Junpʼéel baʼax jach jeʼel u yáantkoʼoneʼ letiʼe u líiʼsaʼal k-óol tumen k-láakʼtsiloʼob, k-amigoʼob yéetel tumen le sukuʼunoʼoboʼ.

Le jatsʼuts tʼaanoʼob ku yaʼalik juntúul k-amigooʼ jeʼel u beetik k-uʼuyikba maʼalobileʼ bey ka u tsʼakoʼoneʼ (Pro. 16:24; 18:24; 25:11). Baʼaleʼ maʼ chéen k-kʼáat ka líiʼsaʼak k-óoliʼ, baʼaxeʼ k-ilik «k-kiʼimakkúuntik u yóol le máaxoʼob ku muʼyajoʼoboʼ, ikil k-tsʼáaiktiʼob le kiʼimak óolal u tsʼaamajtoʼon Jajal Diosoʼ» (2 Cor. 1:4; Luc. 6:31). Antonio, juntúul sukuʼun ku beetik u superintendenteil tiʼ distrito tu luʼumil Méxicoeʼ, tu yilaj jach jaaj le baʼax ku yaʼalik le tekstoaʼ.

Le ka aʼalaʼab yaantiʼ junpʼéel kʼojaʼanil ku kʼaabaʼtik linfoma, cáncer ku yantal tu kʼiʼikʼel máak, jach lúub u yóol. Kex beyoʼ tu yilaj maʼ u chʼíikil u tukulte. ¿Bix tu beetil? Joʼopʼ u kʼaʼajsik le kʼaayoʼob ku beetaʼal teʼ muchʼtáambaloʼoboʼ, ku kʼayik yéetel ku tuukul tiʼ le baʼax ku yaʼalik le kʼaayoʼoboʼ. Jach ku líikʼil xan u yóol ken payalchiʼinak yéetel ken u xok le Bibliaoʼ.

Baʼaleʼ Antonioeʼ ku yaʼalikeʼ máaxoʼob maas líiʼs u yóoleʼ letiʼe sukuʼunoʼob teʼ múuchʼuliloʼ. Letiʼeʼ ku yaʼalik: «Teen yéetel in wataneʼ ken k-uʼuy jach lubaʼan k-óoleʼ k-aʼalik tiʼ juntúul k-láakʼtsil ku beetik u ancianoil ka taalak utiaʼal u payalchiʼ t-éetel. Beyoʼ jach ku líikʼil k-óol yéetel k-uʼuyikba maʼalobil. Úuchik k-áantaʼal tumen k-láakʼtsiloʼob yéetel tumen le sukuʼunoʼoboʼ, maʼ xáanchaj ka xuʼul u jach yaatal k-óoliʼ». Le sukuʼunaʼ jach kiʼimakchaj u yóol u yantal u amigoʼob líiʼsik u yóol yéetel eʼesik yaabilaj tiʼ.

Le kiliʼich muukʼoʼ jeʼel u yáantkoʼon xan ken muʼyajnakoʼoneʼ, apóstol Pedroeʼ tu yaʼaleʼ lelaʼ junpʼéel u «siibal» Dios (Hch. 2:38, Le Tumben Nuptʼan). Lelaʼ bey u yeʼesik le ka tsʼaʼab kiliʼich muukʼ tiʼ le disipuloʼob teʼ Pentecostés tu jaʼabil 33 tsʼoʼokok u taal Jesusoʼ. Bejlaʼeʼ jeʼel xan u tsʼaʼabaltoʼon le kiliʼich muukʼoʼ, yéetel jeʼel u páajtal k-kʼáatik le bukaʼaj kʼaʼabéettoʼoneʼ. Le oʼolaleʼ maʼalob ka k-kʼáat tuláakal le ku páajtaleʼ (Isa. 40:28-31).

Apóstol Pabloeʼ yaʼab baʼax tu muʼyajtaj, yaʼab u téeneleʼ óolak kíimik (2 Cor. 1:8-10). Baʼaleʼ maʼ sajakchajiʼ, tumen u yojel táan u yáantaʼal tumen Jéeoba. Pabloeʼ tu yaʼalaj: «Koʼox kiʼikiʼtʼantik Jajal Dios u Taata k-Yuumtsil Jesucristo, le Taata ku chʼaʼiktoʼon óotsililoʼ yéetel le Jajal Dios ku kiʼimakkúuntik k-óol mantatsʼoʼ. Jajal Dioseʼ ku kiʼimakkúuntik k-óol tiʼ tuláakal k-muʼyajoʼob» (2 Cor. 1:3, 4). Pabloeʼ maʼ chʼíik tuukul tiʼ baʼax ku muʼyajtikiʼ, baʼaxeʼ tu yilaj u kaanbal tiʼ baʼax tu muʼyajtaj, le oʼolal tu naʼataj bix u yuʼubikuba u maasil. Tsʼoʼoleʼ béeychaj u maas líiʼsik u yóol le máaxoʼob ku muʼyajoʼoboʼ.

Antonioeʼ le ka maas maʼalobchajeʼ tu kaʼa beetaj u superintendenteil. Letiʼeʼ suuk u yáantik kaʼach le sukuʼunoʼoboʼ, baʼaleʼ desde leloʼ letiʼ yéetel u yataneʼ maas ku bin u xíimbaltoʼob le sukuʼunoʼob kʼojaʼanoʼoboʼ. Ka bin u xíimbalt juntúul sukuʼun táan u muʼyajtik junpʼéel yaayaj kʼojaʼanileʼ, tu yojéeltaj maʼ taak u bin muchʼtáambaliʼ. Antonioeʼ ku yaʼalik: «Maʼ wa tumen maʼ u yaabiltmaj Jéeoba bey xan le sukuʼunoʼoboʼ, baʼaxeʼ le kʼojaʼaniloʼ tu lúuʼsaj u yóol, le oʼolal ku yuʼubik minaʼan u biilal u kuxtal».

Utiaʼal u líikʼil u yóol le sukuʼunoʼ, Antonioeʼ tu yaʼalajtiʼ ka u beet u payalchiʼil junpʼéel reunión social. Letiʼeʼ tu beetaj kex ku yuʼubik kaʼach maʼ u náajaltmaj u beetkiʼ. Antonioeʼ ku yaʼalik: «Jach jatsʼuts le payalchiʼ tu beetoʼ, ka tsʼoʼokeʼ pʼáat bey yaanal máakeʼ. Tu yuʼubaj kaʼa anchaj u biilal u kuxtal».

Maʼ u tuʼubultoʼoneʼ tuláakloʼon yaan kʼiin k-muʼyaj. Baʼaleʼ jeʼex tu yaʼalil Pabloeʼ le baʼaxoʼob k-muʼyajtikoʼ ku yáantkoʼon utiaʼal k-líiʼsik u yóol u maasil. Le oʼolaleʼ, koʼoneʼex ilik máaxoʼob ku muʼyajoʼob utiaʼal k-líiʼsik u yóoloʼob jeʼex u beetik Jéeobaoʼ.