Pa upharazgi wake wa pa phiri, Yesu wakaphalira ŵasambiri ŵake kuti: “Ndimwe mcere wa caru capasi; kweni usange mcere wamara nkhongono yake, kasi nkhongono yake yiwelerengemo wuli? Uliso na nchito pa cinthu cilicose cara kweni ukuponyeka kuwaro kuti ukandike na ŵanthu.” (Mateyu 5:13) Mcere ukovwira kuti cinthu cileke kuvunda. Ntheura, apa Yesu wakwenera kuti wakang’anamuranga kuti ŵasambiri ŵake ŵakwenera kuvikilira ŵanji ku vinthu ivyo vingananga umoyo wawo wauzimu.

Pakuyowoyapo pa mazgu gha Yesu agha, buku linyake likuti: “Mcere wa ku Nyanja Yakufwa kanandi ukasazgikananga na vinthu vinyake, ntheura para mcere uwu wasongonoka, vinthu vinyake ivi ndivyo vikakhaliranga.” (The International Standard Bible Encyclopedia) Ipo nchakupulikikwa kuti Yesu wakayowoyanga za vyakukhalira ivi kuti viliso na “nchito pa cinthu cilicose cara” kweni vikuponyeka kuwaro. Buku ili likatiso: ‘Nangauli vinthu ivyo vikasazgikananga na mcere vikapangiskanga mcere wa ku Nyanja Yakufwa iyi kuŵa wapasi pakuyaniska na wa mu nyanja zinyake, kweni cikaŵanga cipusu kusora mcere uwu mumphepete mwa Nyanja ndipo ndiwo ŵakawugwiliskiranga nchito ku Palestina.’

Yesu wakayowoya ntharika ya mwanakazi munyake uyo wakaŵa na madirakima khumi ndipo limoza likati lasoŵapo, wakatora nyali na kuphyera nyumba yose mpaka wakalisanga. (Luka 15:8-10) Mu nyengo ya Yesu dirakima likayananga waka na malipiro gha zuŵa limoza, ntheura ndalama iyo Yesu wakazunura mu ntharika iyi yikaŵa yikuru. Ndipouli, ivyo wakayowoya vikakhwaskangaso vingaŵa vinyake.

Vyakulembeka vinyake vikulongora kuti ŵanakazi ŵakagwiliskirangaso nchito ndalama izi pakutoweskera vinthu vya mu nyumba. Panji lekani Yesu wakazunura ndalama za njawara izo ŵanakazi ŵakazigwiliskirangaso nchito pa vinthu vyakutoweskera mu nyumba. Kwali ndimo vikaŵira panji yayi, kweni mwanakazi wakwenera kuti wakenjerwa comene cifukwa ca dirakima ilo likasoŵa ndipo wakaŵikapo mtima kuti walisange.

Nyumba za ŵanthu ŵakavu mu nyengo ya Yesu, zikaŵanga na ungweru kweniso cithukivu cicoko mukati. Nyumba zantheura mukakhalanga ŵanthu ŵacoko waka panji vyokoro. Pasi ŵakayalangapo mapekesi panji tumakuni twakomira twakupambanapambana. Usange ndalama ya njawara yawa pa malo ghantheura, cikaŵanga cakusuzga kuyisanga mwaluŵiro. Ntheura munthu munyake wakati: “Para kanthu kacoko nga ni ndalama ya njawara kawa pasi, nthowa yekha yakovwira kuti wayisange, yikaŵanga kubuska nyali na kuphyera nyumba yose.