Capita Mudri Drini Oromi

Mi Awi Leta Munguniri ma Alea

Mungu ni lezu ri ma ifi ngoni ya?

Ama ecoki awi leta Munguniri ma alea ngoni ru ya?

Yehovani ni nga ’ba awipi leta ini ma alea ’diyi ni orodri ngori fe ya?

MI ’DU nga ecetasi mi mu geria isu deresi ozoo le ’di oli akuku ru ri pie. Angu ’bua ri bi ini. Ovi e’do di ofi lere lere, angu onoza pie, vutinia ozoo e’de kpaci. Mi o’bi mi ari mbele mbele, ecozu pari ndazu apazu mi zizo alenia. Coti, geri ma tia ogogo, mi ndre jo azini. Jo nde ri okporu, a’wi, azini e’da kililiru. Adaru mi nga o’a ayikosi pari ’dasi!

² Ama o’a wudrikuru trotro sipiru sawa ozoo ni ’dizu oli pie azini ovi pie ’dile ri ma alea. E’yo wudrikurua ’diyi ezaki di eyi teke teke eyi di mu eyi ezasi drile drile. Te jo kililiru amani ecozu apazu ama zizo alenia ri ci, eri pari ecopi ama ta mbapi afa onzi ’diyi ma aleasi ri. Pari nde ri ngoi ya? Biblia kini: “Ma nga ’yo Yehova ni ’dini: ‘Mi pari mani ma ta mbazu aleniari’i, azini kali mani abi be okporuri indi, mi Mungu mani ma asi ’bazu drinia ri’i.’”—Zaburi 91:2, NW.

 ³ Mi ega nga e’yo ’di! Yehova, O’bapi azini Okpoe’i afa woro ni ri, eco ovu angu mini apazu mi zizo ri ru. Eco ama ta mba kilili, a’dusikuni okpo erini ri aga ’ba dria kaniku afa dria lepi ama dri fupi ’diyi niri ra. Akaki tro ’ye dri ja ra ti, Yehova eco dri jaza atri ra. Ama ecoki di Yehovani ’ba pari amani apazu zizoru ri ru ngoni ngoni ya? Le ama ’baki asi amani eri ma dria. O’bazu ’da ma dria, E’yo Munguniri ’yo amani ’dini: “Emi ma mba emi ngulupi ma ta ale Mungunisi.” (Yuda 21) Ada, le ama ma awiki leta Munguni ma alea, leta amani ama Ata ’bua ri lezu ri ma ta mbazu kilili beni. ’Dini ama di nga o’a asi ’baza si kini eri pari amani apazu zizoru ri. Te ama ecoki agyi ’daleri ’ba ngoni ru ya?

LETA MUNGU NIRI NIZU AZINI A’IZU RI

⁴ Amani ecozu awizu leta Mungu niri ma alea, le ama a’iki geri Yehova ni ima leta e’dazu amani ’diyi ki. Mi ega nga e’yo azi Biblia ni imba mini oni buku ’di ma alea ’bo ’diyi ki. Erini ovuzu O’bapi i risi, Yehova fe amani nyaku ’diri aku kilili ni ru. O’ba alenia nyaka yi, afa azi ndu ndu ’diyi pie, anyapa pie, azini angu ndrizaru ’diyi pie. Erini ovuzu agu Biblia sipi niri i risi, Mungu ece amani ima ru azini adriza erini ’diyi pie ra. Vini indi, E’yo erini ri ece amani kini epe Mva ini a’dule, Yesu ma ti nyakua emuzu dri cizu azini drazu amasi beni. (Yohana 3:16) Feta nde ’di ma ifi di amani ngoni ya? Eri amani asi ’baza fe ewu driale onyiru ri ma dria.

⁵ Asi ’baza amani ewu driale ri ma dria ri vini ci indi afa azi Munguni ’ye ’bo nisi. Yehova ’ba gamete ’bua, Suru Mesia niri ’bo. Ace were eri nga asiza candi nyaza niri eji azini eri nga nyaku ’diri oja paradisi ru. Mi ega ce nga! Ama ecoki o’a ’dale asi anzu si azini ayikosi ’dani ’dani. (Zaburi 37:29) Te sawa ’disi ria, Mungu fe amani azakoma ecozu o’azu geri kililiru si ndepi niri ra. Fe vini amani driwala izita ni, amani  ecozu e’yo nzezu eri be sawa ci ri ma alea beni. ’Diyi lu geri azi were Yehovani i ma leta e’dazu ’ba woro eyini azini mi ngulupi ni ri.

