KON ANO AN GINSISIRING HAN SYENSYA

Sumala ha usa nga artikulo ha Harvard Mental Health Letter, “an tawo nga mapasalamaton pirme malipayon. An pagin mapasalamaton nabulig ha mga tawo nga magin mas positibo, malipay ha mag-opay nga eksperyensya, mapauswag an ira kahimsog, maatubang an kakurian, ngan magkaada duok nga mga relasyon.”

KON ANO AN GINSISIRING HAN BIBLIA

An Biblia nag-aaghat ha aton nga magin mapasalamaton. Hi apostol Pablo nga maopay nga susbaranan ha pagpakita hito, nagsiring: “Ipakita an iyo pagkamapasalamaton.” Pananglitan, “pirme [hiya] nagpapasalamat ha Dios” tungod kay ginkarawat han iba an mensahe nga iya iginsangyaw ha ira. (Colosas 3:15; 1 Tesalonica 2:13) An nagpapadayon nga kalipay diri la nagtitikang ha panalagsa nga pagsiring hin salamat kondi ha pagkaada mapasalamaton nga disposisyon. Tungod hito, napapanalipdan kita ha pagpokus ha aton mga katungod, ha kaawa, ngan ha pagdumot, nga nagpapahirayo han mga tawo ha aton ngan nagwawara han aton kalipay.

An aton Maglalarang mismo nagpapakita hin maopay nga susbaranan ha pagin maapresyaron—bisan ha ubos la nga mga tawo! An Hebreo 6:10 nasiring: “An Dios diri kay diri-matadong nga kalimtan niya an iyo mga buhat ngan an gugma nga iyo iginpakita para ha iya ngaran.” Oo, gintatagad han aton Maglalarang nga diri-matadong o kawaray-hustisya an pagin diri mapasalamaton.

“Magmalipayon kamo pirme. Magpasalamat kamo tungod han ngatanan nga butang.”—1 Tesalonica 5:16, 18.

KON ANO AN MAHIBABAROAN HA MGA PANHITABO

Kon nagpapahayag kita hin sinsero nga pagpasalamat—para ha regalo man, mapinairon nga pulong, o praktikal nga bulig—iginpapaabat naton ha naghatag nga ginpapabilhan ngan gin-aapresyar naton hiya. Bisan an mga estranghero nalilipay ha mga tawo nga sinsero nga nagpapasalamat ha ira tungod han ira maopay nga ginbuhat, sugad ha pag-abri ha purtahan.

KON ANO AN GINSISIRING HAN BIBLIA

“Batasana an paghatag,” siring ni Jesu-Kristo, “ngan an mga tawo mahatag ha iyo. Ira igbubuhos ha iyo surudlan an bug-os nga sukol, sinusô, inuy-og, ngan nagsasap-ay.” (Lucas 6:38) Tagda hi Rose nga usa nga ngula ha Vanuatu, ha Sur Pasipiko.

Hi Rose tumambong ha mga katirok han mga Saksi ni Jehova, kondi waray hiya magpahimulos kay diri hiya maaram o an bisan hin-o hin sign language. Han may bumisita ha kongregasyon nga mag-asawa nga interpreter hin sign language, nakita nira an problema, salit nagtikang hira pagtutdo hin sign language. Mapasalamaton gud hi Rose. “Nalilipay ako nga damu an akon sangkay nga nahigugma ha akon,” siring niya. Para ha mag-asawa, an makita hiya nga mapasalamaton ngan nakikigbahin ha mga katirok labaw pa kay ha bisan ano nga premyo. Gin-aapresyar liwat niya an pangalimbasog han iba nga mag-aram hin sign language basi makaistorya hiya.—Buhat 20:35.

“Adto nga naghahatag han halad hin pasalamat makakapagpahimaya ha [Dios].”—Salmo 50:23.

KON ANO AN GINSISIRING HAN BIBLIA

An aton pagbati konektado gud ha aton panhunahuna. An parasurat han Biblia nga hi David nag-ampo ha Dios: “Pinamamalandong ko an ngatanan nimo nga mga buhat; . . . [pati] an kabuhatan han imo mga kamot.” (Salmo 143:5) Oo, hi David nakapokus ngan diri hamabaw an panhunahuna. An iya pagin mapasalamaton resulta han iya regular nga pagpamalandong han mga paagi han Dios, buhat nga iya ginkultibar ha iya bug-os nga kinabuhi.—Salmo 71:5, 17.

An Biblia naghahatag hin maopay gud nga sagdon: ‘Bisan ano nga totoo, makapaaghat han gugma, dungganon, ngan darayawon—padayon nga hunahunaa niyo ito nga mga butang.’ (Filipos 4:8, footnote) An mga pulong nga “padayon nga hunahunaa” dugang nga nagpapabug-at han panginahanglan nga pirme mamalandong, nga ginkikinahanglan ha pagin mapasalamaton.

“An pamalandong han akon kasingkasing igkakasinabot [nagpapakita hin pagsabot].”—Salmo 49:3.