«Teneʼ yaan u seguer in tsʼáaikteʼex jeetsʼelil jeʼex le jeetsʼelil yaanteʼex beoraaʼ. Le jeetsʼelilaʼ maʼ jeʼex le ku tsʼaʼabal tumen le yóokʼol kaaboʼ. Le oʼolaleʼ maʼ a chaʼikeʼex u péek u yóol a puksiʼikʼaleʼex mix u chʼaʼik saajkil» (Juan 14:27, Túumben Luʼum).

 «Táan in bin, pʼáateneʼex ich jeetsʼel. In jeetsʼel kin tsʼáaik tiʼ teʼex. Baʼaleʼ maʼ táan in tsʼáaik jeʼel bix ku tsʼáaik jeetsʼel le máaxoʼob yóokʼol kaabiloʼ. Maʼ u saʼatal a wóoleʼex mix a sajaktaleʼex» (Juan 14:27, Quiliʼich Biblia ich Maya).

 Yéetel le tʼaanoʼobaʼ Jesúseʼ táan kaʼach u asegurartik tiʼ u apóstoloʼobeʼ jeʼel bix úuchik u tsʼaʼabal jeetsʼelil tiʼ letiʼeʼ, Dios xaneʼ yaan u tsʼáaiktiʼob jeetsʼelil le kéen yanaktiʼob problemas.

 ¿Baʼax túun kun áantkoʼob teʼ súutukiloʼ? Jesúseʼ tu yaʼalaj yaan u tsʼáaik u jeetsʼelil tiʼob. Leloʼ maʼ u kʼáat u yaʼal wa maʼ tun yantal problemas tiʼobiʼ mix wa maʼ kun muʼyajoʼobiʼ (Juan 15:20; 16:33). Kex sen beetaʼab u muʼyaj Jesús yéetel kíimsaʼab le ka taal way Luʼumeʼ anchaj jeetsʼelil tiʼ tu tuukul yéetel ichil u puksiʼikʼal (Lucas 23:27, 28, 32-34; 1 Pedro 2:23). Jesúseʼ tranquilo u yuʼubikuba kaʼach tumen u yojel jach yaabiltaʼan yéetel ku beetik u kiʼimaktal u yóol Jéeoba, a u Taata (Mateo 3:16, 17).

 Utiaʼal u yantal jeetsʼelil tiʼ u apóstoloʼobeʼ Jesúseʼ tu yaʼalajtiʼobeʼ jach u yaabiltmoʼob jeʼex yaabiltaʼaniloʼob tumen Jéeobaeʼ, tsʼoʼoleʼ tu yaʼalaj xan tiʼobeʼ ku lúubloʼob utsil tu táan Jéeoba (Juan 14:23; 15:9, 10; Romanos 5:1). Le jeetsʼelil yaantiʼob kaʼachoʼ ku taal tiʼ le fe ku yeʼeskoʼob tiʼ Jesúsoʼ leloʼ le áantoʼob utiaʼal maʼ u sajaktaloʼob yéetel maʼ u chiʼichnaktaloʼob (Juan 14:1). Kex Jesús maʼ tu seguer kaʼach u yantal tu yéeteloʼob way yóokʼol kaabeʼ, pero tu yaʼalajtiʼobeʼ u espíritu santo Dios kun áantkoʼob utiaʼal ka yanak jeetsʼelil tiʼob (Juan 14:25-27). Le oʼolal kex jeʼel baʼalak problemail ka yanaktiʼobeʼ jeʼel u páajtal u aktáantkoʼobeʼ (Hebreos 13:6).

 Tu kʼiiniloʼob Jesúseʼ kéen u saludartuba le máakoʼoboʼ suuk u yaʼalikoʼob tiʼ u maasil ka yanak jeetsʼelil tiʼob (Mateo 10:12, 13). Jesúseʼ maʼ chéen tu yaʼalaj tiʼ u apóstoloʼob ka yanak jeetsʼelil tiʼobiʼ, baʼaxeʼ tu tsʼáajtiʼob le jeetsʼeliloʼ. Le jeetsʼelil ku tsʼáaik Jesúsoʼ maʼ jeʼex le ku tsʼáaik le yóokʼol kaaboʼ. b Le jeetsʼelil ku tsʼáaik le yóokʼol kaaboʼ maʼatech u xáantal, tumen chéen ku taal tiʼ u biskuba máak yéetel uláakʼ máakoʼob, tiʼ le famaoʼ yéetel tiʼ le ayikʼaliloʼ. Pero le jeetsʼelil ku taal tiʼ Jesúsoʼ maʼatech u taal tiʼ le baʼaloʼobaʼ, le beetik kex ka yanaktoʼon problemaseʼ láayliʼ yaantoʼon jeetsʼelileʼ.

 Le tʼaanoʼobaʼ Jesús aʼal tiʼ le apóstoloʼob le áakʼab antes tiʼ u kíimiloʼ. Tu yaʼalaj xan tiʼobeʼ chéen junpʼíit kʼiin maas kun pʼáatal tu yéeteloʼob (Juan 13:33, 36). Le ka tu yuʼuboʼob leloʼ jach yaachaj u yóoloʼob (Juan 16:6). Le oʼolal líiʼsaʼab u yóoloʼob tumen Jesús utiaʼal maʼ u sen chiʼichnaktaloʼob.

 Le baʼax tu yaʼalaj Jesúsoʼ jach ku líiʼsik k-óol xan teʼ kʼiinoʼobaʼ tumen ku kʼaʼajsiktoʼoneʼ jeʼel u béeytal u yantaltoʼon jeetsʼelileʼ (2 Tesalonicenses 3:16). Kéen k-beetba u discípulo Jesúseʼ k-ilkeʼ letiʼ yéetel Jéeobaeʼ u yaabiltmoʼonoʼob yéetel k-lúubul utsil tiʼob (Colosenses 3:15; 1 Juan 4:16). Yoʼolal leloʼ toʼoneʼ maʼatech u sen píitmáan k-chiʼichnaktal, tumen k-ojel Jéeobaeʼ mantatsʼ ken u yáantoʼon (Salmo 118:6; Filipenses 4:6, 7; 2 Pedro 1:2).

 Utiaʼal a wilik tiʼ uláakʼ baʼaxoʼob ku tʼaan u libroil Juaneʼ chaʼant le videoaʼ.