Ngaa Madamo ang Nanamian sa Espiritismo?

ANG sabat sa sini nga pamangkot mahimo nagadepende sa imo kultura, ginapatihan, kag gindak-an. Ngaa ang pila ka tawo sa inyo lugar naganyat sa espiritismo? Mahimo amo ini ang pila sa mga rason:

● Pagka-curious Natural lang nga ma-curious kita sa misteryoso nga mga butang. Amo gid sini ang espiritismo, gani gusto mabal-an sang iban kon may gahom gid man sa likod sini. Ang pila nagahuluhampang sang spirit of the glass ukon nagabasa sang horoscope para mabal-an kon matabo gid man ang ginahambal sini. Ang iban naman nagakadto sa psychic kag sa mga nagapakig-istorya sa espiritu.

● Kalingawan Sang nagligad lang nga mga tinuig, nagdagsa ang mga libro, pelikula, kag mga hampang sa kompyuter parte sa espiritismo kag relihioso nga mga disparatis sang mga pagano. Ang pila sa sini nagaunod man sing grabe nga kasingki kag binastos.

● Kabalaka kon ano ang matabo sa palaabuton Ang Biblia nagsiling: “Sa katapusan nga mga adlaw magaabot ang makahalanguyos nga mga tion nga mabudlay atubangon.” (2 Timoteo 3:1) Nagabudlay na gid man subong ang aton tion, kag madamo nga tawo ang nagapangayo sing bulig sa mga espiritista, astrologo, manugpakot, manughimalad, kag mga psychic. “Isa ini sa mga negosyo nga indi apektado sang ekonomiya,” siling sang isa ka psychic. ‘Nagakadto sa amon ang mga tawo kon may problema.’ Ang isa ka manugpakot sa Canada nagsiling: ‘Bangod sa mga nagkalatabo sining karon lang, bisan ang mga propesyonal nagapinanawag sa akon para mangayo sing bulig.’ Nagdugang pa sia: “Sang una ini nga mga tawo wala gid nagapati ukon nagakadto sa mga psychic.”

● Balatian Sa pila ka lugar, ang mga tawo nga may grabe nga balatian nagapabulong sa mga siruhano imbes sa mga doktor. Abi nila gintuyawan sila ukon ginhiwitan. Gani bisan mahal ang bayad, ginadala sila sang ila mga abyan ukon paryente sa siruhano para mag-ayo.

● Pangamlig kag pangpasuerte Sa pila ka lugar sa Aprika, ang mga pumuluyo nagabayad sa “propeta” sang karismatik para tabugon ang malain nga espiritu paagi sa “bendita” kag ginainom nga mga bulong. Sa iban naman nga lugar, may nagakadto sa mga espiritista para suertehon ang ila bag-o nga balay kag magpabulig sa mga patay.

● Proteksion sa kabataan Sa Papua New Guinea, wala ginapagua sang iloy ang iya bag-ong bun-ag nga bata kon gab-i kay basi tuyawan ini. Sa Uganda, ang mga iloy may ginahigot sa kamot kag tiil sang ila mga lapsag, kon kaisa beads ukon shell, para indi ini pagtuyawan.

● Pagkapatay sang pinalangga Ang British nga awtor nga si Sir Arthur Conan Doyle napatyan sing bata, utod, bayaw, kag hinablos sang Bug-os Kalibutan nga Inaway I. Bangod sa grabe nga kasubo, nagkadto sila sang iya asawa sa mga espiritista para maistorya ang ila napatay nga bata. Madamo man ang nagahimo sini subong. Sa iban naman nga lugar, ginatudlo sang pila ka relihion kag sang “Cristiano” nga mga simbahan nga nagakapatay ang mga tawo bangod sa akig nga mga espiritu. Gani, nagahimo sila sing lainlain kag  malahalon nga mga ritwal para indi na magsunodsunod ang kamatayon sa ila komunidad.

● Kahadlok sa patay Ang mga pagpati parte sa kamatayon kag sa mga patay may daku gid ang epekto sa mga tawo. Gani sa madamo nga lugar, may lainlain nga ritwal para pahamut-an ang patay ukon “pamatud-an” ang pagpalangga sa ila. Lakip na diri ang pagsakit sa kaugalingon. Sa pila naman ka isla sa Pasipiko, ginapasuksok ang mga balo sing itom nga bayo kag ginapalalaw sing binulan. Ginapriso sila sa balay kag wala ginapakaon sang paborito nga pagkaon sang napatay. Ang mga nagahimo sini puede nga ma-depress, magmasakit sa gutom, ukon mapatay pa gani.

Ginapakita sini nga makagalanyat gid ang espiritismo. Gani importante nga mabal-an naton kon diin gid ini naghalin. Usisaon naton ang Biblia, ang libro nga amo lamang ang nagapaathag kon ano gid ang espiritismo.