Sena majwi aatobela atondezya mbomulimvwa zimwi ziindi?

 “Lyoonse ndilibuzya kuti: ‘Ino kuti . . . ?’ ‘Ino kuti twajanika muntenda yamootokala?’ ‘Ino kuti ndeke yesu yawa?’ Ndilalibilika azintu muntu uuli amaano nzyatakonzyi kulibilika kapati.”​—Charles.

 “Lyoonse ndilalibilika, mbuli kuti ndime kanyama kaitwa kuti hamster kazinguluka abusena bomwe, kakataunki kumbi. Ndilalijaya kubeleka, pele kunyina cizwidilila!”​—Anna.

 “Bantu nobandaambila kuti ndilaacoolwe kuti ndicili kucikolo, inga ndaamba kuti, ‘Tabazyi mbociminya cikolo!’”​—Daniel.

 “Ndilimvwa mbuli kuti lyoonse kuli cindilibilisya. Lyoonse ndiyeeya kujatikizya cintu citiicitike naa cintu ncondeelede kucita.”​—Laura.

 Masimpe ngakuti: Tupona muciindi Bbaibbele ncoliita kuti “ziindi zikatazya ncobeni.” (2 Timoteyo 3:1) Akaambo kaceeci, kulibilika kulakonzya kubajatikizya bakubusi mbubwenya mbokubajatikizya bapati.

 Bwiinguzi mbwakuti peepe. Mubwini, Bbaibbele lyaamba kuti cililuzi bantu kulibilika kutegwa bakkomanisye baabo mbobayanda.​—1 Bakorinto 7:​32-34; 2 Bakorinto 11:28.

 Alimwi buya, kwaamba masimpe​—kulibilika kulakonzya kukulwaizya kapati. Mucikozyanyo, amweezeezye kuti nsondo iiboola mulemba musunko kucikolo. Kulibilika kulakonzya kumukulwaizya kubala iino nsondo​—alimwi eeci inga camupa kupasa!

 Kulibilika alimwi inga kwamupa kupakamana kuntenda. Mukubusi wazina lyakuti Serena wakaamba kuti: “Ulakonzya kulibilika akaambo kakuti ulizyi kuti wabweza ntaamu mbyaabi alimwi akuti weelede kucinca kutegwa manjezeezya akkalikane.​—Amweezyanisye a Jakobo 5:14.

 Masimpe ngakuti: Kulibilika kulakonzya kubeleka kulindinywe​—lilikke kuti kumupa kucita zintu ziluzi.

 Pele mbuti kuti kulibilika kumupa kuciindizya kuyeeya zintu zitali kabotu?

 Mucikozyanyo: Richard, uujisi myaka iili 19 wakaamba kuti: “Mizeezo yangu taikkalikani ndatalika kuyeeya zintu ziindene-indene zikonzya kucitika akaambo kabukkale butali kabotu. Ndilabuyeeya bukkale oobo cakwiinduluka-induluka limwi mane ndatalika kulibilika kapati.”

 Bbaibbele lyaamba kuti “moyo uukkede upa buumi kumubili.” (Tusimpi 14:30) Kulubazu lumwi, kulibilika kulakonzya kupa kuti muntu katalimvwide kabotu, mbuli kuciswa mutwe, kuba acizuungwe, kuzembelwa alimwi akubalika moyo.

 Ncinzi ncomukonzya kucita ikuti kulibilika kumupa kutalimvwa kabotu muciindi cakubeleka kulindinywe?

•   Amuzyibe naa kulibilika kwanu kuleelela. “Kulibilika kujatikizya mikuli njomujisi ciliindene akuciindizya kulibilika. Cindiyeezya kaambyo kamwi kakuti, kulibilika kuli mbuli kulyuumbwa akampeelwa. Cimupa kubelesya nguzu pele taakwe nkomuya pe.”​—Katherine.

   Bbaibbele lyaamba kuti: “Nguni akati kanu kwiinda mukulibilika uukonzya kuyungizya buumi bwakwe naaceya?”​—Matayo 6:27.

