KUCACISWA IIVESI ZEBHAYIBHILE
Isaya 42:8—“NDIYINKOSI”
“NdinguYehova. Ligama lam elo. Ubukhulu bam andibuniki namnye, nozuko lwam andiluniki imifanekiso eqingqiweyo.”—Isaya 42:8, INguqulelo Yehlabathi Elitsha.
“NdiyiNKOSI: lilo elo igama lam: andiluniki omnye uzuko lwam, nendumiso yam andiyiniki imifanekiso eqingqiweyo.”—Isaya 42:8, King James Version.
Into ethethwa nguIsaya 42:8
UThixo usichazela igama lakhe ibe uchaza nokuba akaluniki izithixo uzuko lwakhe, singenakumkhonza sisebenzisa zona.
UThixo wazinika eli gama, ibe liguqulelwa ngesiXhosa ngokuthi “Yehova.” a (Eksodus 3:14, 15) Nangona igama lakhe livela amaxesha aphantse abe yi-7 000 kwiTestamente Endala (kwiZibhalo ZesiHebhere ZesiAramiki), abaguquleli abaninzi baye balisusa baza bafakela isibizo esithi “NKOSI.” Umzekelo ukwiNdumiso 110:1, eprofeta ngoYehova noYesu. I-King James Version, ithi: “INKOSI [uYehova] yathi kwiNkosi yam [uYesu].” (IZenzo 2:34-36) INguqulelo YeHlabathi Elitsha isusa nantoni na enokwenza kubekho ukubhideka phakathi “kweeNkosi” ezimbini ngokufaka igama likaThixo kwindawo efanelekileyo. Ithi: “UYehova wathi eNkosini yam: ‘Hlala ngasekunene kwam de iintshaba zakho ndizenze zibe yindawo yokubeka iinyawo zakho.’”
Ababhali abaninzi bakholelwa ukuba igama likaThixo lithetha ukuba “Ubangela Kubekho.” Eli gama lifanele uThixo oyinyaniso kuphela, kuba nguye qha onokubangela yena nendalo yakhe ibe yiyo nantoni na ukuze kwenzeke injongo yakhe.
Ekubeni uYehova enguMdali wethu noThixo oyinyaniso, nguye kuphela esifanele sizinikele kuye ngokupheleleyo. Akukho mntu nanto efanelwe lunqulo lwethu, ibe oku kuquka izithixo nemifanekiso.—Eksodus 20:2-6; 34:14; 1 Yohane 5:21.
Into ekuthethwa ngayo kuIsaya 42:8
Kwiivesi zokuqala kuIsaya isahluko 42, uYehova wachaza kwangaphambili ngomsebenzi walowo ‘amkhethileyo.’ UThixo uthi ngalo mkhonzi umvuyisayo, “uza kuzizisela ubulungisa iintlanga.” (Isaya 42:1) Ngokuphathelele esi sithembiso, uThixo uthi: “Ngoku ndixela izinto ezintsha. Ndinazisa zona ngaphambi kokuba zivele.” (Isaya 42:9) Isiprofeto ngalowo ‘ukhethiweyo’ senzeka kwiminyaka emininzi kamva, xa uMesiya okanye uKristu wafika emhlabeni ezokwenza umsebenzi wakhe wokushumayela.—Mateyu 3:16, 17; 12:15-21.
UIsaya 42:8 Kwiinguqulelo Ezongezelelekileyo
“Mna ndinguNdikhoyo igama lam ncakasana. Ubungangamsha bam andinikisi ngabo; udumo lwam aluzuzwa yimifanekiso enqulwayo.”—IBhayibhile YesiXhosa Yowe-1996.
“NdinguYehova, lilo elo igama lam: andiluniki omnye uzuko lwam, nendumiso yam andiyiniki imifanekiso eqingqiweyo.”—IZibhalo Ezingcwele.
a Igama likaThixo lesiHebhere libunjwa ngoonobumba abane, ibe libhalwa ngesiNgesi ngokuthi YHWH. Ezinye iinguqulelo zesiNgesi ziliguqulela igama likaThixo ngokuthi “Yahweh.” Ukuze ufumane okungakumbi, jonga indawo ethi “Igama LikaThixo KwiZibhalo ZesiHebhere” kwiSihlomelo A4 esikwiNgugulelo YeHlabathi Elitsha YeZibhalo Ezingcwele.
Mhlawumbi Ungayithanda Nale
IMIBUZO YEBHAYIBHILE IYAPHENDULWA
Ngubani UYehova?
Is he the God of just one people, such as the Israelites?
ESSENTIAL BIBLE TEACHINGS
Ngaba UThixo Unalo Igama?
UThixo unezibizo ezininzi, ezinye zazo nguSomandla, uMdali nesithi Nkosi. Kodwa igama likaThixo lisetyenziswa ngaphezu kwezihlandlo eziyi-7 000 eBhayibhileni.
IMIBUZO YEBHAYIBHILE IYAPHENDULWA
Unamagama Amangaphi UThixo?
Abantu abaninzi basenokucinga ukuba amagama afana ‘noAllah’, ‘uEl Shaddai,’ ‘uYehova-yire, ‘uAlfa no-Omega ngamagama kaThixo.’ Kutheni ibalulekile into yokuba simbize njani uThixo?
KUCACISWA IIVESI ZEBHAYIBHILE
Kucaciswa amaRoma 10:13—“Obiza Egameni LeNkosi”
Nokuba singaboluphi uhlanga, ibala okanye zithini iimeko zethu, uThixo usinika ithuba lokusindiswa nokufumana ubomi obungunaphakade.
IZINTO EZIFUNDISWA YIBHAYIBHILE
Izixhobo Zokufunda IBhayibhile
Khetha izixhobo zokufunda iBhayibhile kunye nezinto ezenza kube mnandi ukuyifunda.
