1-3. Ino ma fahavalo man̈ian̈a atsika jiaby? Izikoa Baiboly zahan̈a, hatao karakory fahavalo io?

OHATRA izio misy olo fatatra ndreky farany ratsy fan̈ahy man̈ian̈a anao. Efa hainao fa maro olo nivoneny. Anao mamango milomoay, fa izy mbala avy fo. Farany anao lany hevitry. Tio fo, nisy lelahy araiky navy han̈avotro anao. Izy matanjaka mandilatra olo man̈ian̈a anao io. Anao misora ravoravo mare!

² Misy fahavalo araiky man̈ian̈a atsika jiaby. Tsy ino izio fa fahafatesan̈a. Atsika tsisy mahavita misakana izio tsy ho avy. Efa maro koa olo haintsika nazony. Fa Jehovah mahery mandilatra fahafatesan̈a. Izy ten̈a tsara fan̈ahy, fotony izy efa nan̈ano raha han̈avotan̈a atsika, baka atsika tsy hofoaty. Amy 1 Korintianina 15:26 mivolan̈a fa ‘fahafatesan̈a io fahavalo farany hifoan̈any Zan̈ahary.’ Ten̈a mamparavoravo vaovao zen̈y!

³ Atsika koa fa maharen̈y olo haintsika naty, atsika ten̈a malahelo. Nahatsara izy, Jehovah efa nivolan̈a fa olo naty aby in̈y mbala hivilominy. (Isaia 26:19) Baka amy zen̈y mahavy atsika man̈anten̈a fa iro io mbala ho velon̈o.

4. a) Man̈ano karakory Jehovah ndreky Jesosy, koa fa misy olo maty? b) Azovy aby olo nanjary kamaradiny Jesosy?

⁴ Malahelo mare atsika, koa fa misy havantsika maty. Amy zen̈y atsika ten̈a mila Volan̈a Zan̈ahary mankahery atsika. ( Vakia 2 Korintianina 1:3, 4.) Izikoa Baiboly zahan̈a, Jehovah ndreky Jesosy ten̈a malahelo koa fa misy olo maty, fotony mira fo toetrindro. (Jaona 14:9) Tamy Jesosy ta Jerosalema, izy efa zatra namangy ry Lazarosy. Koran̈iny Baiboly fa nanjary kamaradiny Jesosy ry Lazarosy ndreky anabaviny aroe, Marta ndreky Maria. Iro io nipetraka ta Betania, tanàna tsy lavitry Jerosalema. (Jaona 11:5) Efa hitantsika tamy Toko faha-6 fa Lazarosy naty.

5, 6. a) Nan̈ano karakory Jesosy koa fa nahita havany Lazarosy nalahelo? b) Nan̈ino mankahery atsika mahay fa Jehovah ndreky Jesosy ten̈a malahelo, koa fa misy olo maty?

⁵ Nan̈ano karakory Jesosy koa fa nahita kamaradiny io naty? Baiboly mivolan̈a fa Jesosy nalahelo koa fa nahita havany Lazarosy nalahelo, farany latsaka ranomasonany. (Jaona 11:33, 35) Zen̈y tsy mivolan̈a fa Jesosy lany hevitry, fotony hainy fa Lazarosy io hivilominy. (Jaona 11:3, 4) Jesosy fo nalahelo, koa fa misy olo maty.

⁶ Mankahery atsika mahay fa Jehovah ndreky Jesosy ten̈a malahelo, izikoa fa misy olo maty. Atsika manjary matoky tsarabe fa fahafatesan̈a io hifoan̈any Zan̈ahary ankitin̈y. Ino mahavy atsika mivolan̈a zen̈y? Alo zahavantsika tohiny fan̈azavan̈a.

7, 8. Ino ivolan̈ana fa Lazarosy karaha efa tsy ho velon̈o eky? Karakory fo nataony Jesosy?

⁷ Efatra andra zay Lazarosy nalevin̈y tan̈atiny lavabato. Jesosy nan̈iraka olo han̈adoso vatobe namody lavabato io, fa  Marta tsy nan̈eky, fotony efa robaka fatiny Lazarosy. (Jaona 11:39) Karaha efa tsy ho velon̈o eky izy tamy zen̈y.

⁸ Izikoa fa nadosondro vato tamy fasan̈a in̈y, Jesosy nandronton̈o karaha ty: “Lazarosy, miboaha!” Nan̈ano karakory amy zay Lazarosy? Niboaka izy baka tampasan̈a tao. (Jaona 11:43, 44) Misora ravoravo iro nahita izy velon̈o! Fotony iro jiaby tio samy nahay fa Lazarosy naty, na iro kibo araiky taminany zen̈y, na havany na namany, na olo tanàna araiky tamindro. Karaha tsy marin̈y Lazarosy naty in̈y. Resy fahafatesan̈a tamy zen̈y!

