«Teen yéetel in wataneʼ junpuul úuchik u luʼsaʼaltoʼon meyaj —ku yaʼalik Seth—. * Ichil dos años áantaʼaboʼon yéetel taakʼin tumen k-láakʼtsiloʼob, chéen jujunpʼíit meyajoʼob k-beetik. Yoʼolal leloʼ tsaʼay depresión tiʼ Priscilla, in watan. Teneʼ tin wuʼuyaj mix baʼal in biilal.

»¿Bix úuchik k-aktáantik le baʼax úuchtoʼonoʼ? Priscillaeʼ mantatsʼ tu kʼaʼajsaj baʼax tu yaʼalaj Jesús teʼ Mateo 6:34: ‹Maʼ a sen chiʼichnaktaleʼex yoʼolal u kʼiinil sáamal, tumen sáamaleʼ yaan xan u yantal baʼaloʼob jeʼel u beetik a chiʼichnaktaleʼexeʼ›. Tsʼoʼoleʼ in wataneʼ jach áantaʼab xan ikil u orar tu jaajil u yóol. Teneʼ jach tu líiʼsaj in wóol baʼax ku yaʼalik Salmo 55:22. Jeʼex le salmistaoʼ, tin waʼalaj tiʼ Jéeoba baʼaxoʼob chiʼichnakkúunsken, letiʼ túuneʼ tu yáanten. Kex tsʼoʼok in kaxtik meyajeʼ láayliʼ táan k-ilik k-kuxtal yéetel junpʼíit baʼaloʼob jeʼex tu yaʼalil Jesús teʼ Mateo 6:20-22. U maas jatsʼutsileʼ jach maʼalob k-bisikba, yéetel k-uʼuyik naatsʼ yaniloʼon tiʼ Dios.»

Jonathaneʼ ku yaʼalik xan: «Sajakchajen ka t-perdertaj k-negocio tumen maʼ k-ojel bix ken k-kaxt k-kuxtaliʼ. Le taakʼin t-juntartaj úuchik k-sen meyaj ich veinte añosoʼ, chéen bey úuchik u láaj binoʼ. Hasta maʼ k-kʼáat maan yéetel k-tarjeta de creditoiʼ tumen saajkoʼon maʼ u kʼaʼamal.

»Chéen baʼaleʼ le Biblia yéetel u espiritu santo Diosoʼ tu yáantoʼon k-chʼaʼtukult tubeel baʼax ken k-beete. Tin kanaj in beet jejeláas meyajoʼob, yéetel xuʼul k-manik baʼaloʼob maʼ kʼaʼabéettoʼoniʼ. U j-jaajkunajoʼon Jéeobaeʼ suuk k-paklan áantikba. Ka anchajtoʼon le problemaʼobaʼ k-éet religioniloʼobeʼ tu líiʼsoʼob k-óol, ka tu yiloʼob bix jeʼel u yáantkoʼonoʼobeʼ».

«Ka tu pʼaten in wíichameʼ yaachaj in wóol yéetel jach pʼuʼujen —ku yaʼalik Raquel—. Jach tristechajen pero náatsʼen yiknal Dioseʼ ka tu líiʼsaj in wóol. Sáamsamal kaʼach kin orar, Dios túuneʼ tu tsʼáajten jeetsʼelil. Bey tu tsʼakil u yajil in puksiʼikʼaloʼ.

»U tʼaan Dios, le Bibliaoʼ, tu yáanten xan utiaʼal u jáawal in pʼuʼujul. Tin chʼaʼaj in tiaʼalint baʼax tu tsʼíibtaj Pablo tiʼ Romailoʼob 12:21: ‹Maʼ a chaʼik u tsʼáanchaʼatkech le kʼaasoʼ, baʼaxeʼ seguernak a tsʼáanchaʼatik le kʼaas yéetel le baʼax utsoʼ›.

»Juntúul in wéet religionileʼ tu yaʼalajteneʼ unaj u xuʼulul in tuklik le baʼax úuchtenoʼ. Tu xokajten Eclesiastés 3:6, ka tu utsul aʼalajteneʼ yaan u súutukil u xúumpʼattaʼal wa baʼax. Kex istikyaj u beetaʼal le baʼax tu yaʼalajtenoʼ, letiʼe baʼax unaj in beetik kaʼachoʼ. Bejlaʼeʼ yaan jatsʼuts baʼaloʼob tsʼoʼok in chʼaʼtuklik in beetik.»

«Ka tu pʼaten in núupeʼ —ku yaʼalik Elizabeth—, jach tu yáanten juntúul in amiga. Okʼolnaj tin wéetel, tu líiʼsaj in wóol yéetel tu yeʼesajten yaabilaj. In wojel Jéeoba túuxt utiaʼal u tsʼakik in puksiʼikʼal yaachajaʼanoʼ.»

Don Luis, le máax t-aʼalaj teʼ yáax xookoʼ, yaan junpʼéel kʼojaʼanil tu puksiʼikʼal yéetel kaʼatéen tsʼoʼok u máan u kíimil. Aʼalaʼabtiʼeʼ 16 horaʼob sáamsamal kʼaʼabéet u tsʼaʼabal oxígeno tiʼ. «Mantatsʼ táan in orar tiʼ Jéeoba —ku yaʼalik—. Ken tsʼoʼokok in orareʼ kin wuʼuyik ku kaʼa antal in muukʼ. Le oracionoʼ ku yáantken utiaʼal maʼ in chʼaʼik saajkil tumen in wojel Dios kanáantken.»

