1, 2. ¿Xigony ranino que la Biblia nac toib galrrascad ni rony que rabaladxno?

¿RASETNALADXLO toib cós ni rasac ni ximiglo biscad looy la? Diti nosi bioladxlo láani, láaca nigolú bisisni xcalnabanylo. Né ni biscadbu looy biduidybu diitz que rasac par láabu que looy nacloʼ ximigbu. Nandxichdo que looy biduidylo guixquix láabu por galrrascad ni cuaʼlo.

² La Biblia Dios biscad láani lóono, por ngú guixquixno láabu. Libro reʼ diti noʼ stoib xomod láani portín raslooyni lóono xidal cós ni dipa ñanno de stoib mod. Guienno láani scareʼ, la Biblia raiby lóono ximod goyaʼ guibá, vitzón, Gudxlio, primer buñguieeu né primer buñgonaʼ. La Biblia nap litz ni racné lóono guicalóno galnagan ni cadudyno ló né par diti tzóno ló galrasaʼ. Ló la Biblia rarexatzay ximod Jehová gony cumplir guirá ni ma goniʼbu, né ximod gonybu Gudxlio reʼ toib lagary sacroyen. ¡La Biblia nacní toib galrrascad ni rony que rabaladxno!

3. ¿Xí bislooy Jehová órni biduidybu la Biblia lóono, né xigony galrrascad reʼ rasis xcalnabanyno?

³ La Biblia nac toib galrrascad ni rasis xcalnabanyno  portín rasuidyni lóono ximod nac Jehová, Dios ni biscad láani lóono. Ni Jehová biduidy la Biblia lóono raslooybu que nainy láabu guimbutzaayno láabu. Scú láani, la Biblia racné lóono guibigno ronoʼbu.

4. ¿Xí ni más radziguiaʼlo mod ragaisy la Biblia?

⁴ Pal naplo toib Biblia, diti nosi looy naplo láani. Guidopyni o tigalaʼni rareʼni ló gahxca chop mil xhoopgayoʼ diitz ni raniʼ buñ, né más de gaʼ de cada chii buñ ni rabés ló Gudxlio nap toib Biblia. Scú láani, más de toib millón de biblias rareʼ guirá xomal. Xidal millón de biblias ma bireʼ guidopyni o tigalaʼni. Nandxichno, diti noʼ stoib libro xomod la Biblia.

5. ¿Ximod guienno ni la Biblia «sieetni de Dios»?

⁵ Per diti ngúsi, la Biblia «sieetni de Dios» (bíil 2 Timoteo 3:16). ¿Ximod guienno diitzreʼ? La Biblia láacani racapyni: «Buñguieeu goniʼ de Dios órni espíritu santo golonés layibu» (2 Pedro 1:21). Guislooyno láani modreʼ: Toib buñguieeu raiby xiin guicaʼ toib guiich. Guiich reʼ nac xpensary bixiosbu. Por ngú, guiich reʼ nacní xtuny  bixiosbu, diti xtuny xiimbu. Scúca la Biblia, napni xpensary Dios diti xtuny ni bicaʼ láani. Por ngú, guidopy la Biblia nacní «xtiitz Dios» (1 Tesalonicenses 2:13).

6, 7. ¿Xigony nigolú rien que guidopynac la Biblia toibsi mod radzak saʼ?

⁶ Íz ni gocla cuá la Biblia gocni más de tipmil xhoopgayoʼ íz. Buñ ni bicaʼ la Biblia diti toibsi tiemp bibanyibu, né gocyibu xidal clas buñ. Tipnésyibu buny dxiin ló layoo, gonás beel, gop xiil. Stipnés goniʼ xí gac ló dzú ni sietra, jueces, né ni buny mandary. Lucas ni bicaʼ toib Evangelio góc doctor. Ná ni bicaʼ la Biblia gocyibu xidal clas buñ, la Biblia radzak saʼni dada ro rasalóni né ro radopyni. *

⁷ Primer libro ni sitné la Biblia raniʼ ximod gosaló galnagan ló Gudxlio, né último libro ni sitnéni raslooy ximod Gudxlio sadxin sac toib Gudxlio móz. Guirá ni sieed ló la Biblia ranásni xidal mil íz de historia, né textos ni sitnéni raslooy xí ni nainy Dios gony ló dzú ni sietra, né ximod guirebuʼni. Mod radzak saʼ guirá libros ni sitné la Biblia, ronyni que guidziguiaʼno. Ndeʼ ni rabésno de toib libro ni raduidytzay diitz que sieetni de Dios.

