MEA rahi te taata e manaˈo ra e e topa iho â tatou i roto i te ohipa piˈo e eita roa ˈtu te reira e ore. E o oe? Mai te peu e e, e ere i te mea maere. I te roaraa o te tuatapaparaa, ua tamata te taata i te mau huru faatereraa atoa. Aita roa ˈtu râ ratou i manuïa i te faaore roa i te ohipa piˈo. E nehenehe anei e tiaturi e ora i te hoê tau e pee ai te taata atoa i te hoê haerea tia?

Ma te oaoa, te parau nei te Bibilia e e! Te faaite maira te reira e fatata te Atua i te faaore roa i te ohipa piˈo i te fenua nei. E nafea? Maoti to ˈna Basileia, te hoê faatereraa i te raˈi, e taui roa ˈi te fenua. Ua haapii Iesu i ta ˈna mau pǐpǐ ia pure no tera Basileia. I roto i tei parau-pinepine-hia Te pure a te Fatu, ua na ô Iesu: “Ia tae to oe ra hau. Ia haapaohia to oe hinaaro i te fenua nei.”—Mataio 6:10.

No nia i te Arii o tera Basileia ra o Iesu Mesia, te tohu nei te Bibilia: “O tei veve ra e ua tiaoro maira, na ˈna ïa e faaora; e tei ati ra e aita o ˈna e tauturu. E faaherehere oia i tei paruparu ra e tei veve, e faaora hoi oia i te feia taoˈa ore ra. E faaora oia ia ratou i te haavare e te rave ino.” (Salamo 72:12-14) A tapao na e te aroha nei Iesu i te feia e mauiui ra no te ohipa piˈo e e faatitiaifaro oia i te reira! E ere anei te reira i te mea tamahanahana?

I raro aˈe i te faatereraa a tera Arii aumauiui e te puai, e faaore roa te Basileia o te Atua i te ohipa piˈo i te fenua nei. E nafea? Ma te faaore roa i na tumu e toru o te ohipa piˈo.

Te aro nei tatou paatoa i te mau hinaaro tia ore e haa ˈi tatou ia au i to tatou mau hinaaro miimii. (Roma 7:21-23) Inaha, e taata maitai â te hinaaro nei e rave i te mea tia. Maoti te pohe o Iesu Mesia, ua horoa te Atua i te hoê ravea e faaore ai oia i te mau hara. * (Ioane 1, 1:7, 9) Ia au i te Ioane 3:16, e fanaˈo te taata o te faatupu i te faaroo i tera tusia i te mau haamaitairaa o te faaiteraa rahi roa ˈˈe o te here o te Atua: “I aroha mai te Atua i to te ao, e ua tae roa i te horoa mai i ta ˈna Tamaiti fanau tahi, ia ore ia pohe te faaroo ia ˈna ra, ia roaa râ te ora mure ore.”

 No te feia taiva ore, e rave te Atua i te tahi mea faahiahia mau. I te ao apî e fatata maira, e faaore roa o ˈna i te mau faahopearaa atoa o te hara ma te aratai mǎrû i te huitaata i te tia-roa-raa e i te hoê tiaraa tia i to ˈna aro. (Isaia 26:9; Petero 2, 3:13) Eita te hara e turai faahou i te tahi noa ˈˈe taata ia pee i te haerea piˈo. Ia faatere mai te Basileia o te Atua, eita te huitaata taiva ore e riro faahou ei ‘tîtî na te ino.’—Petero 2, 2:19.

Te mea peapea, mea rahi te taata e haamauiui nei ia vetahi ê ma te opua. Te taviri nei ratou i te feia riirii e te veve e te turai nei ia vetahi atu ia na reira atoa. Te faaara ra te Bibilia i tera mau taata: “E faarue te paieti ore i to ˈna haerea, e te taata parau-tia ore i to ˈna manaˈo.” Te fafau nei te Bibilia e e faaore rahi te Atua i te hara a te feia piˈo tatarahapa.—Isaia 55:7.

Tera râ, aita ˈtu ta te Atua e ravea e haamou i te feia o te patoi etaeta ra i te taui. Maoti te Basileia o te Atua e tupu ai teie parau fafau Bibilia: “E tiai atu ia Iehova, a haapao maite ai i to ˈna eˈa . . . ; e ite oe i te pohe o te feia paieti ore.” * (Salamo 37:34) I te mea e ua haamouhia te feia iino, eita te mau tavini taiva ore a te Atua e mauiui faahou no te ohipa piˈo.

I rotopu i tei rave i te hara, o Satani te Diabolo te mea etaeta roa ˈˈe. Auê tatou i te mauruuru e ua fatata Iehova i te tapea ia ˈna! Eita ïa o ˈna e turai faahou i te taata i roto i te ino. Ia oti, e haamou roa te Atua ia Satani. E ore roa tera varua ino mau e turai faahou i te taata ia pee i te hoê haerea piˈo.

Parau mau, e au ra e e moemoeâ te manaˈo e faaore te Atua i te mau tumu atoa o te ohipa piˈo. Te uiui nei paha oe, ‘E nehenehe mau anei ta te Atua e taui i tera mau mea? Mai te peu e e, no te aha o ˈna i ore ai i na reira ˈtura?’ E uiraa maitai te reira e te horoa nei te Bibilia i te mau pahonoraa tano. * A hiˈopoa roa ˈtu na i ta te Bibilia e haapii ra no nia i te a muri aˈe e fatata maira i reira e ore roa ˈi te ohipa piˈo atoa.