⁶ Zita okporu le mi ma zi mi ngulupi ani ra ri ’di: Ma nga leta Yehova niri ma ti omvi ngoni ru ya? ’Ba kakau ecoki nga ’yo, “Ada, le vini ma ma le Yehovani erini ma lele ri le.” ’Dari egata mini indi ya? Yesu ’yo kini azita ’di aga azi ’diyi ki dria ra: “Mi ma le Yehova Mungu mini mi asi driasi, mi orindi driasi, ondua mini driasi.” (Matayo 22:37, NW) Adaru asisile mini Yehova Munguni lezu ’diyi tre. Te mini lu egazu kini mi le Yehova Mungu ni ra ri ma ifi di kini mi le eri mi asi driasi, orindi driasi, azini ondua driasi ra ’dini ya?

⁷ Ekile Biblia ni ecele ri le, leta Mungu ni lezuri aga mini lu egazu kini mi le eri ra ri te. Adanisi, egaza mini ega kini mi le Yehova ni ra ri ni tro ovuzu orodriru ra ti, egaza ’dale ri lu e’doza mi ma leta eri lezu asi adasi rini. Pati ma ori eri orodriru ’bani ecozu pati ma efi isuzu beni. Mi ka pati efi le, te agu azini fe mini ori ni a’dulesi, mi o’a ayikosi ra ya? Ecoru ku! Tro tro ’dinile, egaza Yehova Mungu ni lezuri lu e’doza ni. Biblia imba kini: “Leta amani Mungu lezuri ’di, amani azita erini ma ta mbazuri’i. Te azita erini ovuni nzizaru ku.” (1 Yohana 5:3) Leta adari e’dazu Mungu ni, le efi ’yaza ni ma ovu ci.—Matayo 7:16-20.

⁸ Ama leta amani Munguni lezuri e’da amani eri ma azita ma vuti ki obizu risi azini amani vini e’yo ni ’diyi ki ’yezu ’yetasi risi. ’Yezu ’diniri ovuni ewaru ku. Kani ra ria, azita Yehovani ’diyi ki fe ama o’a idri muke, ayiko ru, azini kilili risi.  (Isaya 48:17, 18) Azita Yehova niri ma vuti obiza si, ama e’da ama Ata ’bua rini kini ama o’a awa’difo si afa dria erini ’ye amani ’diyi ki si. Drile onzi ru, wudrikuru ’di ma alea ’ba were ki lu awa’difo ’dileri e’da ni. Le ama ma ovuki awa’difo kokoru, ekile ’ba azi ewu Yesu ni ndra ovuzu nyakua ria risi ’diyi ma azi dri ri le ku. Yesu ati ndra ’ba mudri ofu be ’diyi ma rua, te ’ba alu a’dule eda dri vile erini awa’difo fezu ni. (Luka 17:12-17) Adaru le ama ma ovuki agu alu awa’difo fepi ’da le, ovuni oromi awa’difo fe pi ku ’diyi le ku!

⁹ Ani e’yo ’disi, azita Yehovani le ama ma obiki vutini ki ra ’diyi ngoki ya? Ama oniki di eyi ma kakau ki buku ’di ma alea ’bo, te ama ma neki nga eyi ma azi were ni ki dika. Azita Munguni ’diyi ma vuti obizu ri nga ama aza ko awizu leta Munguniri ma alea.

SAWA DRIASI MI ESI MI OGOGO YEHOVA VU

¹⁰ E’yo onizu Yehova ma dria ri geri aluzo ndepini mini ecozu mi esizo enyia ogogo eri  vu ra ri. ’Diri afa azini alu ecopi i depi ku ri. Ecetasi mi ka ovu amve inisi angu ambiza ma alea aci yu ria, mi eco le aci ma anyute ’dini ra ya? Yo. Mi ngani ku eja ’bazu aci ma alea erini ecozu vezu drile drile beni ku. Mi eco lu ovu ’daa ci aci ’dasi! Ekile eja ni fezu aci ni ve rile, vini indi “nita ’bani Mungu nizuri” ama ma leta Yehova niri ’ba okporu.—E’yo O’beza 2: 1-5.