9, 10. a) Ino raha ahaizantsika fa baka amy Jehovah angovo nahavitany Jesosy namelon̈o Lazarosy in̈y? b) Nan̈ino mahatsara atsika mamaky tantaranolo naty nivilomin̈y koran̈iny Baiboly?

⁹ Tsy baka tamy Jesosy angovo nahavitany namelon̈o Lazarosy in̈y. Talohany Jesosy nikaiky Lazarosy, izy nivavaka tamy Jehovah antsendriky. Izy nangataka angovo tamy Jehovah. ( Vakia Jaona 11:41, 42.) Tsy tamy zen̈y fo Jehovah nampiasa angovonany hamiloman̈a olo naty. Misy sivy olo naty nivilominy Zan̈ahary tantarainy Baiboly. * Tsara atsika mba mamaky tantara aby io, fotony ho haintsika fa Jehovah io tsy man̈avakavaka. Olo nivilominy aby io nisy lelahy, man̈angy, olo matoe, tsaiky, olo israelita ndreky olo tsy israelita. Amy tantara aby io koa ahitan̈a fa ten̈a ravoravo olo aby io nahita havandro velon̈o. Jesosy koa fa namelon̈o tsaiky man̈angy araiky, babany ndreky reniny ravoravo mare. (Marka 5:42) Baka amy Jehovah nahavy haravoan̈a jiaby zen̈y. Ke tsisy andra han̈adin̈asandro raha nataony Jehovah tamindro zen̈y.

 ¹⁰ Olo jiaby nivilominy Jesosy in̈y karaha mbala naty fo. Misy varany edy namiloman̈a iro in̈y va? Ia, fotony tantara aby in̈y man̈amia toky atsika fa vitany Zan̈ahary ankitin̈y hamelon̈o olo maty.

11. Izikoa tantarany Lazarosy zahan̈a, ino mahavy atsika matoky fa marin̈y raha koran̈iny Mpitoriteny 9:5?

¹¹ Baiboly mampianatra fa olo maty tsisy raha hainy eky. Izy tsy velon̈o antany hafa zen̈y. Marin̈y zen̈y, fotony Lazarosy koa fa velon̈o, izy tsy nitantara raha tandan̈itry tan̈y. Izy koa tsy nikoran̈a motrobe zen̈y. Dikanizen̈y, tan̈atiny efatra andra nifatesany in̈y, izy tampasan̈a tao fo. (Mpitoriteny 9:5) Lazarosy nandry tamy fahafatesan̈a, ke tsisy raha hainy foeky.—Jaona 11:11.

12. Ino ahaizantsika fa velon̈o ankitin̈y Lazarosy?

¹² Ianarantsika baka amy tantarany Lazarosy in̈y koa fa olo maty mbala mety hivilomin̈y ankitin̈y. Maro olo nahita Jesosy namelon̈o Lazarosy. Tamy zen̈y, maro olo tsy tia Jesosy, fa iro tsy nifamatra Lazarosy velon̈o. (Jaona 11:47) Maro olo nandeha nizaha izy tan̈y, nanjary mino fa Jesosy ankitin̈y iraka Zan̈ahary. Iro pitariky fivavahan̈a jiosy tsy tia Jesosy tamy zen̈y lany hevitry, ke iro nitady hamono Jesosy ndreky Lazarosy foeky.—Jaona 11:53; 12:9-11.

13. Ino mahavy atsika matoky fa vitany Jehovah hamelon̈o olo maty?

¹³ Karakory ahaizantsika fa ho velon̈o ankitin̈y olo maty? Jesosy nivolan̈a fa hivilomin̈y olo jiaby ampasan̈a an̈y. (Jaona 5:28) Tsy sarotro amy Jehovah hamelon̈o iro, fotony izy nahavita niasa raha jiaby manampahin̈ana. Ke olo tsiaraikiaraiky naty aby in̈y ma azony onon̈o aby? Ia.  Ndray lakintan̈a marobe andan̈itry an̈y mbala hainy an̈aran̈a tsiaraikiaraiky! (Isaia 40:26) Atsika koa matoky fa Jehovah tsy han̈adin̈a raha jiaby momba havantsika naty aby in̈y, sady izy koa von̈ono hamelon̈o iro.

14, 15. Izikoa volan̈a Joba io zahan̈a, karakory fahitany Jehovah olo jiaby naty in̈y?

