Nangin Makalilipay ang Akon Kabuhi

Panugiron ni Herawati Neuhardt

Natawo ako sa Cirebon, Indonesia. Ini nga siudad kilala sa matahom nga mga tela nga batik nga ginalugom kag ginapintahan sang lainlain nga mga desinyo. Ang akon kabuhi subong misyonera daw pareho man sa sini nga batik. Madamo man ako sing matahom nga eksperiensia sa lainlain nga mga kultura sa Southeast Asia kag sa South Pacific. Sugiran ko kamo kon ngaa.

ANG akon mga ginikanan mga Intsik nga natawo sa Indonesia. Sang 1962, sang napulo ako ka tuig, nagtuon si Nanay sa Biblia upod sa mga Saksi ni Jehova. Sang ulihi, nangin Saksi sanday Nanay kag Tatay, pati na ako, kag ang apat ko ka utod.

Pirme namon ginapadayon sa amon balay ang mga misyonero kag nagalakbay nga mga manugtatap kon magbisita sila para palig-unon ang amon kongregasyon. Daku gid ang epekto sa akon sang ila maayo nga mga halimbawa kag pagpalig-on. Sang 19 anyos ako, nagsulod ako sa bug-os tion nga ministeryo sang mga Cristiano. Pagkadason nga tuig, ginpamana ko ang German nga misyonero nga nag-abot sa Indonesia sang 1968 nga si Josef Neuhardt. Pagkatapos sang amon honeymoon, nagdiretso kami sa Sumatra, ang ikaduha sa pinakadaku sa sobra 17,000 ka isla sang Indonesia. Didto, gin-updan ko si Josef sa pagbisita sa mga kongregasyon sang mga Saksi ni Jehova subong nagalakbay nga manugtatap.

Pagwali sa Sumatra

Ang amon sirkito, ukon teritoryo, nagahalin sa mainit kag masako nga siudad sang Padang, sa West Sumatra, pakadto sa matahom nga Lake Toba, nga isa ka daku nga linaw sa bulkan nga ara sa kabukiran sang North Sumatra. Sang ulihi, gin-asayn naman kami sa bagatnan sang isla. Pirme lang kami nagasaylosaylo sakay ang amon daan nga Volkswagen Beetle. Nagaagi kami sa batsihon nga dalan sang kagulangan kag nagahawudhawod nga mga taytay nga human sa puno sang lubi. Nagapangalihid man kami sa matag-as nga mga bulkan. Kon gab-i, nagatulog kami sa salog sang simple kag magagmay nga mga balay. Wala ini sing koryente, gripo, ukon banyo. Nagapaligo kami kag nagapanglaba sa linaw kag mga suba. Simple lang ang kabuhi diri kag nanamian kami sa mga tawo. Ginapadayon nila kami  kag ginapakaon kag madamo ang interesado sa Biblia.

Sa Padang, nakibot gid ang mga Minangkabau, nga ang kalabanan Muslim, sang ginpakita namon sa ila sa Biblia nga ang Dios isa—indi Trinidad, subong ginasiling sang mga simbahan sang Cristiandad. (Deuteronomio 6:4) Madamo ang nagbaton sang magasin nga Lalantawan kag Magmata! kag ang iban nga interesado nangin alagad sang Dios. Sa Lake Toba, ang mga Batak, nga ang kalabanan nagapangangkon nga mga Cristiano, nakakilala sa ngalan sang Dios nga Jehova kay mabasa nila ini sa ila Batak nga Biblia. (Salmo 83:18) Pero kinahanglan pa sila tudluan parte sa Dios kag sa iya katuyuan parte sa katawhan. Madamo sa ila ang nagtuon sa Biblia kag nangin mapisan nga mga manugwali.

Pagwali sa Java

Sang 1973, gin-asayn kami ni Josef sa isla sang Java. Ang kadakuon sini katunga sang Great Britain kag may sobra 80 milyones ka pumuluyo. * Nagawali kami sang maayong balita sa mga Javanese, Sundanese, kag grupo sang mga Chinese.

Bangod nagdaku ako nga Chinese-Indonesian, madamo ako sing lenguahe nga nabal-an. Kabalo ako maghambal sing Javanese, Sundanese, Indonesian, kag Ingles. Gani madamo ako sing naistorya parte sa Biblia sa ila mismo nga lenguahe.

Ginsugiran ko parte sa kabuhi nga walay katapusan sa isa ka Paraiso nga duta ang isa ka masinulub-on nga 19 anyos nga babayi sa Jakarta, ang kapital sang Indonesia nga ara sa Java. Samtang nagabasa ako sang Biblia, naghilibion sia. “Salamat sa pagsugid sini sa akon, Auntie,” siling niya. Ini nga termino nagapakita sing pagpalangga kag pagrespeto. Nagsiling pa sia: “Kinahanglan ko pa gid buas ang 1.5 milyon rupiah [$160, U.S.] para sa akon tuition. Nagaplano ako nga ibaligya na lang ang akon lawas. Antes ka mag-abot, nagapangamuyo ako kon ano ang akon himuon. Amo na ini ang sabat. Indi ko gid pag-ibaligya ang akon kadungganan. Mauntat na lang anay ako eskwela.” Gusto sini nga babayi nga tudluan pa gid sia parte sa Biblia.

Sugod sadto, madamo pa gid nga Javanese, pati na mga Sundanese kag Chinese, ang nagsunod sa mga talaksan sang Pulong sang Dios. Gani, nangin mas malipayon kag malinong ang ila kabuhi subong ginpromisa sang Dios.—Isaias 48:17, 18.

