1-3. ¿Baʼax tu beetaj Jesús utiaʼal u maas kʼaʼaytaʼal le Reinooʼ, yéetel tiʼ baʼax ku beetik k-tuukul?

 JESUSEʼ kʼaʼaytajnaj kaʼapʼéel jaʼab tiʼ tuláakal u luʼumil Galilea (xok Mateo 9:35-38). Bin tiʼ nukuch kaajoʼob yéetel tiʼ mejen kaajoʼob táan u kaʼansaj teʼ sinagogaʼoboʼ yéetel táan u kʼaʼaytik u maʼalob péektsilil le Reinooʼ. Jeʼel tuʼuxak ka xiʼikeʼ ku muchʼkuba yaʼab máakoʼob tu yiknal. Le oʼolal tu yaʼalaj kʼaʼabéet uláakʼ j-meyajoʼob, tumen «le joochoʼ yaʼab».

² Jesuseʼ tu yaʼalaj ka kʼaʼaytaʼak le maʼalob péektsil tuláakʼ tuʼuxoʼoboʼ. Le oʼolal tu túuxtaj u 12 apostoloʼob «u kʼaʼaytoʼob u Reino Dios» (Luc. 9:1, 2). Maʼ xaaneʼ le apostoloʼoboʼ joʼopʼ u tuklikoʼob bix ken u beetiloʼob. Baʼaleʼ táanil tiʼ u túuxtikoʼobeʼ tu kaʼansajtiʼob bix ken u beetiloʼob, jeʼex úuchik u kaʼansaʼal tumen u Taataeʼ.

³ Lelaʼ ku beetik k-tuklik: ¿Bix úuchik u kaʼansaʼal Jesús tumen u Taata? ¿Bix úuchik u kaʼansik u apostoloʼob? Yéetel ¿bix u kaʼansaʼal le máaxoʼob kʼaʼaytik u maʼalob péektsilil le Reino teʼ kʼiinoʼobaʼ?

4. ¿Baʼax kʼiin yéetel tuʼux kaʼansaʼab Jesús tumen u Taata?

⁴ Jesuseʼ tu yaʼaleʼ u Taata kaʼanse. Le tiaʼan way Luʼumoʼ tu yaʼalaj: «Le baʼaloʼobaʼ kin waʼalik jeʼex u kaʼansmilten le Taataoʼ» (Juan 8:28). ¿Baʼax kʼiin yéetel tuʼux kaʼansaʼabi? Káaj u kaʼansaʼal desde ka beetaʼabi (Col. 1:15). Letiʼeʼ tu máansaj u milesil jaʼaboʼob teʼ kaʼan táan u yuʼubik yéetel táan u yilik baʼax ku beetik u Taata, le Maʼalob j-Kaʼansajoʼ (Isa. 30:20). Le oʼolal tu kanaj bix u modos u Taata, bix u meyaj yéetel baʼax u tukultmaj u beetik.

5. ¿Bix úuchik u kaʼansik Jéeoba u Hijo utiaʼal le meyaj ken u beet way Luʼumoʼ?

⁵ Ka kʼuch u kʼiinileʼ kaʼansaʼab u beet tubeel le meyaj taal u beet way Luʼumoʼ. Koʼox ilik junpʼéel profecía ku yeʼesik bix maʼalobil úuchik u biskuba Jéeoba yéetel Jesús, u Hijo (xok Isaías 50:4, 5). Le profecíaoʼ ku yaʼalikeʼ Jéeobaeʼ ku yajsik «sáamsamal jaʼatskab kʼiin» u Hijo utiaʼal u kaʼanse, jeʼex u beetik juntúul taatatsil yéetel u chan hijo utiaʼal u kaʼansik túumben baʼaloʼob tiʼeʼ. Junpʼéel libro ku tsolik baʼaxoʼob ku  yaʼalik le Bibliaoʼ, ku yaʼalik: «Jéeobaeʼ [...] ku bisik u hijo bey jeʼex u bisaʼal juntúul chan paal escuelaeʼ yéetel ku kaʼansiktiʼ baʼax unaj u kʼaʼaytik yéetel bix unaj u beetik». Jesuseʼ kaʼansaʼab tumen u Taata desde tu «escuela» teʼ kaʼanoʼ. Le oʼolal tu yaʼalaj: «Le Taata máax túuxtenoʼ letiʼ aʼalten jach baʼax ken in waʼale» (Juan 12:49). Tu yeʼesajtiʼ bix unaj u kaʼansaj. a Le oʼolal le ka taal way Luʼumeʼ tu beetaj le baʼax kaʼansaʼabtiʼ le ka kʼaʼaytajnajoʼ bey xan le ka tu kaʼansaj u disipuloʼob kʼaʼaytajoʼ.

