Mix máak ilmil Dios (Éxodo 33:20; Juan 1:18; 1 Juan 4:12). Le Bibliaoʼ ku yaʼalikeʼ Dioseʼ juntúul espíritu, le oʼolal mix máak jeʼel u páajtal u yilkeʼ (Juan 4:24; 1 Timoteo 1:17).

 Chéen baʼaleʼ le ángeloʼoboʼ jeʼel u páajtal u yilkoʼob Dioseʼ tumen letiʼob xaneʼ espírituʼob (Mateo 18:10). Pero maʼ chéen letiʼobiʼ, yaan jujuntúul wíinikoʼobeʼ kéen kíimkoʼobeʼ ku binoʼob teʼ kaʼanoʼ yéetel u wíinkliloʼobeʼ ku suut espírituil, le oʼolal ku páajtal xan u yilkoʼob Dios (Filipenses 3:20, 21; 1 Juan 3:2).

 Yaan horaeʼ kéen u yaʼal le Biblia «u yilaʼal wa baʼaxoʼ» u kʼáat u yaʼaleʼ u naʼatik máak baʼax ku yaʼalik Dios (Isaías 6:10; Jeremías 5:21; Juan 9:39-41). Bey túunoʼ, máakeʼ jeʼel u páajtal u yilik Dios ikil u ‹jeʼekʼabtik u puksiʼikʼal› utiaʼal u tsʼáaik u fe tiʼ letiʼ yéetel u kʼaj óoltik u modos (Efesios 1:18). Le Bibliaoʼ ku yaʼaliktoʼon bix jeʼel u páajtal u yantaltoʼon le clase fejaʼ. Koʼox ilik jujunpʼéel baʼaloʼob kʼaʼabéet k-beetik.

•   Tiʼ le baʼaxoʼob u beetmaj Diosoʼ ilawil u jatsʼuts modos jeʼex u yaabilaj, u yutsil, u naʼat yéetel u poder (Romanos 1:20). Job juntúul máax chúukaʼan u yóol tiʼ Dioseʼ bey tu beetiloʼ, le ka tu yilaj tuláakal le baʼaxoʼob u beetmaj Diosoʼ tu yuʼubaj bey jach tu jaajil táan u yilkeʼ (Job 42:5).

•   Utiaʼal u kʼaj óoltik máak Dioseʼ kʼaʼabéet u xokik le Bibliaoʼ. Le Bibliaoʼ ku yaʼalik: «Wa ka kaxtik Dioseʼ letiʼeʼ yaan u chaʼik a kaxtik» (1 Crónicas 28:9; Salmo 119:2; Juan 17:3).

•   Utiaʼal ka páajchajak u kʼaj óoltaʼal Dioseʼ kʼaʼabéet xan u kʼaj óoltaʼal Jesús. Letiʼeʼ le ka anchaj way Luʼumeʼ jach claro bix úuchik u yeʼesik u modos Jéeoba, u Taataoʼ. Le oʼolal Jesúseʼ páajchaj u yaʼalik: «Le máax tsʼoʼok u yilkeneʼ tsʼoʼok xan u yilik le Taataoʼ» (Juan 14:9).

•   Beet baʼax ku yaʼalik Dios utiaʼal a wilik bix u bendecirkech. Jesúseʼ tu yaʼalaj: «Kiʼimak u yóol le máaxoʼob minaʼan baʼax kʼaas tu puksiʼikʼaloʼoboʼ, tumen yaan u yilkoʼob Dios». Tsʼoʼoleʼ jeʼex t-aʼalaj tu káajbaloʼ jujuntúul máaxoʼob kun kaʼa kuxtaloʼob utiaʼal u binoʼob teʼ kaʼanoʼ «yaan u yilkoʼob Dios» (Mateo 5:8; Salmo 11:7).

 Yaan jujunpʼéel tekstoʼob tiʼ le Bibliaoʼ ku yeʼeskoʼob bey yaan máaxoʼob ilmil Dioseʼ. Chéen baʼaleʼ wa k-xokik le versículoʼob yanoʼob táanil wa le yanoʼob paachiloʼ yaan k-ilkeʼ u jaajileʼ ángeloʼob túuxtaʼaboʼob tumen Dios utiaʼal u representarkoʼob. Wa yaan kʼiin xaneʼ Dioseʼ tu chíikbesubatiʼob ichil junpʼéel náay. Koʼox ilik baʼaxten k-aʼalik leloʼ.

