RANABDO looy bixal Biblia xtunylo ló Salmo 83:18 (82:19 ló tipnés Biblias). ¿Xí ná versículo reʼ? Traducción del Nuevo Mundo de las Santas Escrituras ná: «Par gan buñ que, looy, laalo ngú Jehová, nosi looy ngú ni noʼ más Guiaʼ ló guidopynac gudxlio». Stipnés Biblias rony traducir láani casi xomod ritlani reʼ. Per noʼ xidal Biblias ni rabeʼ laa Jehová né ratzá láani xomod «Señor» o «Dios». Per ¿xí diitz non nitné versículo reʼ? ¿Toib título, o laa Jehová?

Ló versículo reʼ ritlaa toib laa. Ló guiich ni nirdiguié cuá —ni cuá ló diitz hebreo, xomod casi ló guidopynac la Biblia— noʼ toib laa né diti noʼ stoib xomod láani. Laa reʼ racáni né letras hebreas יהוה (YHWH). Mod racáni diitza nacní Jehová né Yavé. ¿Toibsi buelt ritlaa laa reʼ ló la Biblia la? Diti scú láani, portín sieetni gahxca gatzmil buelt ló texto ni cuá nírcu ni laa Escrituras Hebreas.

¿Balaati rasac laa Dios? Gonyno pensary ló laay ni laa padrenuestro, mod bisuidy Jesucristo guininéno Dios. Rasalóni scareʼ: «Bixiosdo ni noʼ guibá, gac nayaa laalo» (Mateo 6:9). Diti xidzú de goló bisuidy Jesús ximod guininé buñ bixiosbu, láabu gonabbu lóo Dios: «Bixiosa, bunyxiroʼ laalo». Né Jehová ni Bisaʼ guiráxadit cós, cuapy láabu: «Naʼ ma bunyxiroʼya láani né sonyxiroʼya láani stoib» (Juan 12:28). Por ngú, riendxichni que laa Dios rasacgoluʼni. Per ¿xigony tipnés traductores goleʼ láani ló la Biblia né goloʼ stipnés títulos?

Raloyni noʼ chop razón ni más rasac por ni bunyibu láani. Primer, xidalyibu raniʼ que diti non guiquiinno laa Dios, portín diti nantzayno ximod goniʼ buñ láani. Portín ló diitz hebreo ni goniʼ buñ nírcu diti biquiinyibu letras a, e, i, o, u, né ló naareʼ ni toib buñ nantzay xí letras biquiinyibu par labúu goniʼyibu YHWH ló dzúcu. Per ¿guicaa ndeʼ lóono guinino laa Dios la?  Órni cuá la Biblia, laa Jesús sigory goniʼ buñ láani scareʼ Yeshúa o Yehoshúa; ni toib buñ nantzay ximodpa goniʼ buñ láani. Ná scú nacní, ló guidopynac Gudxlio xidal mod raniʼ buñ laa Jesús, ló cada gudx mod nac xtiitzyibu scú raniʼyibu laa Jesús. Ná buñ diti nann ximodpa goniʼ buñ laa Jesús ló primer siglo, diti rasian raniʼyibu láani. Scúca, pal looy ñelo stoib gudxrop, nacadiaglo que laalo ló stoib diitz gadzé mod raniʼ buñ láani. Por ngú, ni diti nánno ximodpa goniʼ buñ laa Dios nírcu diti nacní toib razón par diti guisaguelno guiquiinno láani.

Ni rarop razón por ni buñ rabeʼ laa Dios ló la Biblia, nacní por toib crenys ni gop buñ judíos. Xidalyibu rony crer que diti non guinino laa Dios. Riendxichni que layibu rienyibu mal ni Jehová buny mandary a israelitas: «Diti non guiquiinlo mal laa Jehová Dios xtunylo, portín Jehová diti sasian sin gony castigarbu ni raquiin mal Laabu» (Éxodo 20:7).

Scú láani, texto reʼ rony mandary lóono diti guiquiinno mal laa Dios. Per ¿raduidy ndeʼ diitz que diti labúu guiquiinno laabu né respet la? Yaca. Guirá buñguieeu ni bicaʼ la Biblia ló diitz hebreo («Antiguo Testamento») gocyibu buñ ni bisob Xiley Dios ni cuaʼ israelitas. ¿Xí láani buny guirá buñguieeu reʼ né laa Dios? Guirá ór biquiinyibu láani. Guibiʼno ximod, layibu bisetlayibu láani ló xidal salmos ni buny cantaryibu fuers lad xidalguixo buñ ni buny adorar Dios. Jehová láaca bixel buñ ni bisob láabu nasetlayibu Laabu, né layibu bisobdiitzyibu (Joel 2:32; Hechos 2:21). Por ngú, lóodo ni rasobdo láabu ló naareʼ diti riatzladxdo guiquiindo laa Dios né respet, xomod buny Jesús láani (Juan 17:26).

Órni traductores ratzáyibu laa Dios por títulos, ronyibu toib galkié rodann. Ronyibu que ralooypani Dios noʼ sit de buñ né que láabu diti nadxiʼbu buñ. La Biblia diti rasuidy ngú, láani náni que «Jehová radzaktzay buñ ni radzuiby láabu»(Salmo 25:14). Buny pensary ló toib ximigdxinlo. ¿Labúu naniʼlo que ximiglo láabu pal diti ñanlo ximod laabu la? Scúca láani né Dios. ¿Ximod labúu guidzakno Jehová pal diti nánno ximod laabu? Per diti ngúsi, buñ ni diti raquiin laa Jehová diti rimbu ximod rarexani. ¿Xí láani raduidy diitz laa Dios?

 Dios golexa ndeʼ a Moisés ni buny ni nábu. Órni Moisés gonabdiitz ximod laabu, Jehová cuapy: «Naʼ Gaca nitisi nainy naʼ gaca» (Éxodo 3:14). Scú láani, Jehová labúu gony guirá ni nainy láabu par guirebuʼ ni noʼ guicbu gonybu, láaca rabexani que ni bisaʼbu radxin rac o rony guirá ni raquiin gac par guirebuʼ ni nábu.

Gonyno pensary que labúu ñaclo nitisi nainy looy. ¿Xí láani ñonylo par labúu ñacnélo guirá ximiglo? Pal toibtica de layibu naxoʼ, labúu nadxin ñaclo toib doctor ni nann né nasial láabu. Pal stoib ximiglo nasnit bidxiich, looy labúu nadxin ñaclo ric né ñacnélo láabu. Scú láani, looy né xomod guiráno diti labúu gonyno ngú né diti labúu gacno nitisi nainy lóono. Per conforma guisuidylo la Biblia, sadziguiaʼlo ximod Jehová radxin rac guirá ni rac falt, par gony cumplirbu ni ma goniʼbu. Né rioladxbu guiquimbu xcalnadipbu par gacnébu buñ ni nadxiʼ láabu (2 Crónicas 16:9). Buñ ni diti nann ximod laa Dios, diti rimbu xí clas Dios nac Jehová.

Rientzaayni que laa Dios raquiin tzóni ló la Biblia. Órni nánno ximod rarexa laa Jehová né raquiinno láani par gony adorarno Bixiosno ni noʼ guibá, diti nagann gacni par lóono guibigaxno láabu. *