6, 7. 1) ¿Baʼax tu yaʼalaj Jesús tiʼ u apostoloʼob, yéetel bix áantaʼabikoʼob tumen le baʼax kaʼansaʼabtiʼoboʼ? 2) ¿Bix u kaʼanskoʼon Jesús teʼ kʼiinoʼobaʼ?

⁶ Tu káajbal le xookaʼ t-aʼaleʼ Jesuseʼ tu kaʼansaj u apostoloʼob, ¿bix úuchik u beetik? Jeʼex u yaʼalik le capítulo 10 tiʼ Mateooʼ tu yaʼalajtiʼob tuʼux kun kʼaʼaytajoʼob (versículo 5, 6), baʼax ken u kʼaʼaytoʼob (versículo 7), ka u kʼub u yóoloʼob tiʼ Jéeoba (versículo 9, 10), bix unaj u tʼaanoʼob yéetel le máakoʼoboʼ (versículo 11-13), baʼax ken u beetoʼob wa maʼ tu kʼaʼamloʼob (versículo 14, 15) yéetel baʼax ken u beetoʼob ken chʼaʼpachtaʼakoʼob (versículo 16-23). b Le bix úuchik u kaʼansik u apostoloʼoboʼ le áantoʼob utiaʼal u kʼaʼaytikoʼob le maʼalob péektsiloʼ.

⁷ ¿Kux túun teʼ kʼiinoʼobaʼ? Jesús, u Reyil u Reino Dioseʼ, u tsʼaamaj junpʼéel nojoch meyaj tiʼ le máaxoʼob ken u gobernartoʼ, u kʼaʼaytikoʼob «u maʼalob péektsilil le Reino [...] tiʼ tuláakal yóokʼol kaab utiaʼal ka ojéeltaʼak tumen u kajnáaliloʼob tuláakal kaajoʼob» (Mat. 24:14). ¿Táan wa xan u kaʼanskoʼon le Rey utiaʼal k-beetik le meyajaʼ? Táan. Desde teʼ kaʼanoʼ táan u nuʼuktik le kaʼansaj ku tsʼaʼabaltoʼon utiaʼal k-kʼaʼaytajoʼ bey xan utiaʼal k-beetik uláakʼ meyajoʼob teʼ múuchʼuliloʼ.

8, 9. 1) ¿Baʼaxten ku beetaʼal kaʼach le Escuela utiaʼal k-Kaʼansik u Tʼaan Diosoʼ? 2) ¿Bix tsʼoʼok u yáantkech le muchʼtáambal yáam semanaoʼ?

⁸ U kaajal Jéeobaeʼ desde úuch joʼopʼok u meyajtiʼ le asambleaʼob yéetel le muchʼtáambaloʼob, jeʼex U Muchʼtáambalil Kʼaʼaytaj, utiaʼal u kaʼansik le máaxoʼob kʼaʼaytik le maʼalob péektsiloʼ. Baʼaleʼ desde tu jaʼabil 1940, le sukuʼunoʼob nuʼuktik le kʼaʼaytaj tu najil Betel yaan Estados Unidosoʼ káaj u beetkoʼob jejeláas escuelaʼob utiaʼal u tsʼáaikoʼob le kaʼansajoʼ.

⁹ Escuela utiaʼal k-Kaʼansik u Tʼaan Dios. Jeʼex t-ilaj teʼ xook máanikoʼ, le escuelaaʼ káaj u meyaj teʼ múuchʼuliloʼob desde tu jaʼabil 1943. ¿Beetaʼab wa chéen utiaʼal u kaʼansik máak u máans tsoltʼaanoʼob teʼ múuchʼuliloʼ? Maʼatech. Baʼaxeʼ beetaʼab utiaʼal u kaʼansaʼal máak tʼaan tubeel utiaʼal u kʼaʼaytik le maʼalob péektsil tsʼáaik nojbeʼenil tiʼ Jéeobaoʼ (Sal. 150:6). Le escuelaaʼ tu yáantaj máak u maas maʼalobkíint bix u kʼaʼaytaj yéetel u kaʼansaj. Bejlaʼeʼ letiʼe u biilal le muchʼtáambal yáam semanaoʼ.

