Շաբաթը երկու անգամ Եհովայի վկաները ժողովի հանդիպումներ են անցկացնում իրենց երկրպագության վայրերում, որոնք կոչվում են Թագավորության սրահ։ Ի՞նչ են նրանք անում այնտեղ, և ի՞նչ օգուտներ կարող ես քաղել՝ այդ հանդիպումներին ներկա լինելով։

•  Ի՞նչ են անում Թագավորության սրահում

•  Ինչո՞ւ արժե ներկա լինել

•  Ինչ են ասում հասակակիցներդ

 Թագավորության սրահում աստվածաշնչյան գործնական կրթություն է տրվում։ Այնտեղ անցկացվող ժողովի հանդիպումները կարող են օգնել քեզ.

•   սովորելու Աստծու մասին ճշմարտությունը,

•   հասկանալու տեղի ունեցող իրադարձությունների նշանակությունը,

•    դառնալու ավելի լավ անձնավորություն,

•    գտնելու լավ ընկերներ։

 Գիտեի՞ր արդյոք։ Եհովայի վկաների ժողովի հանդիպման վայրը կոչվում է Թագավորության սրահ, քանի որ այնտեղ հաճախ է խոսվում Աստծու Թագավորության մասին (Մատթեոս 6։9, 10; 24։14; Ղուկաս 4։43)։

 Այնտեղ տրվող տեղեկությունը օգտակար կլինի։ Եհովայի վկաների ժողովի հանդիպումներին քննարկվող աստվածաշնչյան սկզբունքները կօգնեն քեզ «ձեռք բերելու իմաստություն» (Առակներ 4։5)։ Դա նշանակում է, որ Աստվածաշունչը կարող է օգնել քեզ ճիշտ որոշումներ կայացնելու կյանքում։ Այն կարող է նաև պատասխանել ամենակարևոր հարցերին, որոնցից են.

•   ո՞րն է կյանքի իմաստը,

•   Աստվա՞ծ է մեր տառապանքների պատճառը,

•   ի՞նչ է լինում, երբ մահանում ենք։

 Ստորև բերված են մեր շաբաթավերջի հանդիպումներին ներկայացվող ելույթներից մի քանիսի վերնագրերը։

•   Ինչո՞ւ առաջնորդվել Աստվածաշնչով։

•   Որտե՞ղ կարող ես օգնություն գտնել նեղության ժամանակներում։

•   Ինչ է Աստծու Թագավորությունն անում մեզ համար այսօր։

 «Դասարանցիներիցս մեկը եկավ ժողովի հանդիպման։ Նա նստեց մեր ընտանիքի հետ, և մենք առաջարկեցինք, որ նա օգտվի մեր գրքերից։ Վերջում նա ասաց, որ իրոք տպավորված է հանդիպման ժամանակ ներկաների տված մեկնաբանություններով։ Նաև ասաց, որ իր եկեղեցում չկան ուսումնասիրության այնպիսի նյութեր, ինչպիսիք մենք ունենք» (Բրենդա)։

 Գիտեի՞ր արդյոք։ Թագավորության սրահում նստատեղերն անվճար են, և հանգանակություն չի հավաքվում։

 Շփումը կքաջալերի քեզ։ Աստվածաշունչն ասում է, որ քրիստոնյաների՝ միասին հավաքվելու պատճառներից մեկը միմյանց քաջալերելն է (Եբրայեցիներ 10։24, 25)։ Աստծուն և ուրիշներին իրենց շահերից վեր դասող մարդկանց հետ շփումը թարմացնող է այս մեծ մասամբ եսակենտրոն աշխարհում։

 «Երկար օրից հետո երբեմն տխուր և ուժասպառ եմ լինում, բայց երբ Թագավորության սրահում շփվում եմ մարդկանց հետ, միշտ լավ զգացումներ եմ ունենում։ Հանդիպումից հետո տունդարձի ճանապարհին ուրախություն եմ զգում և պատրաստ եմ դիմավորելու հաջորդ օրը» (Էլիզա)։

 Գիտեի՞ր արդյոք։ Ողջ աշխարհում՝ ավելի քան 60 000 վայրերում, Եհովայի վկաների՝ 120 000-ից ավելի ժողովներ կան։ Ամեն տարի միջին հաշվով 1 500 Թագավորության սրահներ են կառուցվում, քանի որ ժողովի հանդիպումներին հաճախողների թիվը գնալով շատանում է։ a