 Ángeloʼob.

Úuchjeakileʼ Dioseʼ tu túuxtaj ángeloʼob utiaʼal u yaʼalikoʼob tiʼ wíinik baʼax ku tuklik letiʼ (Salmo 103:20). Por ejemploeʼ le Bibliaoʼ ku yaʼalikeʼ juntéenjeakeʼ Dioseʼ tʼaanaj yéetel Moisés desde junkúul chan cheʼ táan u tóochʼbal. Moisés «túuneʼ tu pixaj u yich, tumen sajakchaj u pakt u jaajil Diosoʼ» (Éxodo 3:4, 6). U jaajileʼ le tekstooʼ maʼ táan u yaʼalik wa jach tu jaajil ilaʼab Dios tumen Moisésiʼ, tumen tiʼ uláakʼ versículoeʼ ku yaʼalikeʼ «juntúul u ángel Jéeoba chíikpaj tiʼ Moisés» (Éxodo 3:2).

 Tiʼ uláakʼ tekstoeʼ, le Bibliaoʼ ku yaʼalikeʼ Dioseʼ «tʼaanaj yéetel Moisés bey jeʼex u beetik juntúul máak yéetel u yéet máakileʼ». Le jeʼeloʼ u kʼáat u yaʼaleʼ Dioseʼ tʼaanaj yéetel Moisés bey jeʼex u tʼaan kaʼatúul máaxoʼob jach maʼalob u biskubaʼobeʼ (Éxodo 4:10, 11; 33:11). Moiséseʼ maʼ tu yilaj Diosiʼ, tumen le baʼax tu tsʼáaj u yojéelt Dios tiʼ Moisésoʼ «tu tsʼáaj kʼaj óoltbil yéetel le ángeloʼoboʼ» (Gálatas 3:19; Hechos 7:53). Moisés kaʼacheʼ jach nojoch u fe tiʼ Jéeoba, le oʼolal le Bibliaoʼ ku yaʼalikeʼ le kéen tʼaanak kaʼach tu yéeteleʼ «bey táan kaʼach u yilik Dios le máax maʼ tu páajtal u yilaʼaloʼ» (Hebreos 11:27).

 Utiaʼal u tʼaan yéetel Abraháneʼ tiʼ Jéeobaeʼ meyajnaj xan ángeloʼob. Yaan máaxoʼob aʼalikeʼ le baʼax ku yaʼalik le Biblia teʼ Génesis capítulo 18, ku tsʼáaik naʼatbileʼ Abraháneʼ jach tu jaajil tu yilaj Dios (Génesis 18:1, 33). Chéen baʼaleʼ le Bibliaoʼ ku yeʼesikeʼ le máakoʼob yéetel tʼaanaj Abrahánoʼ ángeloʼob. Letiʼeʼ u yojel kaʼach Jéeoba túuxt le ángeloʼoboʼ, le oʼolal le ka tʼaanaj tu yéeteloʼobeʼ tu beetaj bey táan u tʼaan kaʼach yéetel Jéeobaeʼ (Génesis 18:2, 3, 22, 32; 19:1).

 Baʼaxoʼob tsʼaʼab u yiloʼob.

Yaan kʼiineʼ Jéeobaeʼ yaan baʼax tu tsʼáaj u yil wíinik utiaʼal u chíikbeskubatiʼob. Por ejemploeʼ le Bibliaoʼ ku yaʼalikeʼ Moisés yéetel uláakʼ israelitaʼobeʼ «tu yiloʼob Dios». Chéen baʼaleʼ leloʼ maʼ u kʼáat u yaʼal wa jach tu jaajil tu yiloʼob Diosiʼ, baʼaxeʼ u kʼáat u yaʼaleʼ «tu yiloʼob Dios tiʼ junpʼéel wayakʼ» (Éxodo 24:9-11). Le Biblia xanoʼ ku yaʼalikeʼ jujuntúul profetaʼobeʼ «tu yiloʼob Jéeoba» (Isaías 6:1; Daniel 7:9; Amós 9:1). Chéen baʼaleʼ le tekstoʼoboʼ ku yeʼeskoʼobeʼ maʼ jach tu jaajil tu yiloʼob Diosiʼ, baʼaxeʼ chéen yaan baʼax tsʼaʼab u yiloʼob (Isaías 1:1; Daniel 7:2; Amós 1:1).