KUFUMA pa 15 m’paka 18 Ogasiti, 1963, ŵapharazgi mahandiredi ghanandi na ŵalendo 122 ŵakufuma ku vyaru vyakuwaro ŵakawungana pamoza mu tawuni ya Bandung, ku West Java. Ŵakawungana kuti ŵapulikizge ungano wa mutu wakuti: “Makani Ghawemi Ghamuyirayira.” Kakaŵa kakwamba ku Indonesia kuti kuchitikire ungano wa mitundu yose.

Apo ŵabali ŵakanozgekeranga ungano uwu, pakaŵa masuzgo ghanyake. Malo agho ŵakanozga kuti ŵachitirepo ungano, ghakasintha maulendo ghatatu chifukwa cha vikondwelero vyakukumbukira zuŵa ilo charu cha indonesia chikamba kujilamulira. Apo ŵabali ŵakaŵa pafupi kuluta ku ungano, ndalama ya charu cha Indonesia yikakhira nkhongono. Ivi vikapangiska kuti mitengo ya mathirasipoti yikwere chomene. Kweni ŵabali ŵanyake ŵakasanga nthowa zinyake zakukafikira ku ungano uwu. Mwachiyelezgero, mubali munyake wakenda pasi mazuŵa 6 kuti wakafike ku ungano. Ŵabali ŵakukwana 70 ŵakufuma ku Sulawesi ŵakenda pa boti mazuŵa 5 kuti ŵakafike ku ungano uwu. Ŵanthu ŵakakhomana chomene mu boti ili ndipo zuŵa likaŵawotchanga.

Pa ungano uwu, ŵabali ŵa ku Indonesia ŵakakondwa chomene kukumana na ŵabali na ŵadumbu ŵakufuma ku vyaru vinyake. Ŵakakondwaso kuwonana na ŵabali ŵaŵiri ŵa mu Wupu Wakulongozga, mubali Frederick Franz na Grant Suiter. Mubali wakufuma ku charu chinyake wakati: “Ŵabali ŵakawonekanga kuti mbakukondwa chomene. Nyengo zose ŵakasekanga na kumwemwetera.”

Ŵanthu ŵakujumpha 750 ŵakiza pa ungano uwu ndipo ŵanthu ŵakukwana 34 ŵakabatizika. Ronald Jacka wakati: “Ŵanthu ŵanandi awo ŵakakhumbanga kusambira unenesko ŵakakoleska chifukwa cha kuwona unandi wa ŵanthu awo ŵakiza pa ungano uwu. Ŵabali ŵa mu charu cha Indonesia, ŵakaŵikapo mtima pa ntchito ya kupharazga.”