Yesaia 33:1-24
33 Due! Ɔsɛefo a wɔnsɛee wo;+Wo a wutwa nkontompo a wontwaa wo nkontompo!
Sɛ wosɛe ade wie a, wo nso wɔbɛsɛe wo.+
Sɛ wutwa nkontompo wie a, wo nso wobetwa wo nkontompo.
2 O Yehowa, dom yɛn.+
Yɛn ani da wo so.
Bɛyɛ yɛn basa*+ anɔpa biara,Bɛyɛ yɛn nkwagye wɔ amanehunu bere mu.+
3 Wobobom a, aman guan,
Wosɔre gyina a, amanaman hwete.+
4 Sɛnea mmebɛw boaboa wɔn ho ano no, saa ara na wɔbɛboaboa w’asade ano;Nnipa betu agu so te sɛ ntutummɛ.
5 Wɔbɛma Yehowa so,Efisɛ ɔte soro tɔnn.
Ɔde atɛntrenee ne trenee bɛhyɛ Sion ma.
6 Ɔno na ɔma w’abrabɔ* si yiye.Nkwagye+ ne nyansa ne nimdeɛ mmoroso, ne Yehowa suro;+Eyi ne n’agyapade.
7 Hwɛ! Wɔn akatakyi su wɔ mmɔnten so;Asomdwoe abɔfo su yayaayaw.
8 Akwantempɔn ada mpan;Obiara nni hɔ a ɔfa akwan no so.
Wabu apam no so;*Wapo nkurow no;Ommu onipa dasani biara.+
9 Asaase no redi awerɛhow,* na abotow.
Lebanon ani awu;*+ aporɔw.
Saron ayɛ sɛ anwea pradadaa,Na Basan ne Karmel nhaban apo.+
10 Yehowa se: “Afei mɛsɔre,Afei mɛhyɛ me ho anuonyam;+Afei mɛyɛ me ho kɛse.
11 Munyinsɛn sare a aguan, na mowo wura.
Mo ara mo honhom bɛhyew mo te sɛ ogya.+
12 Nnipa bɛyɛ sɛ akado a wɔahyew,
Na wɔde ogya bɛto mu+ te sɛ nsɔe a wɔatwa agu fam.
13 Mo a mowɔ akyirikyiri, muntie nea mɛyɛ!
Mo a mobɛn, munnye m’ahoɔden ntom!
14 Abɔnefo a wɔwɔ Sion abɔ hu;+Awaefo ho popo biribiri:
‘Yɛn mu hena na obetumi atena baabi a ogyaframa kɛse wɔ?+
Yɛn mu hena na obetumi ne ogya a ɛredɛw daa atena?’
15 Nea ɔnantew trenee kwan so daa,+Na ɔka nea ɛteɛ,+Nea okyi nsisi ne apoobɔ sika,Nea ne nsa kyi adanmude* na onso mu,+Nea osisiw n’aso na ante mogyahwiegu ho asɛm,Na ɔkata n’ani na anhu bɔne.
16 Ɔno na ɔbɛtena mmepɔw so wɔ sorosoro;Ne guankɔbea a ɛyɛ den* bɛyɛ ɔbotan aban a ɛhɔ kɔ yɛ den.Wɔde n’aduan bɛma no,Na ne nsu rensa da.”+
17 W’ani behu ɔhene bi wɔ n’anuonyam mu;Ebehu asaase bi wɔ akyirikyiri.
18 Wobɛkae ade a ɛyɛ hu no wɔ wo koma mu:*
“Ɔkyerɛwfo no wɔ he?
Nea ɔkari tow no wɔ he?+
Nea ɔkan abantenten no wɔ he?”
19 Worenhu ahantanfo bio,Ɔman a wɔn kasa mu dɔ a wonte,Ɔman a wɔka ahɔho kasa a wonte ase.+
20 Hwɛ Sion, yɛn afahyɛ kurow no!+
W’ani behu Yerusalem, tenabea a ɛhɔ yɛ komm,Ntamadan a obiara rentu no.+
Nnua a wɔde abobom atim fam no, wɔrentutu da,Na ne hama biara mu rentew.
21 Na Yehowa, Otumfo no,Bɛbɔ yɛn ho ban wɔ hɔ te sɛ baabi a nsubɔnten ne nsuka akɛse wɔ.Hyɛn a wɔde kɔ ɔko biara remfa mu,Na ahyɛn akɛse biara rentwam wɔ hɔ.
22 Efisɛ Yehowa ne yɛn Temmufo,+Yehowa ne yɛn Mmarahyɛfo,+Yehowa ne yɛn Hene;+Ɔno na obegye yɛn nkwa.+
23 Wo nhama mu begow;Ɛrentumi nsuso hyɛn dua no mu denneennen; na ɛrentumi ntrɛw hyɛn ntama mu.
Saa bere no, wobenya atamfo nneɛma pii akyɛ afa;Apakye mpo bɛfom nneɛma bebree.+
24 Na ɔmanfo no mu biara renka sɛ: “Meyare.”+
Wɔde nnipa a wɔte asaase no so bɔne bɛkyɛ wɔn.+
Ase Hɔ Nsɛm
^ Anaa “ahoɔden.”
^ Nt., “wo nna.”
^ Kyerɛ sɛ, ɔtamfo no abu apam no so.
^ Ebetumi nso akyerɛ, “Asaase no mu nsu atwe.”
^ Anaa “Wɔabrɛ Lebanon ase.”
^ Anaa “braeb.”
^ Anaa “abantenten.”
^ Anaa “Wubedwinnwen ade a ɛyɛ hu no ho wɔ wo koma mu.”
