Tei faaroo-pinepine-hia: E ore te mau Ite no Iehova e faatupu i te Noela no te mea aita ratou e tiaturi ra ia Iesu.

 Te mea mau: Ei Kerisetiano, te tiaturi nei matou e o Iesu Mesia anaˈe te faaora i te taata.—Ohipa 4:12.

 Tei faaroo-pinepine-hia: Ma te haapii eiaha e faatupu i te Noela, te faataa nei outou i te mau utuafare.

 Te mea mau: Mea faufaa iho â no matou te utuafare, te faaohipa nei ïa matou i te Bibilia ia piri atu â te mau mero utuafare.

 Tei faaroo-pinepine-hia: I Noela hoi e itehia ˈi te aau horoa noa, te hau i nia i te fenua e te hamani maitai i te taata.

 Te mea mau: I te mau mahana atoa matou e tutava ˈi i te faaite i te aau horoa e te faatupu i te hau. (Maseli 11:25; Roma 12:18) Ei hioraa, te pee nei matou i ta Iesu i faaue ia putuputu e ia poro matou: “Mea horoa-noa-hia mai ta outou, a horoa noa atoa ïa.” (Mataio 10:8) Hau atu â, te poro ra matou e o te Faatereraa arii a te Atua anaˈe te ravea e tupu ai te hau i te fenua nei.—Mataio 10:7.

•   Ua faaue Iesu ia haamanaˈohia to ˈna poheraa eiaha râ to ˈna fanauraa.—Luka 22:19, 20.

•   Aita ta Iesu mau aposetolo e te mau Kerisetiano matamua i faatupu i te Noela. Ia au i te hoê buka ite rahi (New Catholic Encyclopedia), “ua haamauhia te Oroa fanauraa o Iesu i te area matahiti 243 [o to tatou tau],” hau atu ïa i te hoê senekele i muri aˈe i te poheraa o te aposetolo hopea.

•   Aita e haapapuraa e ua fanauhia Iesu i te 25 no Titema; aita te Bibilia e faaite ra i to ˈna mahana fanauraa.

•   I te mea e no ǒ mai te Noela i te taˈere e peu a te mau nunaa, no matou, aita te Atua e farii ra i te reira.—Korinetia 2, 6:17.

 E faatupu noa iho â e rave rahi i te Noela noa ˈtu e ua ite ratou no ǒ mai te reira i te mau nunaa etene e aita e tuea ra i te Bibilia. E na ô paha ïa ratou: “No te aha te mau Ite no Iehova e ore ai e rave mai te rahiraa? Eaha hoi te fifi?”

 Te faaitoito mai ra te Bibilia ia feruri maite “ma to outou feruriraa atoa.” (Roma 12:1, 2) Te haapii mai ra ia tatou ia haafaufaa i te parau mau. (Ioane 4:23, 24) No matou, mea faufaa iho â te manaˈo o vetahi ê. O te mau faaueraa Bibilia râ ta matou e haapao noa ˈtu e e au-ore-hia mai.

 Noa ˈtu e aita matou e faatupu ra i te Noela, e tiamâraa to te taata ia maiti e na reira anei o ˈna aore ra aita. Na ˈna iho â e rave i te faaotiraa. E faatura anaˈe atu ïa.