8. Goniʼ ximod raslooy la Biblia que diti rachéni.

⁸ La Biblia diti raché. Goniʼni cós ni yása gann buñ. Guibiʼno ximod, libro ni laa Levítico napni leyes ni cuaʼ gudx Israel nírcu, ro goniʼni que ñacyibu buñ nayaa né que buñguitz nareʼ tiplad. Buñ ni golés gahxca layibu diti gon ndeʼ. Goyoʼ dzú buñ gadzé mod góc xpensary mod nac Gudxlio, la Biblia goniʼ que Gudxlio narikni (Isaías 40:22). Láaca la Biblia diti bichéni órni goniʼni  que «gudxlio nagalxigaʼbu láani labu» (Job 26:7). Scú, la Biblia diti nacní toib libro ni riné mbiox scuel. Per órni raniʼni xí ni rac ló Gudxlio diti rachéni. ¿Diti ndeʼ ni rabésno de toib libro ni sieed de Dios la?

9. a) ¿Ximod raslooy la Biblia que diti rachéni né labúu gapnó confianz órni raniʼni de historia? b) ¿Xigony buñ ni bicaʼ la Biblia bicaʼyibu láani modpa gocni?

⁹ La Biblia láaca órni raniʼni de historia diti rachéni né labúu gapnó confianz láani. Historia ni sitnéni rientzaayni que diti nosi ritlaa laayibu, la Biblia láaca rasetlaa de xí family sieedyibu. * Diti ronyni xomod buñ ni racaʼ historias, buñreʼ diti raniʼyibu órni xcudxyibu diti rony gann. Ni bicaʼ la Biblia diti bicachlan xitcal, goniʼ xcalkié né de xcudx. La Biblia nap toib libro ni laa Números, Moisés bicaʼ láani né ló libro reʼ bisetlabu galkié rodann ni bunybu, né ximod Jehová bilitz láabu (Números 20:2-12). Ni bicaʼyibu modpa gocni ndeʼ diti guirá buñ rony láani órni racaʼyibu toib historia, per ndeʼ radzelno láani ló la Biblia portín sieetni de Dios.

10. ¿Xigony diti radziguiaʼno que la Biblia racnégoluʼni lóono?

¹⁰ Por ni la Biblia sieetni de Dios, láani «rasuidyni buñ, rony censurar, rony corregir» (2 Timoteo 3:16). Scú láani, la Biblia nacní toib libro ni nigolú racné. Rientzaay que ni Bisaʼ la Biblia nann que buñgudxlio nap galkié. Lóono diti radziguiaʼno, portín Jehová Bisaʼ la Biblia, né nacbu Dios ni Bisaʼ lóono. Riembu xí noʼ ló xpensaryno né xí rasacno más que lóocano. Ni máspa, Jehová nann xí caquiinno par guiguaʼno sacrodiguieʼ. Láaca nambu xí néz diti galán par lóono.

11, 12. a) ¿Xí temas goniʼ Jesús ló Mateo 5 a 7? b) ¿Xí stipnés temas ni racnégoluʼ rasetlaa la Biblia, né xigony litz ni sitnéni guirá ór racnéni?

 ¹¹ Bunysi pensary ló discurs ni goloʼ Jesús ni sieed ló Mateo 5 a 7. Ló discurs sacroyen cú, Jesús goniʼ xidal temas ladni noʼ mod guibaladxno, ximod guiscuésno toib galradíil, ximod guininéno Dios né ximod guibiʼno bidxiich o cós ni rasac. Scú láani, diitz ni goniʼ Jesús napni  galnadip né racnéni dada ló xtzúno xomod dzú ni goniʼbu láani.

¹² Tipnés litz ni sieed ló la Biblia napni temas ni raniʼ ximod guibany family, dxiin, né ximod guidzakno stipnés. Litz ni goniʼ Jesús noʼni par guirá buñgudxlio né guirá ór racnéni. Galnann ni sitné la Biblia rarexani ló chop tzónsi diitz ni bicaʼ Isaías: «Naʼ, Jehová, Dios xtunylo, ni rasuidy looy par gacnéni looy» (Isaías 48:17).

13. ¿Ximod góc cumplir ni goniʼ Isaías xí gac né Babilonia?

¹³ La Biblia nap xidal profecías, xidalni ma góc cumplir. Guibiʼno tipnésni. Jehová biquiimbu Isaías ni bibany más de gatzgayoʼ íz dzú yása gál Jesús, goniʼbu que gudx Babilonia guinitlóni (Isaías 13:19; 14:22, 23). Láaca golexabu ximod gacni. Xidalguixo soldad ni nac xi enemig Babilonia naspichyibu guʼuc ni radudy gudxcú né soldad labúu ñoʼ sin nadíil. Per diti ngúsi, profecía ni bicaʼ Isaías goniʼ laa ni cayony mandary ni guinitló Babilonia ndeʼ góc laa: Ciro (bíil Isaías 44:27–45:2).

14, 15. ¿Ximod birebuʼ profecía ni goniʼ Isaías gac né Babilonia?

