ኣይኰነን።—መክብብ 9:11

ካብ ኣምላኽ ዝወረደ ሓደጋታት ኣጋጢሙ ይፈልጥዶ፧ እወ: ከምቲ ብተፈጥሮኣዊ ይኹን ብሰብ ዚመጽእ ሓደጋታት ግን ብኣልማማ ዜጥፍእ ዘይኰነስ: ነቶም ኪድሕኑ ዚግብኦም ፈልዩ ዝገደፈ: ብዕላማ እተገብረ ኣዝዩ ውሑዱ እዩ ነይሩ። ነዚ ኣብነት ኪዀነልና ዚኽእል ክልተ ፍጻመ: ብግዜ እቲ ኣበው ዝዀነ ኖህ ዝወረደ ማይ ኣይህን ብግዜ ሎጥ እተፈጸመ ጥፍኣት ሶዶምን ጎሞራን እዩ። (ዘፍጥረት 6:7-9, 13፣ 18:20-32፣ 19:24) ኣምላኽ ነቶም መገዶም ዘየዐርዩ እኩያት ኣህዛብ ንኺጠፍኡ: ነቶም ኣብ ቅድሚ ኣምላኽ ጻድቃን ዝነበሩ ሰባት ግና ንኺድሕኑ ፈረዶም።

ከም ሓቂ እንተ ዀይኑ: የሆዋ ኣምላኽ ንዅሉ ስቓይ መወዳእታ ንምግባርን ካብቲ ባህርያዊ ሓደጋታት ዘምጽኦ ሳዕቤን ንምንጋፍን ክእለት: ባህጊ: ከምኡውን ሓይሊ ኣለዎ። መዝሙር 72:12 ብዛዕባ እቲ ኣምላኽ ዝሸሞ ንጉስ ዝዀነ የሱስ ክርስቶስ “ነቲ ዚጠርዕ ድኻን ነቲ ረዳኢ ዜብሉ መስኪንን ኬናግፎ እዩ” ኢላ ትንበ።