¹¹ Yesu le ’ba i ma vuti obipi ’diyi ma feki leta eyini Yehovani lezu E’yo Erini adaru aje be tu ri be ri ma ovu idriru azini okporu. Engata erini ma vutia, Yesu imba ’ba iri ima vuti obipi ’diyi pi ma azi ni e’yo ondriza sile E’yo Okuri ma alea ’yepiru ima dria ri ma azi ki. E’yo ’da fe ndra ’ba ’diyi pini egazu ngoni ya? Vuti vuti ru ’yoki ’dini: “Ama asi veni te ama alia erini e’yo ’yoria ama tia geria, erini e’yo siza ma efi eceria ama dri ku ya?”—Luka 24:32.

¹² Mini ndra e’yo Biblia ma alea ’diyi onizu okorisi ria, mi isu ndra ne mi asi ri ve ayikosi, avasi, azini leta Mungu ni lezu risi ku ya? Adaru ’ye i ra. ’Ye vini i ’dile ’ba kakau be ’bo. E’yo di ’dia ewaru ri leta ’da ma ta mbazu idriru azini fezu erini zozu ri. Le ama ma obiki adriza wudrikuru curu’do ’di ni ri ma vuti ku. Yesu ’yo ndra ’dini: “’Ba kakau ma letani nga ambi ra.” (Matayo 24:12) Mi eco di fe mi ma leta Yehovani lezu azini e’yo adaru Biblia ma alea rini ambizu ku ngoni ru ya?

¹³ Le mi ma mu drile onita Yehova Mungu ma dria ri isuzu azini Yesu Kristo ma dria ri be. (Yohana 17:3) Mi dro asisile, azini mi ega e’yo angiri tu afa mini oni engazu E’yo Munguni ma alea ’diyi ma dria, azini mi zi mi ngulupi ceni ’dini: ‘E’yo afa ’di ni imba mani Yehova Mungu ma dria ri ngoni ya? Asisile azi e’yo ’di ni fe mani dika eri lezu ma asi driasi,  ondua driasi, azini orindi driasi ri ngoni ya?’ (1 Timoteo 4:15) Egata ’dile ’diyi nga fe mi ma leta Yehovani lezuri nga mu drile drile ekile eja ni fezu aci ni ve imve ru rile.

¹⁴ Mungu ziza o’du driasi ri vini geri azi mini ecozu fezu mi ma leta Yehovani rini awizu okporu ri. (1 ’Ba Tesalonikia ’Diyi 5:17) Buku ’di ma Capita 17 ma alea, ama oniki ndra kini izita eri feta aje be tu engapi Mungu vuri’i. Ekile ’ba ada ma o’ata agyi ru rini zozu e’yo nzeza eyi ma eselea o’du driasi, azini asi adasi rile, geri alu ’dileri si agyi amani Yehova beri nga awi okporu azini idriru akaki izita izi o’du dria si ria. Le izita amani ma ovu aparaka ru ku—lu sawa driasi e’yo alu ri omvizu dika dika egata kokoru azini ifi kokoru ku. Le ama ma nzeki e’yo Yehova be ekile mva werea rini e’yo nzezu ima ati erini lele turi be rile. Vini indi, le ama ma nzeki e’yo inzita si, uri kokoru, asi adaru si, azini asi driasi. (Zaburi 62:8) Ada, Biblia lazu ama ngulupisi azini izita asi driasi ri eyi woko azi okporu ni inzita amani ri ni, azini eyi ama aza ko awizu leta Mungu niri ma alea.

MI ISU AYIKO INZITA MINI MA ALEA

¹⁵ Biblia lazu mi ngulupisi azini izita eyi inzita mini inzi misi a’dule ri. Curu’do, ama ma ’duki di nga inzita amani o’bi pie ri: e’yo nzezu ’ba azi diyi pie a’ita amani ma dria ri. Mi e’do e’yo adaru Biblia ma alea ri nze ’ba azi ’diyi pini ’bo ya? Mi ka e’do ’bo, ’dari e’yo azi onyiru tu ni. (Luka 1:74) Akaki e’yo adaru amani oni Yehova Mungu ma dria ri ki nze ’ba azi ’diyi pini, ama ’da azi orodriru ’bani fe Kristiani dria adaru ’diyi dri—e’yo baru Suru Munguni driri oluzu ri nga.—Matayo 24:14; 28:19, 20.