Kalimantan—Lugar sang mga Dayak

Halin sa Java, nagsaylo kami ni Josef sa Kalimantan, ang ikatlo sa pinakadaku nga isla sa  bilog nga kalibutan (una Greenland kag ikaduha New Guinea). Isa ini ka probinsia sang mga Indonesian sa Borneo nga may masiot nga mga kagulangan, batuhon nga kabukiran, kag dalagku nga mga suba. Madamo sing mga Chinese, Muslim Malays, kag tumandok nga mga Dayak sa Borneo. Ang mga Dayak nagaistar sa mga suba kag nagapangpugot sila anay sing ulo.

Para makalab-ot sa maligwin nga komunidad sang mga Dayak, nagasakay kami sa sakayan ukon baruto kag nagaagi sa matahom nga mga suba sa kagulangan. May makita kami nga mga buaya sa kilid sang suba, mga amu sa kahoy, kag matahom nga mga pispis. Ang kabuhi namon didto subong misyonero makalilipay gid!

Ang kalabanan nga Dayak nagaistar sa matag-as sing haligi nga mga balay nga human sa kahoy. Ang iban sini magagmay, kag ang iban malaba nga ginaistaran sang pila ka pamilya. Madamo ang wala pa nakakita sang taga-Europa, gani daw artista si Josef. Nagadinalagan ang mga bata kag nagasinggit “Pastor! Pastor!” Dayon, matinumpok ang mga tawo para mamati sa mestiso nga ministro. May lokal nga mga Saksi nga naga-interpret sa pamulongpulong ni Josef, kag nagahimo sing kahimusan para sa mga pagtuon sa Biblia sa madamo nga interesado.

Sa Papua New Guinea

Sang Disiembre 1976, gindilian sang gobierno sang Indonesia ang mga Saksi ni Jehova bangod sa grabe nga pagpamatok sang iban nga relihion. Gani, gin-asayn kami ni Josef sa Papua New Guinea.

Pag-abot namon sa kapital nga Port Moresby, gintun-an namon sa sulod sang duha ka bulan ang isa ka lokal nga lenguahe nga Hiri Motu. Dayon nagsaylo kami sa Daru, isa ka gamay nga isla sa naligwin nga probinsia sa katundan. Didto, nakilala ko ang daku kag mapinalanggaon nga babayi nga si Eunice. Nagapulula ang iya unto kay madugay na sia nga nagamama. Sang matun-an ni Eunice nga gusto sang Dios nga mangin matinlo ang iya mga alagad sa pisikal, moral, kag espirituwal, gin-untatan niya ang iya bisyo kag nangin isa ka matutom nga Cristiano. (2 Corinto 7:1) Kada makita namon ining mapainubuson nga mga tawo nga nagasunod sa kamatuoran sa Biblia, narealisar namon nga matuod gid ang ginasiling sang Salmo 34:8: “Tilawi kag tan-awa nga maayo ang GINOO!”

Sang ulihi, nangin nagalakbay nga manugtatap liwat si Josef kag ginakadtuan namon ang halos tanan nga lugar sa Papua New Guinea, nga may mga 820 ka lenguahe. Para madamo kami sing maistorya, nagtuon pa gid kami sing Tok Pisin, nga amo ang kinaandan nga lenguahe. Para makalab-ot sa mga banwa kag iban nga lugar, nagalakat kami ukon nagasakay sa salakyan, sakayan, baruto, kag gamay nga eroplano. Grabe man ang init, madamo sing lamok, kag pirme lang kami gina-malaria.

Sang 1985, ginbaton naman namon ang isa ka bag-o nga asaynment subong misyonero sa Solomon Islands, sa sidlangan sang Papua New Guinea. Nagboluntaryo kami didto sa opisina sang mga Saksi ni Jehova. Nagalibot man kami sa bug-os nga Solomon Islands para palig-unon ang mga kongregasyon kag mag-attend sa mga asembleya. Nagtuon naman kami liwat sing bag-o nga lenguahe, ang Pidgin. Nanamian gid kami mag-istorya sa mga tawo didto kay palabasa sila sang Biblia!

Ang Pinakamabudlay nga Pagtilaw

Sang 2001, nagbalik kami ni Josef sa Jakarta kay nag-untat na ang pagdumili sa mga Saksi ni Jehova sa Indonesia. Pero sang ulihi, nabal-an nga may malignant melanoma ang akon bana, isa ka malala nga sahi sang kanser sa panit. Nagbalik kami sa ila lugar sa Germany para magpabulong. Pero sang 2005, sa amon ika-33 nga anibersaryo sang kasal, napatay sia sa edad nga 62 kag nagahulat nga banhawon sa Paraiso sa bag-o nga kalibutan. (Juan 11:11-14) Nag-alagad sia sing 40 ka tuig sa bug-os tion nga ministeryo.

Nagpabilin ako sa Jakarta subong isa ka misyonera. Nahidlaw gid ako sa akon bana. Pero naatubang ko ini paagi sa pagtudlo sa iban sing kamatuoran sa Pulong sang Dios. Ang akon ministeryo nagahatag sa akon sing kalipay kag katuyuan sa kabuhi. Makasiling gid ako nga ginhatagan ako ni Jehova sing pinakamakalilipay nga kabuhi.

[Nota]

[Mapa sa pahina 25]

(Para sa aktual nga pormat, tan-awa ang publikasyon)

INDONESIA

Java

JAKARTA

Cirebon

Sumatra

Padang

Lake Toba

Borneo

PAPUA NEW GUINEA

PORT MORESBY

Daru

SOLOMON ISLANDS

[Retrato sa pahina 26]

Si Herawati upod sa mga ginatun-an sa Biblia sa Solomon Islands

[Retrato sa pahina 26]

Upod kay Josef sa Holland, antes sia napatay sang 2005