10, 11. ¿Máaxoʼob jeʼel u páajtal u binoʼob teʼ Escuela tiʼ Galaadoʼ, yéetel bix u yáantaʼaloʼob tumen le xook ku tsʼaʼabaltiʼoboʼ?

 ¹⁰ Escuela Bíblica tiʼ Galaad tiʼ le Watchtoweroʼ. Le escuelaaʼ káaj tu kʼiinil lunes 1 tiʼ febrero tiʼ 1943. Lelaʼ beetaʼab utiaʼal u kaʼansaʼal precursoroʼob yéetel uláakʼ sukuʼunoʼob jach ku tsʼáaik u yóol u meyajtoʼob Dios utiaʼal ka túuxtaʼakoʼob u beet u misioneroiloʼob tuláakʼ kaajoʼob. Baʼaleʼ desde octubre tiʼ 2011, chéen ku táakpajal le precursor especialoʼoboʼ, le superintendente viajanteʼob yéetel u yatanoʼoboʼ, betelitaʼob yéetel misioneroʼob maʼ bijaʼanoʼob mix juntéen teʼ escuelaoʼ.

¹¹ ¿Baʼax oʼolal beetaʼab le Escuela tiʼ Galaadoʼ? Juntúul tiʼ le sukuʼunoʼob úuch joʼopʼok u kaʼansaj teʼ escuelaaʼ tu yaʼalaj: «Utiaʼal u muʼukʼaʼankúuntik u fe le j-xoknáaloʼoboʼ, tumen jach ku xakʼalxoktaʼal le Bibliaoʼ yéetel ku yáantaʼaloʼob u yiloʼob bix jeʼel u aktáantkoʼob jeʼel baʼaxak ka úuchuk teʼ tuʼux kun túuxtbiloʼoboʼ. Tsʼoʼoleʼ le xookoʼ ku yáantkoʼob utiaʼal ka maas taakchajak u táakpajloʼob teʼ kʼaʼaytajoʼ» (Efe. 4:11).

12, 13. ¿Bix tsʼoʼok u yáantaj le Escuela tiʼ Galaad utiaʼal u maas kʼaʼaytaʼal le maʼalob péektsiloʼ? Tsikbalt junpʼéel bix tsʼoʼok u yáantaj.

¹² ¿Bix tsʼoʼok u yáantaj le Escuela tiʼ Galaad utiaʼal u kʼaʼaytaʼal le maʼalob péektsil tiʼ tuláakal yóokʼol kaaboʼ? Desde ka káaj tu jaʼabil 1943, tsʼoʼok u táakpajal 8,500 sukuʼunoʼobiʼ c yéetel tsʼoʼok u túuxtaʼaloʼob kʼaʼaytaj tiʼ maas tiʼ 170 luʼumiloʼob. Le sukuʼunoʼobaʼ jach ku tsʼáaik u yóoloʼob teʼ kʼaʼaytajoʼ yéetel ku yáantkoʼob uláakʼoʼob u beetoʼob xan beyoʼ. Yaʼab tuʼux ku binoʼob kʼaʼaytajeʼ chéen junpʼíit j-kʼaʼaytajoʼob yanoʼobiʼ, le oʼolal jach nojoch áantaj ku tsʼáaikoʼobiʼ.

¹³ Jeʼex tu luʼumil Japoneʼ, óoliʼ xuʼul le kʼaʼaytaj tu kʼiiniloʼob le Kaʼapʼéel Nojoch Baʼateltáambaloʼ. Tu mesil agosto tiʼ 1949, mix diez j-kʼaʼaytajoʼob yaan kaʼachiʼ. Baʼaleʼ tu jóokʼbal le jaʼab jeʼeloʼ bin trece misioneroʼob kʼaʼaytajiʼ. Ka máan kʼiineʼ bin uláakʼoʼobiʼ. Ka káajeʼ chéen teʼ nukuch kaajoʼob ku kʼaʼaytajoʼoboʼ, ka máan kʼiineʼ joʼopʼ u bin u náachtaloʼob. Le misioneroʼoboʼ jach tu yáantoʼob u j-xoknáaloʼob bey xan uláakʼ j-kʼaʼaytajoʼob ka u beet u precursoriloʼob. Le baʼax tu beetoʼoboʼ jach yaʼab utsiloʼob tu taasaj. Bejlaʼeʼ yaan maas tiʼ 216 mil j-kʼaʼaytajoʼob Japón yéetel maas tiʼ 86 mil sukuʼunoʼob táan u beetik u precursoriloʼobiʼ. d

14. ¿Bix tsʼoʼok u yáantaj le jejeláas escuelaʼob yaan ichil u kaajal Diosoʼ? (Ilawil xan le cuadro « Escuelaʼob tuʼux ku kaʼansaʼal máak kʼaʼaytaj».)

