PARA mupapi waleka kusopa Yehova uyo ni Ciuta waunenesko, umoyo ungaŵa wakusuzga comene ku mwana. Tiyeni tidumbiskane nkhani ya Yotamu. Tisambirenge za masuzgo agho Yotamu wakakumana nagho mu mbumba yakwake apo wakakuranga.

Yotamu awiske zina lawo likaŵa Uziya ndipo ŵakaŵa themba la Yuda. Ŵakaŵa ŵankhongono comene mu caru. Ŵakaŵa themba liwemi kwa nyengo yitali, nanga ni apo Yotamu wakaŵa kuti wandababike. Kweni apo Yotamu wakaŵa wacali mucoko, Uziya wakamba kujikuzga ndipo wakaswa Dango la Ciuta. Ntheura, Ciuta wakamutimba na nthenda yakofya comene ya vyoni. Kasi ukumanya ico Yotamu wakacita?— *

Yotamu wakalutilira kuteŵetera Yehova. Panji anyina, a Jerusha, ndiwo ŵakamovwira kuti wacite nthena. Ndipouli cikwenera kuti cikaŵa cakusuzga kuti Yotamu walutilire kugomezgeka pamanyuma pakuti adada ŵake ŵaleka kuteŵetera Yehova.

Kasi iwe ungacita wuli usange adada ŵako na amama ŵako ŵaleka kusopa Yehova? Cingakuŵira cakusuzga asi nthena?— Kweni nchiheni yayi kughanaghanira ivyo ungacita usange ŵapapi ŵako ŵangacita nthena. Para tingaŵazga ivyo Davide wakalemba, tiwonenge nkhani yakuyana waka.

Davide awiske ŵakaŵa a Jese, ndipo ŵakaŵa munthu muwemi. Ŵakateŵeteranga Yehova ndipo Davide wakwenera kuti wakaŵatemwanga comene. Kweni Davide wakatemwanga comene  Yehova kuluska adada ŵake a Jese. Tiye tiwone ico cikutovwira kumanya fundo iyi.

Jura Baibolo pa Salmo 27:10. Davide wakalemba kuti: “Pakuti ŵadada na ŵamama nanga ŵandiside, kweni Yehova tiwanditorenge.” Ghanaghanira fundo iyi: Apa Baibolo likung’anamura kuti ŵapapi ŵa Davide ŵalekenge kuteŵetera Yehova, mphanyi iyo wakalutilira kumuteŵetera.

Iwe ke? Kasi ungalutilira kuteŵetera Yehova nanga nipara ŵapapi ŵako ŵaleka?— Ili ni fumbo liwemi ilo ukwenera kujifumba. Cifukwa cikuru ico ukwenera kucitira nthena cagona pa dango lakuzirwa comene la mu Baibolo. Dango ili ndakuti: “Utemwenge Yehova Ciuta wako na mtima wako wose na umoyo wako wose na maghanoghano ghako ghose.”

Dango ili likung’anamura kuti tikwenera kugomezgeka kwa Yehova nanga mpha nyengo yakusuzga. Kasi ukughanaghana kuti ninjani uyo wakukhumba kuti tileke kuteŵetera Yehova?— Mulwani wa Ciuta Satana Dyabulosi. Yesu wakati Satana uyu ni “muwusi wa caru ici.” Baibolo nalo likuti Satana ni “ciuta wa mgonezi uno.” Kasi tikwenera kumuwopa Satana?—

Tikwenera kumuwopa yayi. M’malo mwake, tikwenera kukumbuka kuti Yehova ngwankhongono comene kuluska Satana. Yehova wativikilirenge usange tikumugomezga. Ŵazga mu Baibolo lako umo Yehova wakavikililira Davide kwa Goliyati munthu wakofya comene. Nawe Yehova wangakuvikilira usange ungalutilira kugomezgeka kwa iyo.