ANAO koa fa mamaky gazety, na mizaha tele, na mitandren̈y radio, misy resaka famonoan̈a olo, ady ndreky fampitahoran̈a fo. Anao mety harary, na maty havan̈a. Anao koa fa voa raha karaha zen̈y, mety ‘hiory’ mare, mira Joba koran̈iny Baiboly.—Joba 10:15.

Fan̈ontanian̈a mipetraka:

• Karaha ty ma raha tiany Zan̈ahary hatao zaho ndreky olo jiaby?

• Aia ma tany imboako izikoa fa misy raha manahiran̈a zaho?

• Asa mbala hiadan̈a edy atsika ty andra araiky an̈y?

Baiboly zaraiky fo man̈amia valiny mahafapo amy fan̈ontanian̈a aby io.

“Izy hamafa ranomaso jiaby amy masondro, fahafatesan̈a tsy ho hisy, tarain̈y tsy ho hisy, tehotehoko tsy ho hisy.”—Apokalypsy 21:4

“Olo malemy vity hahavita han̈aniky bongo.”—Isaia 35:6

“Olo gila hahita.” —Isaia 35:5

 Olo maty ho velon̈o. —Jaona 5:28, 29

“Tsisy aminolo mipetraka ao hivolan̈a: ‘Zaho zen̈y marary e.’ ” —Isaia 33:24

“Tany hahavokatra mare.”—Salamo 72:16

Aza mieritreritry fa tsy marin̈y raha nivolan̈iny Baiboly momba fiain̈ana mbala ho avy. Zan̈ahary mivolan̈a fa izy han̈ano zen̈y. Koran̈iny amy Baiboly ao koa raha mbala hataony, baka zen̈y tanteraka.

Baiboly koa man̈ambara raha tokony hataonao, baka fiain̈ananao hahafapo anao rango izioty. Maro raha mety mampijaly jerinao amy zioty. Mety ho vola zen̈y, na ­tokantran̈o tsy milamin̈y, na aretin̈y na fahafatesan̈a. Baiboly mahavita man̈amia angovo anao, baka anao tsy ho kivy amy raha jiaby zen̈y. Mahatsara atsika koa izio, fotony mamaly fan̈ontanian̈a aby ty:

• Ino mahavy atsika mijaly?

• Atsika koa fa miasa loha, karakory tokony hataontsika?

• Karakory hampasambatra tokantran̈ontsika?

• Olo maty ma mbala misy raha vitany?

• Mbala hahita havantsika efa maty aby in̈y ma atsika andra araiky an̈y?

• Ino mahavy atsika matoky fa ho vitany Zan̈ahary ­han̈ova donia ty ho tsara?

 Matoa anao mamaky boky ty, tianao hahay raha ten̈a ampianariny Baiboly. Boky ty afaka man̈ampy anao amy zen̈y. Misy fan̈ontanian̈a amy farany ambany, amy fehintsoratra ahitanao valiny. Maro olo nanjary nahay valiny fan̈ontanian̈a aby io, koa fa nianatra Baiboly, ke iro ravoravo mare. Zahay matoky fa karaha zen̈y koa anao. Ten̈a ho ravoravo ndreky ho afapo anao, izikoa fa mianatra raha ten̈a ampianariny Baiboly. Irarian̈a koa Zan̈ahary hitahy anao amy zen̈y!