Kukumbukira Yesu Khristu
“Lutilirani kucita ici kuti munikumbukenge.”—LUKA 22:19.
Cifukwa ico ŵanji ŵakukondwelera Khisimasi.
Ŵanji ŵakuti “cifukwa cikuru ico ŵakukondwelera Khisimasi” nchakuti ŵakumbukire kubabika kwa Yesu.
Cifukwa wuli ŵakutondeka?
Sumu na mitheto yinandi ivyo vikuŵa pa Khisimasi vikukolerana viŵi yayi na kukumbukira kubabika kwa Yesu Khristu. Ŵanthu ŵanandi awo ŵakukondwelera Khisimasi ŵalije cipulikano mwa Yesu, nakuti ŵanji ŵakugomezga yayi kuti wakaŵako. Mu caru ca malonda ici, ŵanandi zuŵa la Khisimasi ŵakulizgora kuŵa lakucitira bizinesi m’malo mwa kukumbukira kubabika kwa Yesu.
Fundo za mu Baibolo izo zingawovwira
“Mwana wa munthu wakiza . . . kupeleka umoyo wake kuŵa ciwombolero ca ŵanandi.” (Mariko 10:45) Yesu wakayowoya mazgu agho ghali kukwambilira kwa nkhani iyi pa nyengo ya kukumbukira kubabika kwake yayi, kweni pa usiku wakuti macero wafwenge. Pa usiku uwu wakalongosora umo ŵanthu ŵangacitira pa kukumbukira nyifwa yake. Cifukwa wuli Yesu wakakhumbanga kuti ŵalondezgi ŵake ŵakumbukirenge nyifwa yake m’malo mwa kubabika kwake? Cifukwa nchakuti sembe yakuwombora ya Yesu yikupeleka mwaŵi wakuti ŵanthu ŵakupulikira ŵazakasange umoyo wamuyirayira. Baibolo likuti: “Malipiro agho kwananga kukupeleka ni nyifwa, kweni cawanangwa ico Ciuta wakupeleka mbumoyo wamuyirayira mwa Khristu Yesu Fumu yithu.” (Ŵaroma 6:23) Ntheura, caka cilicose ŵalondezgi ŵa Yesu Khristu ŵakukumbukira nyifwa yake. Ndipouli, ŵakumuwona nga ni bonda yayi, kweni nga ni “mponoski wa caru.”—Yohane 4:42.
“Khristu wakasuzgika cifukwa ca imwe, kumulekerani bambiro kuti mulondezgenge mendero ghake mwakugomezgeka.” (1 Petrosi 2:21) Kuti ticindike na kukumbukira Yesu, tikwenera kusambira ivyo wakacita pakuŵa munthu wakufikapo na wavinjeru. Tikweneraso kulanguruka pa umo Yesu wakalongolera lusungu, kuzika, na cikanga pakucita ico nchiwemi na kupenjerezga nthowa za umo tingacitira nga ndiyo.
“Ufumu wa caru wazgoka ufumu wa Fumu yithu na wa Khristu wake, ndipo iyo wawusenge nga ni themba muyirayira swii.” (Uvumbuzi 11:15) Para mukukumbukira Yesu Khristu, mukwenera kughanaghanira ivyo wakucita sono. Pasono Yesu ni Themba kucanya. Mazgu gha Ciuta ghakayowoyerathu vya iyo kuti: “Tiweruzge ŵakavu na urunji, tiŵadumulire makora ŵakujiyuyura mu caru.” (Yesaya 11:4) Kabonda kangacita vinthu ivi yayi, kweni Themba lankhongono.
