Xoossay Ubbasankka Deˈii?

KAASSA

Geeshsha Maxaafay yootiyoobaa

Xoossay ubbabaakka beˈana danddayees; qassi awankka gidin ba koyidobaa oottana danddayees. (Leemiso 15:3; Ibraawe 4:13) SHin Geeshsha Maxaafay Xoossay ubbasan, qassi ubbabaa bolli deˈees giidi tamaarissenna. Geeshsha Maxaafay awu qottay deˈiyoogaanne issisan deˈiyoogaa yootees.

Xoossaa qottaa: Xoossay ayyaana. (Yohaannisa 4:24) Asi A beˈana danddayenna. (Yohaannisa 1:18) Xoossay qonccidoogaa yootiya, Geeshsha Maxaafan odettida ajjuutati ayyo dumma sohoy deˈiyoogaa bessoosona. I ubbasan deˈiyoogaadan mule odetti erenna.—Isiyaasa 6:1, 2; Ajjuutaa 4:2, 3, 8.
Xoossay deˈiyo sohuwaa: Xoossay ayyaana alamiyan deˈees; hegee beettiya meretati deˈiyoosaappe dumma soho. He sohoy Xoossay ‘deˈiyoosaa, saluwaa.’ (1 Kawotu Maxaafaa 8:30) Issi wode, ayyaana meretati “GODAA [“Yihoowa,” NW] a sinttan beettanau” yiidoogaa Geeshsha Maxaafay yootees; hegee I issi dumma sohuwan deˈiyoogaa bessiyaaba.—Iyyooba 1:6.

Xoossay ubbasan deˈennaba gidikko, taassi qoppana danddayii?

Ee. Xoossay asawu huuphiyan huuphiyan qoppees. Xoossay deˈiyoy saluwaana gidikkokka, A ufayssanawu wozanappe koyiya, saˈan deˈiyaageeta I akeekees; qassi eta maaddiyaabaa oottees. (1 Kawotu Maxaafaa 8:39; 2 Hanidabaa Odiya 16:9) Yihooway wozanappe awu goynniyaageetuyyo qoppiyoogaa waati bessiyaakko akeeka:

Woossiyo wode: Yihooway neeni woossiyoogaa doommosaara siyees.—2 Hanidabaa Odiya 18:31.
Neeni hirggiyo wode: “GODAI wozanay me77idoogeetussi mataana; qassi bantta ayyaanan liiqidaageeta ashshees.”—Mazamure 34:18.
Kaaletoy neessi koshshiyo wode: Yihooway ba Qaalaa Geeshsha Maxaafaa baggaara “nena erissananne neeni baanau bessiya ogiyaa nena tamaarissana.”—Mazamure 32:8.

Ubbasan deˈees giyoogaara gayttidaagan asay qoppiyo balabaa

Bala qofaa: Xoossay meretaa bolli ubbasan deˈees.

Tumaa: Xoossay saˈaa bolli gidin hara aybaa bollikka gidin deˈenna. (1 Kawotu Maxaafaa 8:27) Xoolinttetinne hara meretati ‘Xoossaa bonchchuwaa haasayiyoogee’ tuma. (Mazamure 19:1) Gidoppe attin, misiliyaa medhdhiya uri he misiliyaa bolli deˈennaagaadan, Xoossaykka ba medhdhidobaa bolli deˈenna. SHin misilee bana medhdhida uraabaa qonccissiyoobi deˈana danddayees. Hegaadankka, bettiya meretay Medhdhidaagaa wolqqaa, aadhdhida eratettaanne siiquwaa mala ‘beettenna A hanotaa’ nuussi qonccissees.—Roome 1:20.

Bala qofaa: Xoossay ubbabaa eranawunne ubbabaa oottanawu ubbasan deˈana bessees.

Tumaa: Geeshsha ayyaanay Xoossaa wolqqa. Xoossay awunne beennan, ba geeshsha ayyaanaa baggaara awan gidin, awudekka ubbabaa akeekananne oottana danddayees.—Mazamure 139:7.

Bala qofaa: Mazamure 139:8y, “Pude saluwaa biyaakko, neeni yan de7aasa! Duge si7ooliyaa wodhdhiyaakkokka, neeni yan de7aasa” yaagiyoogee Xoossay ubbasan deˈiyoogaa bessees.

Tumaa: Ha xiqisee Xoossay deˈiyo sohuwaabaa yootenna. Ha qofay Xoossay nuna maaddennaadan oottana danddayiya haaho sohoy baynnaagaa bessees.

a Yihoowa giyoogee Geeshsha Maxaafan qonccida Xoossaa sunttaa.