   Eeci caamba kuti: Ccita kuti kulibilika kwamugwasya, buyo-buyo inga kwamuyungizyila buyo mapenzi​—naa inga kwamubeda penzi.

•   Amucite cintu comwe aciindi comwe. “Amuciyeeyele buyo, sena zintu nzyomulibilika sunu zinooyandika juunza? mumwezi uuboola? mumwaka uuboola? mumyaka yosanwe iili kumbele?”​—Anthony.

   Bbaibbele lyaamba kuti: “Mutanoolibiliki zyabuzuba butobela, nkaambo buzuba butobela bunoojisi zyakulibilika zyambubo. Buzuba bumwi abumwi bulijisi mapenzi aambubo aakkwene.”​—Matayo 6:34.

   Eeci caamba kuti: Tacigwasyi kapati kuyeeya mapenzi aajuunza​—amwi andiza aatakacitiki akucitika.

•   Mutanoolibiliki azintu nzyomutakonzyi kucinca. “Cintu cibotu ncomukonzya kucita nkulibambila bukkale bukonzya kucitika kusikila mpomugolela, pele mweelede kuzumina kuti zintu zimwi tamukonzyi kuzicinca.”​—Robert.

   Bbaibbele lyaamba kuti: “Talili lyoonse basilubilo nobazunda mukusiyana, . . . abalo aabo bajisi luzyibo talili lyoonse nobazwidilila, nkaambo boonse buyo balasikilwa ziindi zyamapenzi akucitikilwa zintu zitalangilwi.”​—Mukambausi 9:11.

   Eeci caamba kuti: Zimwi ziindi tamukonzyi kucinca bukkale bwanu, pele mulakonzya kucinca mbomubulanga.

•   Amubulange munzila yeelede bukkale bwanu. “Ndeelede kubumvwisya bukkale boonse akutabikkila maano kutuntu tusyoonto-syoonto. Ndeelede kusala zintu ziyandika kapati akubelesya nguzu zyangu kucita zintu eezyo.”​—Alexis.

   Bbaibbele lyaamba kuti: “Musinizye zintu ziyandika kapati.”​—Bafilipi 1:​10.

   Eeci caamba kuti: Bantu ibakulanga munzila yeelede kulibilika tabalangilwi kutyompwa kapati akaambo kankuko.

•   Amubandike amuntu uumwi. “Nindakali mugiledi 6, ndazwa kucikolo ndakali kuunka kuŋanda kandilibilikide kapati, kuyoowa zyabuzuba butobela. Bamaama abataata bakali kundiswiilila ndatalika kubaambila mbondilimvwa. Cakali kukkomanisya kuba ambabo. Ndakali kubasyoma alimwi akubandika ambabo cakulikwaya. Eeci cakali kundigwasya kutayoowa buzuba butobela.”​—Marilyn.

   Bbaibbele lyaamba kuti: “Zintu nzyalibilika muntu nzyezipa kuti moyo wakwe utyompwe, pele jwi libotu ndelipa kuti ukkomane.”​—Tusimpi 12:25.

   Eeci caamba kuti: Muzyali naa mweenzinyoko ulakonzya kumupa mizeezo iigwasya kujatikizya mbomukonzya kucesya kulibilika.

•   Amupaile. “Kupaila​—kucita oobo cakupozya kutegwa kandikonzya kulimvwa jwi lyangu​—kulandigwasya. Cilandigwasya kwaamba cintu cindilibilisya muciindi cakuciyeeya. Alimwi cindigwasya kuzyiba kuti Jehova mupati kwiinda kulibilika kwangu.”​—Laura.

   Bbaibbele lyaamba kuti: “Kamuwaala makatazyo aanu oonse kulinguwe [Leza], nkaambo ulamubikkila maano.”​—1 Petro 5:7.

   Eeci caamba kuti: Mupailo taili nzila njotukonzya kubelesya kumana mapenzi tolikke. Nkubandika kwini-kwini a Jehova Leza, walo uusyomezya kuti: “Utalibiliki pe, nkaambo ndime Leza wako. Ndilakuyumya, inzya ndilakugwasya.”​—Isaya 41:10.