¹⁴ Uláakʼ escuelaʼob tuʼux ku kaʼanskoʼon Dios. Le Escuela utiaʼal Precursoroʼob, le Escuela Bíblica utiaʼal le Tsʼokaʼan u Beeloʼob yéetel le Escuela Bíblica utiaʼal Sukuʼunoʼob maʼ Tsʼokaʼan u Beeloʼoboʼ ku yáantik le sukuʼunoʼob u nuʼuktoʼob tubeel le kʼaʼaytajoʼ. e Tuláakal le escuelaʼob beetaʼan tumen u kaajal Jéeobaaʼ ku yeʼesik Jesús, le Reyoʼ, táan u kaʼansik tubeel le máaxoʼob ken u gobernart utiaʼal u beetkoʼob le meyaj u kʼubéentmajtiʼoboʼ (2 Tim. 4:5).

15. ¿Baʼax unaj u beetik le máaxoʼob tsʼaʼan u beetoʼob junpʼéel meyaj ichil u kaajal Diosoʼ?

¹⁵ Kʼaʼajaktoʼoneʼ Isaíaseʼ tʼaanaj tiʼ bix kaʼansaʼabik Jesús tumen Dios. Tu kʼiiniloʼob tiaʼan teʼ «escuelaoʼ» tu kanaj bix unaj u tʼanik «le máaxoʼob kaʼanaʼantakoʼob[oʼ]» (Isa. 50:4). Le tiaʼan way Luʼumoʼ tu beetaj le baʼax tu kanoʼ, tumen tu yáantaj le máaxoʼob ‹yaʼab u meyajoʼob yéetel aal u kuuchoʼoboʼ› (Mat. 11:28-30). Le sukuʼunoʼob tsʼaʼan u beetoʼob junpʼéel meyaj ichil u kaajal Diosoʼ, unaj u yáantkoʼob u maasil yéetel unaj u líiʼskoʼob u yóoloʼob jeʼex tu beetil Jesuseʼ. Le oʼolal tsʼoʼok u beetaʼal jejeláas escuelaʼob utiaʼal u kaʼansaʼaloʼob u yáantoʼob tubeel u maasil.

16, 17. ¿Baʼax u biilal le xook ku tsʼaʼabal teʼ Escuela tiʼ Ministerio tiʼ le Reinooʼ? (Ilawil xan le tsolajiloʼ.)

¹⁶ Escuela tiʼ Ministerio tiʼ le Reinooʼ. Lelaʼ káaj u beetaʼal 9 tiʼ marzo tiʼ 1959, tu kaajil South Lansing (Nueva York). Teʼ kʼiinoʼob jeʼeloʼ invitartaʼab tuláakal le superintendente viajanteʼob yéetel le siervos de congregacionoʼ, lelaʼ xáanchaj junpʼéel mes. Ka máan kʼiineʼ le escuelaaʼ beetaʼab ichil uláakʼ  idiomaʼob, jujunpʼíitileʼ joʼopʼ u kaʼansaʼal sukuʼunoʼob tiʼ tuláakal yóokʼol kaabiʼ. f

¹⁷ Le Anuario de los Testigos de Jehová tiʼ 1962, tu tsolaj baʼax u biilal le escuelaaʼ: «Teʼ kʼiinoʼob jach yaʼab meyaj yanaʼ, le sukuʼunoʼob ku beetik u superintendenteiloʼob teʼ múuchʼuliloʼ, unaj u kanik u jóoʼsoʼob tiempo utiaʼal u beetkoʼob tubeel u meyajoʼob utiaʼal u yáantkoʼob le sukuʼunoʼoboʼ, beyoʼ yaan u yilaʼal jach nojoch le áantaj ku tsʼáaikoʼoboʼ. Baʼaleʼ kʼaʼabéet u kanáantik xan maʼ u pʼatik juntséelil u familia, baʼaxeʼ tu kaʼa jaatsil unaj u yáantik tubeel. Tiʼ tuláakal yóokʼol kaabeʼ ku páajtal u bin tuláakal le siervos de congregación teʼ Escuela tiʼ Ministerio tiʼ le Reinooʼ, teʼeloʼ yaan u kankoʼob bix jeʼel u kanáantkoʼob le múuchʼulil jeʼex u yaʼalik le Bibliaoʼ» (1 Tim. 3:1-7; Tito 1:5-9).