¹⁴ Ino ahaizantsika fa Jehovah ten̈a von̈ono hamelon̈o olo maty? Baiboly mampianatra fa efa tsy din̈iny Jehovah hamelon̈o olo maty. Tandraraiky Joba nan̈ontany Jehovah karaha ty: “Izikoa lelahy matanjaka maty, mbala ho velon̈o fo va?” Joba amy zay nivolan̈a: “Anao hikaiky, zaho hanoin̈y, fotony efa tsy din̈inao hahita asany tan̈anao.”—Joba 14:13-15.

¹⁵ Efa tsy din̈iny Jehovah hamelon̈o olo naty aby in̈y. Ndray Jehovah mba malahelo iro in̈y koa. Mankahery atsika mahay zen̈y. Karakory ma hataony Zan̈ahary han̈ano zen̈y? Olo karakory aby ma hivilominy io, baka io aia iro io hipetraka?

16. Izikoa Zan̈ahary hamelon̈o olo maty, han̈ano karakory fiain̈ana amy zen̈y?

¹⁶ Maro raha ianarantsika baka amy tantaranolo aby nivilomin̈y, koran̈iny Baiboly. Tambony tany teto fo iro nivilomin̈y, nahita havandro jiaby. Mbala tsara mandilatra zen̈y koa araiky ho avy io. Hitantsika tamy Toko faha-3 tamy boky ty fa tiany Zan̈ahary hanjary paradisa tany jiaby. Zan̈ahary koa fa hamelon̈o olo maty, fiain̈ana hilamin̈y, fotony tsy ho hisy eky ady, olo pandrava ndreky aretin̈y. Hiain̈y tsisy farany ambony tany eto iro amy zen̈y.

17. Olo karakory aby ma hivilominy Zan̈ahary?

¹⁷ Azovy aby ma hivilomin̈y? Jesosy nivolan̈a fa ‘iro  jiaby ampasan̈a an̈y haharen̈y feonany [niny Jesosy], ke hiboaka.’ (Jaona 5:28, 29) Aminy Apokalypsy 20:13 koa man̈ambara fa ‘ho velon̈o olo naty jiaby andranomasin̈y, amy fahafatesan̈a ndreky fasan̈a an̈y.’ Tsy ino “fasan̈a” koran̈iny eto fa tany jiaby misy olo maty aby in̈y. (Zahava Fan̈ampiny Fan̈azavan̈a, “Ino ma Sheoly Ndreky Hadesy Zen̈y?”.) Ho foan̈a fasan̈a jiaby amy zen̈y, fotony olo maty jiaby ho velon̈o. Apostoly Paoly nivolan̈a fa “olo marin̈y ndreky tsy marin̈y samy mbala hivilomin̈y.” (Asan’ny Apostoly 24:15) Olo karakory ma olo marin̈y ndreky tsy marin̈y zen̈y?

18. Azovy aby an̈isany “olo marin̈y” hivilominy Zan̈ahary? Anao izio mahay fa olo maty mbala hivilomin̈y. Ino tokony ho vokatra zen̈y aminao?

¹⁸ “Olo marin̈y” ivolan̈ana olony Zan̈ahary naty, talohany Jesosy navy tambony tany teto. Mety tsaroanao ry Noa, Abrahama ndreky Saraha, Mosesy, Rota, Estera ndreky olo maro hafa koa. Aminy Hebreo toko faha-11 ahitantsika an̈aranolo nanan̈a finoan̈a aby io. Izioty koa, misy olo tsy mivadiky amy Zan̈ahary, maty. Iro koa mbala an̈isany olo marin̈y hivilominy Zan̈ahary. Ke atsika tsy tokony havozo maty zen̈y, fotony atsika man̈anten̈a fa olo maty mbala hivilominy Zan̈ahary.—Hebreo 2:15.

19. Olo karakory ma “olo tsy marin̈y” hivilomin̈y zen̈y? Ino raha hambelany Jehovah hataondro?

¹⁹ Ke karakory fo basy izikoa olo io naty, kanefa izy tsy nanompo Jehovah na tsy nahay raha momba izy foeky? Iro in̈y koa tsy hadin̈any Jehovah fa mbala hivilominy, baka io iro hamiany fotoan̈a hianarandro ny marin̈y momba izy ndreky hanompo izy. An̈atiny arivo taon̈o Jehovah hamelon̈o olo maty, ke iro hiaraka aminy olonany tsy mivadiky ambony tany eto. Ten̈a hamparavoravo  fiain̈ana amy zen̈y! Andra Fitsaran̈a ikahiany Baiboly zen̈y. *