Petra, juntúul koʼolel tsʼoʼok maas tiʼ 80 años tiʼeʼ, ku yaʼalik: «Yaʼab baʼax in kʼáat in beete pero maʼ tu páajtal. Yaj in wilik minaʼan in muukʼ jeʼex kaʼacheʼ, kaʼanaʼanen yéetel yaʼab in wukʼik tsʼaak. Yaʼab u téenel kin tuukul tiʼ baʼax tu kʼáataj Jesús tiʼ u Taata: ‹In Yuum, wa ku páajtaleʼ, luʼsten le copaaʼ›. Pero Jéeobaeʼ tu lugar u luʼsik le copa tiʼ u Hijooʼ —le muʼyajil kun antaltiʼoʼ—, tu tsʼáaj u muukʼil tiʼ utiaʼal u aguantar, yéetel bey xan u beetik tin wéeteloʼ. In orar sáamsamaleʼ bey junpʼéel tsʼaakeʼ.  Maʼalob in wuʼuyikinba ken tsʼoʼokok in tʼaan yéetel Dios» (Mateo 26:39).

Julián, juntúul máak 30 años yanak esclerosis múltiple tiʼeʼ, oʼoliʼ bey u yuʼubikuba xanoʼ. «Bejlaʼeʼ tu lugar in kutal tu sillail in oficinaeʼ, tiʼ junpʼéel silla de ruedas kin máan —ku yaʼalik—, pero yaan u biilal in kuxtal tumen táan in wáantik uláakʼ máakoʼob. Lelaʼ ku beetik in wuʼuyikinba maʼalobil. Kin wilik xaneʼ Jéeobaeʼ táan u tsʼáaikten le muukʼ kʼaʼabéetten jeʼex u yaʼalmiloʼ. Jeʼel u páajtal in waʼalik jeʼex apóstol Pabloeʼ: ‹Yaanten u muukʼil utiaʼal in beetik tuláakal baʼal, tu yoʼolal le Máax tsʼáaikten u páajtalil in beetkoʼ›.» (Filiposiloʼob 4:13.)

«Le ka kíim in taataeʼ maʼ páajchaj in jáan creertikiʼ —ku yaʼalik Antonio—. Maʼ unaj u yúuchul tiʼiʼ, letiʼeʼ chéen juntúul inocente táan u máan teʼ calle ka jéentantaʼab tumen cocheoʼ. Pero maʼ páajchaj in beetik mix baʼaliʼ. Cinco días pʼáat en coma. Tu táan in maamaeʼ maʼ tin wokʼol pero ken pʼáatken tin juunaleʼ ku káajal in sen okʼol yéetel kin waʼalik: ‹¿Baʼaxten? ¿Baʼaxten?›.

»Teʼ kʼiinoʼoboʼ maʼ xuʼul in kʼáatik tiʼ Jéeoba ka u yaanten utiaʼal u jéetsʼel in wóoliʼ. Ka máan kʼiineʼ xuʼul in sen okʼol. Kʼaʼajteneʼ le Bibliaoʼ ku yaʼalikeʼ ‹junsúutuk u yúuchul wa baʼax›. Como in wojel maʼ tu páajtal u tuus Dioseʼ, in wojel yaan in kaʼa ilik in taata ken kaʼa kuxkíintaʼak.» (Eclesiastés 9:11; Juan 11:25; Tito 1:2.)

Robert, le máax t-aʼalaj teʼ yáax xookoʼ, ku yaʼalik xan: «Teen yéetel in wataneʼ t-uʼuyaj le jeetsʼelil ku yaʼalik Filiposiloʼob 4:6, 7, tumen orarnajoʼon tiʼ Jéeoba. Lelaʼ le áantoʼon tʼaan yéetel le periodistaʼob yoʼolal u esperanzail le kaʼa kuxtaloʼ. Kex kíim k-hijo yoʼolal junpʼéel accidente tiʼ avioneʼ, k-ojel yaan jatsʼuts súutukiloʼob t-máansaj tu yéetel. Letiʼe baʼax k-ilik k-kʼaʼajsikoʼ.

»Jujuntúul j-Jaajkunajoʼob, k-éet religioniloʼobeʼ, tu yiloʼob teʼ tele bix jeetsʼelil k-óol táan k-tsikbaltik baʼax k-creertikoʼ. Ka tsʼoʼokeʼ t-aʼalajtiʼobeʼ páajchaj k-beetik chéen yoʼolal le oracionoʼob tu beetoʼob t-oʼolaloʼ. Jach in waʼalikeʼ Jéeoba líiʼs k-óol yéetel le yaʼabkach mensajeʼob túuxtaʼabtoʼonoʼ».

Tuláakal lelaʼ ku yeʼesikeʼ Dioseʼ jeʼel u páajtal u líiʼsik u yóol máak kex jeʼel baʼaxak táan u aktáantikeʼ. ¿Jeʼel wa xan u líiʼsik a wóoleʼ? Jeʼeleʼ. Dioseʼ ku páajtal u yáantkech a aktáant jeʼel baʼaxak problemaileʼ. * Le oʼolaleʼ natsʼaba tiʼ Jéeoba, «le Dios mantatsʼ ku líiʼsaj óoloʼ» (2 Corintoiloʼob 1:3).