SY voatery arabakiteny aby volan̈a jiaby amy bokiny Apokalypsy ao. (Apokalypsy 1:1) Ohatra, misy man̈angy araiky koran̈iny ao, misy an̈aran̈a “Babylony Be” misoratra amy laharanany. Izy mipetraka an̈abony ‘vahoaka ndreky firenena.’ (Apokalypsy 17:1, 5, 15) Tsisy man̈angy mahavita mipetraka amy vahoaka ndreky firenena zen̈y. Dikanizen̈y, tsy maintsy raha hafa tiany koran̈iny io. Manondro ino man̈angy pivaroten̈a io?

Koran̈iny Apokalypsy 17:18, fa man̈angy io manondro ‘tanàna be manan̈a fanjakan̈a mifehy panjakany tany aby io.’ ‘Tanàna’ zen̈y mira fikamban̈ana misy olo maro voalamin̈y.  ‘Tanàna be’ ivolan̈ana man̈angy Babylony Be io, fotony izy mibeko iro “panjakany tany aby io.” Dikanizen̈y, izio tsy maintsy ho fikamban̈ana mahavita mimalo olo erantany. Mibeko olo aminino ma izy io? Amy resaka fivavahan̈a. Amy toko ndreky andininy hafa aminy Apokalypsy ao ahaizantsika zen̈y.

Mety ho baka amy politiky na varotro na fivavahan̈a mahavy olo manangana fikamban̈ana. Babylony Be io tsy fikamban̈ana politiky, fotony koran̈iny Baiboly fa “panjakany tany aby io” (iro pitondra aby amy donia ty) “nijangajanga taminany.” Fijangajangan̈a ivolan̈ana fifan̈ikian̈a ataony Babylony Be amindro pitondra aby io. Zen̈y mahavy izy kahian̈a ‘man̈angy be pivaroten̈a’ io.—Apokalypsy 17:1, 2; Jakoba 4:4.

Babylony Be io koa tsy fikamban̈ana pan̈ano varotro, fotony izy koa fa hiravan̈iny, iro “pivaromandeha aby amy tany” na iro pan̈ano raharahambarotro halahelo mare. Volan̈iny ao koa fa iro panjaka ndreky pivarotro aby io amy zen̈y hitazan̈a izy ‘baka lavitry.’ (Apokalypsy 18:3, 9, 10, 15-17) Zen̈y mahavy atsika mivolan̈a fa Babylony Be io fikambanan̈a amy resaka fivavahan̈a, fa tsy amy resaka politiky na varotro.   

Marin̈y tsarabe zen̈y, fotony izy ‘man̈ano aody’ amitahany firenena jiaby. (Apokalypsy 18:23) Izikoa fa resaka fan̈anovan̈a aody, efa ao edy iro demony aby io, ke olo koa man̈ano izio mbala mivavaka amindro fo. Zen̈y mahavy Baiboly mivolan̈a Babylony Be io ‘fipitrahany demony.’ (Apokalypsy 18:2; Deoteronomia 18:10-12) Koran̈iny ao koa fa izio manohitry fivavahan̈a marin̈y, fotony toheriny mare iro “paminan̈y” ndreky “olo masin̈y” jiaby. (Apokalypsy 18:24) Fivavahan̈a marin̈y ten̈a tsy tianizio, ke zen̈y mahavy izy man̈ian̈a ndreky mamono tsisy hinakinaka ‘vavolombelon̈o Jesosy’ aby io. (Apokalypsy 17:6) Mazava baka amy zen̈y fa Babylony Be io fivavahan̈a diso jiaby erantany manohitry Zan̈ahary Jehovah.