18. ¿Baʼax utsiloʼob tsʼoʼok u kʼamik u kaajal Jéeoba yoʼolal le Escuela tiʼ Ministerio tiʼ le Reinooʼ?

¹⁸ ¿Baʼax utsiloʼob tsʼoʼok u kʼamik tuláakal le máaxoʼob meyajtik Dios yoʼolal le áantaj ku tsʼáaik le Escuela tiʼ Ministerio tiʼ le Reinooʼ? Le ken beetaʼak tumen le ancianoʼob yéetel  le siervo ministerialoʼob le baʼax ku kankoʼob teʼ escuelaoʼ ku kanik u yáantoʼob yéetel u líiʼsoʼob u yóol le sukuʼunoʼob teʼ múuchʼulil, jeʼex beetaʼabik tumen Jesusoʼ. ¿Máasaʼ maʼalob a wuʼuyikaba ken líiʼsaʼak a wóol, ken chʼaʼabak en cuentail bix yanilech wa ken xíimbaltaʼakech tumen juntúul anciano wa tumen juntúul siervo ministerial? (1 Tes. 5:11.) Le sukuʼunoʼobaʼ jach ku yáantajoʼob teʼ múuchʼuliloʼ.

19. ¿Baʼax uláakʼ escuelailoʼob ku nuʼuktik le Comité tiʼ Enseñanzaoʼ, yéetel baʼax u biilaloʼob?

¹⁹ Uláakʼ escuelaʼob tuʼux ku kaʼanskoʼon Dios. Le Comité tiʼ Enseñanza tiʼ le Cuerpo Gobernanteoʼ ku nuʼuktik uláakʼ escuelaʼob tuʼux ku kaʼansaʼal le sukuʼunoʼob u beetoʼob le meyajoʼob tsʼaʼantiʼob ichil u kaajal Diosoʼ. Le escuelaʼobaʼ ku kaʼansik le ancianoʼoboʼ, le superintendente viajanteʼob yéetel le sukuʼunoʼob tiʼ Comités tiʼ Sucursaloʼob utiaʼal u beetkoʼob tubeel le meyaj tsʼaʼantiʼoboʼ. Le baʼaxoʼob ku kaʼansaʼaltiʼoboʼ ku yáantkoʼob utiaʼal ka muʼukʼaʼanchajak u fejoʼob yéetel ka u beetoʼob le baʼax ku yaʼalik le Biblia utiaʼal u kanáantkoʼob le mejen tamanoʼob kʼubéentaʼantiʼob tumen Jéeobaoʼ (1 Ped. 5:1-3).

20. ¿Baʼaxten Jesuseʼ tu yaʼalaj Jéeoba kaʼanskoʼon, yéetel baʼax tsʼoʼok a chʼaʼtuklik a beetik?

²⁰ Tuláakal lelaʼ ku yeʼesikeʼ le Reyoʼ táan u kaʼansik tubeel tuláakal le máaxoʼob u tsʼaamubaʼob tu tséeloʼ. Tuláakal le baʼax ku kaʼansaʼaloʼ tiʼ Jéeoba u taal, tumen letiʼ kaʼans Jesús, u Hijo, yéetel Jesuseʼ tu kaʼansaj u disipuloʼob. Le oʼolal tu yaʼalaj: «Tuláakloʼobeʼ yaan u kaʼansaʼaloʼob tumen Jéeoba» (Juan 6:45; Isa. 54:13). Toʼoneʼ jach unaj k-jóoʼsik u yutsil tuláakal le kaʼansaj ku tsʼáaiktoʼon le Reyoʼ. Maʼ u tuʼubultoʼoneʼ le kaʼansajoʼob ku tsʼaʼabaltoʼonoʼ beetaʼanoʼob utiaʼal u muʼukʼaʼankúuntikoʼob k-fe yéetel ku yáantkoʼon k-beet tubeel le meyajoʼob tsʼaʼantoʼonoʼ.