Job 42:1-17
42 Job túuneʼ tu núukaj tiʼ Jéeoba:
2 «Beoraaʼ in wojel tuláakal baʼal ku páajtal a beetik,ku béeytal a beetik tuláakal baʼax ka tuklik.+
3 Techeʼ ta waʼalaj: ‹¿Máax le ku atrever u kʼaskúunt baʼaxoʼob kin waʼalik kex maʼ u yojel mix baʼaliʼ?›.+
Teneʼ tʼaanajen tiʼ nukuch baʼaloʼob maʼ in wojel bix yaniliʼyéetel maʼ in kʼaj óoloʼobiʼ.+
4 Techeʼ ta waʼalajten: ‹Beet uts a wuʼuyik baʼax ken in waʼale.
Yaan baʼaxoʼob ken in kʼáattech, teech túuneʼ unaj a núukikten›.+
5 Teneʼ in wuʼuymaj u yúuchul tʼaan tiʼ teech,pero beoraaʼ jach tu jaajil kin wilkech.
6 Arrepentidoen yoʼolal baʼaxoʼob tin waʼalaj,+kin kutal ich luʼum yéetel ich taʼan tumen arrepentidoen».+
7 Ka tsʼoʼok u tʼaan Jéeoba yéetel Jobeʼ, Jéeobaeʼ tu yaʼalaj tiʼ Elifaz le temanitaoʼ:
«Jach pʼujaʼanen ta contra yéetel tu contra le uláakʼ kaʼatúul máakoʼoboʼ,+ tumen teʼexeʼ maʼ ta waʼaleʼex u jaajil tin woʼolal jeʼex Job* tsʼoʼok u yaʼalik u jaajil tin woʼolaloʼ.+
8 Beora túunaʼ chʼaʼex siete wakaxoʼob yéetel siete tamanoʼobeʼ ka xiʼikeʼex yiknal Job. Unaj a beetkeʼex junpʼéel tóokbil sacrificio utiaʼal in perdonartik le baʼaxoʼob ta beeteʼexoʼ. Le kéen tsʼoʼokkeʼ Job le máax meyajtikenoʼ yaan u orar ta woʼolaleʼex.+ Teneʼ yaan in kʼamik baʼax ken u yaʼale. Maʼ ken in tratarteʼex jeʼex a merecerkeʼex úuchik a waʼalikeʼex chéen baʼaloʼob minaʼan u biilaloʼ, teʼexeʼ maʼ ta waʼaleʼex u jaajil tin woʼolal jeʼex Job tsʼoʼok u yaʼalik u jaajil tin woʼolaloʼ».
9 Le oʼolaleʼ Elifaz le temanita, Bildad le suita yéetel Zofar le naamatitaoʼ binoʼobeʼ ka tu beetoʼob le baʼax aʼalaʼabtiʼob tumen Jéeobaoʼ. Jéeoba túuneʼ tu kʼamaj le oración tu beetaj Joboʼ.
10 Ka tsʼoʼok u orar Job tu yoʼolal le óoxtúul máakoʼoboʼ,+ Jéeobaeʼ tu beetaj u xuʼulul u muʼyaj+ Job yéetel tu beetaj u kaʼa bin utsil tiʼ. Jéeobaeʼ tu tsʼáaj tiʼ Job u dobleil le baʼaxoʼob yaan kaʼach tiʼoʼ.+
11 Tuláakal u láakʼtsiloʼob yéetel u amigoʼob+ kaʼacheʼ binoʼob tu yiknaleʼ ka múul jaanoʼob yéetel Job tu yotoch. Tu líiʼsoʼob u yóol yéetel tu yaʼaloʼobtiʼ jach yaachajaʼan u yóoloʼob yoʼolal tuláakal le baʼaxoʼob chaʼab u muʼyajtik tumen Jéeobaoʼ. Cada juntúul tiʼ letiʼobeʼ tu síijoʼob tiʼ Job junpʼéel moneda de plata yéetel junpʼéel anillo de oro.
12 Jéeoba túuneʼ tu bendecirtaj u tsʼook u kʼiiniloʼob u kuxtal Job, maas ke tiʼ u káajbal.+ Job túuneʼ yanchaj 14,000 u yalakʼ tamanoʼob, 6,000 camelloʼob, 2,000 wakaxoʼob yéetel 1,000 x-burraʼob.+
13 Yanchaj xan uláakʼ diez u paalal, siete xiiboʼob yéetel óoxtúul koʼoleloʼob.+
14 Le yáaxoʼ Jemimá tu tsʼáaj u kʼaabaʼ, u kaʼatúuleʼ Kesías yéetel u yóoxtúuleʼ Keren-apuk.
15 Teʼ luʼum tuʼux kajaʼanoʼoboʼ minaʼan kaʼach uláakʼ koʼoleloʼob maas kiʼichpantakoʼob tiʼ u hijaʼob Job. Letiʼobeʼ tsʼaʼab xan u herenciaʼob le ka tsʼaʼab u herencia le xiʼipalaloʼob tumen Joboʼ.
16 Ka tsʼoʼok lelaʼ Jobeʼ kuxlaj 140 años maas. Tu yilaj u paalaloʼob, u yáabiloʼob, tak u yóox áabiloʼob.
17 Ka tsʼoʼokeʼ kíim Job, chéen baʼaleʼ yaʼab años kuxlaji yéetel jach kiʼimakchaj u yóol.
Notas
^ Ich hebreoeʼ ku yaʼalaʼal kaʼach «Job le máax meyajtikenoʼ».