20. Ino ma Gehena zen̈y? Olo karakory ma halefa an̈y?

²⁰ Ke dikanizen̈y ma olo naty jiaby in̈y hivilominy Zan̈ahary aby? Tsy zen̈y. Baiboly mivolan̈a fa amy “Gehena” ao olo maty sasany. (Lioka 12:5) Taloha tan̈y, Gehena io an̈aran̈a tany fan̈arian̈a fako tambelan̈a tanànany Jerosalema. Niroan̈a tao faty ndreky fako. Niroan̈a tao koa fatiny pamono olo ndreky pangalatra, fotony tamindro Jiosy taloha tan̈y, pamono olo ndreky pangalatra zen̈y tsy man̈eva halevin̈y ndreky hivilomin̈y. Zen̈y mahavy Gehena io ivolan̈ana fandripahan̈a mandrakizay. Jehovah fo mahay azovy hivilomin̈y ndreky azovy tsy hivilomin̈y, fa Jesosy fo hirahiny hitsara olo. (Asan’ny Apostoly 10:42) Izikoa olo araiky tsy mety miala amy raha ratsy ataony, izy tsy hivilominy Zan̈ahary eky.

21, 22. a) Koran̈iny Baiboly, hivilomin̈y handeha aia ma olo sasany? b) Azovy olo voanalohany nivilomin̈y nandeha tan̈y?

²¹ Baiboly mivolan̈a fa misy olo handeha andan̈itry an̈y, ke hanjary anjely. Koran̈iny Baiboly fa Jesosy Kristy voanalohany loso andan̈itry an̈y.

²² Tsy nambelany Jehovah tampasan̈a tao fo Jesosy koa fa naty, fa nivilominy. (Salamo 16:10; Asan’ny Apostoly 13:34, 35) Jesosy koa fa nivilominy Jehovah efa tsy olombelon̈o eky. Nazavainy apostoly Petera fa tamy ‘Jesosy nivonen̈y mbala nofotro, fa izy koa fa nivilomin̈y nanjary fan̈ahy.’ (1 Petera 3:18) Mahagaga mare zen̈y. Jesosy tsy raha velon̈o fo fa nanjary fan̈ahy mahery koa! ( Vakia 1 Korintianina 15:3-6.) Izy voanalohany nahazo  voninahitry maventy handeha andan̈itry an̈y. (Jaona 3:13) Mbala misy olo hafa koa hanonga andan̈itry an̈y.

23, 24. Azovy ma iro ‘ondrikondriky vitsiny Jesosy’ aby io? Firy ma iro io?

²³ Koa fa hainy Jesosy fa efa tsy ho ela izy himpody andan̈itry an̈y, izy nivolan̈a tamy pianatranany tsy nivadiky fa ‘han̈amboatra tany hipitrahandro’ an̈y. (Jaona 14:2) “Ondrikondriky vitsy” nikahiany Jesosy iro io. (Lioka 12:32) Firy ma iro io? Aminy Apokalypsy 14:1, apostoly Jaona nivolan̈a karaha ty: “Zaho nahita Zanaka Ondrikondriky [Jesosy Kristy] tamy Bongo Ziona, baka io nisy zato efapolo efatra amby arivo koa niaraka taminany, nisy an̈aran̈a Zanaka Ondrikondriky ndreky an̈aran̈a Baba andan̈itry an̈y tamy laharandro.”

²⁴ Hivilomin̈y handeha andan̈itry iro Kristianin̈y 144 000 aby io, an̈isanizen̈y iro apostoliny Jesosy tsy nivadiky. Ombian̈a ma iro io hivilomin̈y? Apostoly Paoly nivolan̈a fa an̈atiny fan̈atrehany Kristy. (1 Korintianina 15:23) Atsika izioty efa an̈atiny fan̈atrehany io. Ho hitantsika fan̈azavan̈a zen̈y amy Toko faha-9 amy boky ty. Dikanizen̈y, izikoa misy amindro io maty aminandrantsika izioty, iro efa vilominy Zan̈ahary edy, ke hanonga andan̈itry an̈y. (1 Korintianina 15:51-55) Fa ankamarozanolo ndraiky ho velon̈o tsisy farany amy Paradisa ambony tany eto.

25. Ino raha hianarantsika amy toko fan̈araka ty?

²⁵ Jehovah handresy fahafatesan̈a fahavalontsika io ankitin̈y, ke fahafatesan̈a tsy ho hisy eky. ( Vakia Isaia 25:8.) Anao mety hieritreritry karaha ty: “Ino ma raha hataondro io andan̈itry an̈y?” Iro io hiaraka amy Jesosy hitondra Fanjakan̈a andan̈itry an̈y. Amy toko fan̈araka ty atsika hianatra zen̈y.