Fiefia ʻi Hotau Māmani Fakaʻofoʻofá

KUO mātā ʻe he kau ʻasitalōnomá ʻa e ʻapi ʻo e faʻahinga ʻo e tangatá ko ha kiʻi valevaleʻi meʻa ʻi ha fuʻu ʻuniveesi lahi faufaua. ʻOku ʻikai ha toe feituʻu ia ʻi he ʻuniveesi fakamatelié kuo ʻi ai ha moʻui. Ko e palanite pē ko Māmaní ʻoku ʻi ai tonu ʻa e ngaahi tuʻunga feʻungamālié.

ʻIkai ngata aí, ʻoku lava ke tau fiefia ʻi he moʻui he foʻi kolope fakaʻofoʻofa ko ení. He meʻa fakafiemālie moʻoni ia ke ongoʻi māfana ʻi he laʻaá ʻi ha ʻaho momoko! Ko hai ia ʻia kitautolu ʻoku ʻikai ke maongo kiate ia ʻa e fakaholomamata ʻo e hopo pe ko e tō ʻa e laʻaá? Ko e moʻoni, ko hotau laʻaá ʻokú ne fai ʻa e meʻa lahi ange ia ʻi heʻene ʻai pē ke tau ongoʻi fiemālié. ʻOku mātuʻaki fiemaʻu ia ki heʻetau moʻuí tonu.

ʻI he ngaahi taʻu taʻefaʻalaua ʻe laui miliona, kuo hanga ai ʻe he ivi fakakalāvite ʻo e laʻaá ʻo tauhi maʻu ʻa e māmaní mo e ngaahi palanite kehé ʻi honau viloʻangá. Pea hangē ko ia ʻoku ako ʻe he fānaú ʻi he ʻapiakó, ko e sisitemi solá kotoa ʻoku vilo takai ia ʻi hono viloʻangá ʻi he uhouhonga ʻo hotau kaniva ko e Milky Way. Ka ʻi hotau kanivá ko e laʻaá ko e taha pē ia ʻo e ngaahi fetuʻu laka hake ʻi he 100 pilioná ʻoku nau vilo takai pehē fakataha.

Ko e kaniva Milky Way ʻoku pukepuke ia ʻe he kalāvité ʻi ha pupunga kaniva ʻe 35 nai. Ko e ngaahi pupunga lalahi angé ʻoku ʻi ai ʻa e ngaahi kaniva ʻe laui afe. ʻOku ngalingali ko hotau sisitemi solá ʻe ʻikai ke kei tauhi maʻu ai pē ʻene viló kapau naʻe tuʻu ʻi ha pupunga kaniva lalahi ange mo tapupu ange. Kae hangē ko e tuʻunga ʻoku lolotonga ʻi aí, ko e ngaahi konga pē ʻe niʻihi ʻo e ʻunivēsí “ʻoku feʻungamālie ki he tuʻunga fihi ʻo e moʻuí ʻo hangē ko hotau kanivá,” ko e lau ia ʻa Guillermo Gonzalex mo Jay W. Richards ʻi heʻena tohi ko e Privileged Planet.

Ko e ʻi ai ko ia ʻa e moʻuí ʻi he foʻi palanite ko ení naʻe hoko fāinoa mai pē ia, ko e tupu mei ha “foʻi pā” fakafokifā ʻa ha meʻa? Pe ʻoku ʻi ai koā ha ʻuhinga maʻongoʻonga ange ki he moʻui ʻi he foʻi palanite fakaʻofoʻofa ko eni ko Māmaní?

Kuo fakamulitukuʻaki ʻe he kakai tokolahi ko hotau ʻapi fakaemāmaní naʻe tautefito hono palaní ke ne fakafaingamālieʻi ʻa e moʻuí. * ʻI ha ngaahi senituli he kuohilí, naʻe fakahanga ai ʻe ha tokotaha faʻu-maau Hepelū ʻa e tokangá ki he māmaní mo e ngaahi langí. Naʻá ne tohi: “Kau ka vakai ho ngaahi langi na, ko e ngaue ʻa ho louhiʻinima, ʻa e mahina mo e ngaahi fetuʻu, ʻa ia kuo ke fokotuʻu; ko e ha ʻa e tangata?” (Sāme 8:​3, 4) Naʻe tui ʻa e tokotaha faʻu-maau ko ení kuo pau pē ʻoku ʻi ai ha Tokotaha-Fakatupu. Ko ha fakamulituku ʻuhingamālie nai ia ʻi hotau kuonga ʻo e ʻilo fakasaienisí?

[Fakamatala ʻi lalo]

[Puha/Fakatātā ʻi he peesi 3]

“Mei ha foʻi mamaʻo, ʻoku ulo ngingila mai ʻa e foʻi Māmaní ʻo hangē ha foʻi siueli lanu pulū ʻi he fakapoʻuli ʻo e ʻataá,” ko e lau ia ʻa e Illustrated Science Encyclopedia—Amazing Planet Earth.

[Maʻuʻanga]

Kolope: U.S. Fish & Wildlife Service, Washington, D.C./NASA