¹⁴ Chopgayoʼ íz de goló goniʼbu diitzreʼ, gueʼel 5 né 6 beʼo octubre ló íz 539 Antes de Xtzúno, xidalguixo soldad biguaʼyibu gahxca Babilonia. ¿Chú láabu gosanir ló xidalguixo soldad reʼ? Toib ni rony mandary Persia ni laa Ciro. Scú láani, guirá ndeʼ goyoʼni puext par ñac cumplir profecía reʼ. Per ¿labúu ñoʼ xidalguixo soldad par nanitlóyibu Babilonia sin ñonyibu xitcal, xomod goniʼ Jehová la?

¹⁵ Buñ ni rabés Babilonia noyibu ló toib lanii gueʼel cú né diti goyoʼyibu ló galrasaʼ portín nagoo muros gudxrop reʼ. Laʼga noyibu ló lanii, Ciro ni naní xcalrrien goleʼ toib biaas né bixel nís stoib lad ni ragoo Babilonia, modreʼ  nís biaʼach loni né scú soldadbu godudy guʼuc par nadxin gahxca muros. Per ¿ximod xidalguixo soldad Ciro labúu godudybu stiplad muros cú? ¡Gueʼel cú puert xtuny gudx Babilonia xobialsani, diti bisiegyibu láani!

16. a) Xomod goniʼ Isaías, ¿xí láani nasaclóo Babilonia? b) ¿Ximod góc cumplir profecía ni goniʼ Isaías que Babilonia sanitló por tipzó?

¹⁶ Jehová goniʼ ni gac né Babilonia: «Dipa sabés buñ lagarycu, né diti sioʼ dzú sabany buñ lagarycu. Né cú árabe diti sasaʼ yoʼ lairy ni nap, né buñ diti siné xilieen ni nap par guisaladx cú» (Isaías 13:20). Profecía reʼ diti nosi goniʼni que gudx reʼ guinitló. Ndeʼ bislooy que Babilonia guinitlóni por tipzó. Looy labúu gannlo que diitzreʼ nigolú góc cumplirni. Gahxca 80 kilómetros niis lad sur de Bagdad, de gudx Irak, noʼ yoʼ balaʼ ni biaʼan órni binitló Babilonia. Lagarycu diti noʼ chú rabés, ndeʼ raduidytzay diitz que birebuʼ ni góoch Jehová órni biquiimbu Isaías guiniʼ diitzreʼ: «Saloʼba láani né gobay ni ranitló» (Isaías 14:22, 23). *

17. ¿Xigony rony nadip fe ni napnó que guirá profecía ni sieed ló la Biblia rarebuʼni?

 ¹⁷ ¿Raduidyno cuent que ximod rac nadip fe xtunyno ni rarebuʼ guirá ni raniʼ la Biblia la? Scú, ni Jehová ma buny cumplir diitz ni goniʼbu nírcu napnó razón par gapnó confianz que láaca sarebuʼ gonybu Gudxlio reʼ toib lagary móz (bíil Números 23:19). Scú láani, lóono napno «toib esperanza de [guibanyno] tipzó portín Dios, ni diti labúu rascú, biduidybu xtiitzbu dada nírcu» (Tito 1:2). *

18. ¿Xí diitz ni radziguiaʼ buñ bicaʼ Pablo órni goniʼbu de «xtiitz Dios»?

¹⁸ Ni ma bisuidyno ló capítulo ralooytzay ni rony que guiluladxno que la Biblia diti noʼ stoib xomod láani.  Per láani diti nosi rasacni por ni radzakni guirá texto ni sitnéni, o ni napni historia ni diti raché o por ni nacní toib libro ni ralitz tzaay lóono o por ni napni profecías ni raduidy confianz lóono. Pablo bicaʼbu diitzreʼ: «Xtiitz Dios nabanyni, né napni galnadip, né más nadoxquiini que toib espad ni nadoxquii guirop lad, né riaʼisyni dada guitzoni alma né espíritu, né riaʼisyni dada ro racalsaʼ dxit né yób ni napni, né labúu ranni xí noʼ ló pensary né ni noʼ lainy galnabany» (Hebreos 4:12).

19, 20. a) ¿Ximod gacné la Biblia lóono gantzayno ximod nacno? b) ¿Ximod labúu guislooylo que rabaladxlo noʼ la Biblia, ni nac toib galrrascad ni diti noʼ stoib xomod láani ni Dios biduidy lóono?

¹⁹ Órni rolno «xtiitz» Dios labúu ratzáni mod nac xpensaryno. Racnéni guibiʼtzayno ximod nacno. Diti nosi guinino que nadxiʼno Dios. Per ni ronyno xomod ná la Biblia raduidyno diitz xí noʼ ló xpensaryno né xí noʼ lainy xcalnabanyno gonyno.

²⁰ La Biblia nigolúpa sieetni de Dios. Libro reʼ non golno láani, guisuidyno né gandxiʼno láani. Bíil nanoy la Biblia né scú guislooylo que rioladxlo xcalrrascad Dios. Ni gonylo ndeʼ sandxichlo más ni gony Jehová por buñgudxlio. Capítulo ni sieed guibiʼno xí ni gony Jehová né ximod sarebuʼni.