LIJIGANYO 07

Ana Yehofa Ali Ŵani?

ALOLELE

Ana wawojo akusaganisya kuti Yehofa Mlungu ali ŵani? Ana akusaganisya kuti jwalakwe ali jwapenani soni ali kwakutalikangana ni wawojo mpela mwasiŵelele ndondwa? Kapena akusaganisya kuti agambile kuŵa jwamachili mpela njasi? Ana Yehofa ali ŵani kusyesyene? Kupitila m’Baibulo, Yehofa akusatusalila ndamo syakwe. Akusatusalilasoni kuti jwalakwe akusasamala ya jwalijose jwetuwe.

1. Ligongo chichi ngatukusamwona Mlungu?

Yehofa nganakola chilu mpela chetuchi. Baibulo jikusati, “Mlungu ali Msimu.” (Yohane 4:24) Jwalakwe ali jwangawoneka soni akusatama kwinani.

2. Ana Yehofa akwete ndamo syamtuli?

Atamose kuti nganituŵa tum’weni Yehofa, nambo kumanyilila ndamo syakwe mpaka kutukamuchisye kuti tumnonyeleje. Baibulo jikusaŵecheta kuti Yehofa, ‘Akusachinonyela chilungamo soni ŵangajasa ŵandu ŵakwe ŵakulupichika.’ (Salimo 37:28) Jwalakwe ali ‘jwachanasa soni ŵakusalala mtima,’ mnopemnope kwa ŵandu ŵakulaga ni yipwetesi. (Yakobo 5:11) ‘Yehofa akusaŵa chiŵandika ni ŵandu ŵamtima wekasiche, akwakulupusya ŵelewo ŵajasile mtima.’ (Salimo 34:18) Ana akumanyilila kuti yatukusatendaga mpaka yimsangalasye kapena kumsakalisya Yehofa? Yehofa jwangasangalala ni mundu jwasagwile kutenda yindu yakusakala. (Salimo 78:40, 41) Nambo jwalakwe akusasangalala ni mundu jwasagwile kutenda yindu yambone.—Aŵalanje Misyungu 27:11.

3. Ana Yehofa akusalosya chamtuli kuti akusatunonyela?

Ndamo jekulungwa jakwete Yehofa jili chinonyelo. Baibulo jikusati “Mlungu ali chinonyelo.” (1 Yohane 4:8) Chinonyelo cha Yehofa ngachikusawonechela m’Baibulope, nambo chikusawonechelasoni mu yindu yaŵapanganyisye. (Aŵalanje Masengo 14:17) Mwachisyasyo, aganichisye yiŵatite katupanganye ŵanduwe. Jwalakwe ŵatupanganyisye kuti tukomboleje kulola yindu yakusalala, tupikanileje nyimbo syakusangalasya soni tupikaneje kunong’a kwa yakulya. Jwalakwe akusasaka kuti tusangalaleje ni umi.

KULIJIGANYA YEJINJI

Chitulole chindu chakusakamulichisya masengo Yehofa pakutenda yakusimonjesya. Kaneko chitulolesoni yakusati pakutumanyikasya soni pakutulosya ndamo syakwe.

4. Msimu weswela gali machili ga Mlungu

Ŵanduwe tukusakamulichisya masengo makono pakamula masengo. Myoyosoni Yehofa akusakamulichisya masengo msimu wakwe weswela. Baibulo jikusasala kuti msimu weswela nganiwuŵa Mlungu nambo gali machili gakusakamulichisya masengo Mlungu pakupanganya yindu. Aŵalanje Luka 11:13 soni Masengo 2:17, kaneko akambilane yiwusyo ayi:

Mlungu akuti “Tinjiŵika” msimu wangu mwa ŵandu wosope ŵakusamŵenda. Myoyo, ana mpaka tujile kuti msimuwo uli Mlungu kapena machili gakwe? Ligongo chichi akwanga myoyo?

Yehofa akusakamulichisya masengo msimu wakwe weswela pakutenda yakusimonjesya. Aŵalanje Salimo 33:6 soni 2 Petulo 1:20, 21, kaneko akambilane chiwusyo achi:

Ana Yehofa jwakamulichisye masengo msimu weswela m’matala gane gapi?

5. Yehofa akwete ndamo syambone

Atamose kuti Mose jwamlambilaga Mlungu mwakulupichika, nambope jwasakaga kummanyilila chenene jwalakwe. Myoyo Mose jwamsalile Mlungu kuti, “Andosye matala gawo kuti namanyilile ŵalakwe.” (Ekisodo 33:13) Pakwanga, Yehofa ŵamsalile Mose ndamo sine syakwete. Aŵalanje Ekisodo 34:4-6, kaneko akambilane yiwusyo ayi:

Ana Yehofa ŵamsalile Mose ndamo syakwe syapi?
Ana akusasangalala ni ndamo syapi sya Yehofa?

6. Yehofa akusiŵaganichisya ŵandu

Ana Ahebeli paŵalagasikaga ni ukapolo ku Iguputo, Yehofa yamkwayiye uli? Apikanile kapena Aŵalanje Ekisodo 3:1-10. Kaneko akambilane yiwusyo ayi.

YAKUPIKANILA: Yehofa Ŵaganichisyaga Paŵalagasikaga (2:45)

Ana nganiji jikwajiganya yamtuli pakwamba mwakusapikanila Yehofa ŵandu pakulagasika?—Alole vesi 7 soni 8.
Ana akuganisya kuti Yehofa akusiŵasamalila ŵandu? Ana jwalakwe mpaka akombole kutenda yeleyi? Ligongo chichi akwanga myoyo?

7. Ndamo sya Yehofa sikusawonechela mu yindu ya m’chilengedwe

Ndamo sya Yehofa sikusawonechela kupitila mu yindu yaŵapanganyisye. Alolele FIDIYO. Kaneko aŵalanje Aloma 1:20, ni akambilane chiwusyo achi.