¹⁶ ’Ba ti pele Paulo ’du ndra e’yo oluza ini ri afa azi orodriru, aje nyapi tu ni ru. (2 ’Ba Korintoa ’Diyi 4:7) E’yo nzezu ’ba  yi be Yehova Mungu ma dria azini asisile erini ri be ri azi kililiru ndepi ni mini eco nga ra ri’i. Eri azi mini nga Opi kililiru ndepi ni rini, orodri onyiru ndepi niri ejipi ri. Mi ka azi ’diri nga, mi ’di ’ba asi ada be ’diyi ma aza ko eyini ecozu emuzu ama Ata ’bua ri vu enyia ogogo beni azini eyini ecazu geri ’ba  dricepi idri ’dani ’dani ri ma alea ria ri isuzu beni! Azi azi ’diri agapi orodri si rani ci ya? Dika, e’yo eti nzezu Yehova ma dria azini E’yo erini be ri nga fe a’ita mi ngulupi niri ni zozu azini eri ’bazu okporu. Yehova ni okpo mini ’diyi ma e’yo ba asia. (’Ba Ebraniani 6:10) Azi ’diri ngazu asi driasi ri nga fe mi awi leta Munguniri ma alea.—1 ’Ba Korintoa ’Diyi 15:58.

¹⁷ Le ama ma niki ra azi e’yo adaru ri oluzu ri le ama ma nga mbele mbele. Biblia ’yo kini: “Mi ma olu e’yo, mi ma olu mbele ru ’dani.” (2 Timoteo 4:2, NW) Le ama ma ngaki azi ’diri mbele mbele a’du ma e’yo si ya? E’yo Munguni ri omvi ’dini: “O’du amboru Yehovaniri ovu inyia, eri ovu inyia, eri emu mbele mbele tu.” (Zefania 1:14) Ada, ewu Yehovani ’yezu e’yo onzi dria dezu ri nga emu mbele ru. Le ’ba ma fe bilendu liza ’ba yini ra! Le ma niki ra kini sawa ’diri bani di yini ecozu Yehova ni ’bazu yima Okpoe’i ru ra ri. Asiza “ngani ovu vuleru ku.”—Habakuki 2:3.

¹⁸ Yehova le ama inziki i ’ba dria ma drilea tualu Kristiani ada ’diyi pie. ’Diri bani asisile E’yo erini rini ’yozu ’dini ri: “Ama alu alu ma dro asisile ama agyi ma e’yo dria, fezu leta pini zozu azi onyiru ’diyi be; ama ma ku okuza amani ama okuzu tualuri ja ku ’ba azinini kulerile, ama asi omizu ama eselia ama agyi be; emi ma ’ye ’dini aga ra emini ndrele o’du nderi eca ogogo risi.” (’Ba Ebraniani 10:24, 25) Akaki ama oku tualu Kristiani azi ’diyi pie, eri amani driwala fe Mungu amani lele turi inzizo. Ama vini okpo isu ama alu alu ma eselea.

¹⁹ Amani ama okuzu tualu ’ba azi Yehova ni inzipi ’diyi pie ria, leta azini agyi ama eselea kanisa ma alea ri di eca okporu. Eri orodri ru amani e’yo onyiru ’ba azi ’diyi niri ndrezu, ekile Yehova ni e’yo onyiru amani ri ndrezu rile. Le mi ma ’ba  mi dria kini ’ba dria a’ita ma alea ’diyi sawa driasi e’yo kilili ’diyi ’ye a’dule ’dini ni ku. Le mi ma ni ra zota ’ba alu alu ni orindi si ri ndu ndu dika ama dria e’yo eza ra. (’Ba Kolosaia ’Diyi 3:13) Le mi ’ba agyi ’ba ’ba Yehovani lepi asi driasi ’diyi pie, mini ngazu zozu orindi si beni. Adaru, Yehova ni inzizu mi adripika azini amvupika orindisi ’diyi pie ri nga mi azako awizu leta Munguni ma alea. Yehovani orodri ngole ri fe ’ba eri inzipi asi adaru si azini awipi leta erini ma alea ’diyi pini ya?

MI ISU “IDRI ADARI”

²⁰ Yehova ni ati’bo ini asi ada be ’diyi ni idri fe, te idri ngole ri’i ya? Ada, mi ovuni ’di idriru ku ya? Ama kakau ecoki ’yo ada ama idri ru. Adaru, ama ava se, ama afa nya, azini ama afa mvu. Ifini kini ama idri ru. Te etu azini si akaki ovu ayikosi, ama ecoki ’yo, “Idri adari bani ’di.” Te, Biblia e’da nditiri kini, ’curu’do ’ba azi o’api idri adari ma alea ni yo.

²¹ E’yo Munguni ’yo di amani kini ama “ma bi ani idri ada ada ri kirikiri.” (1 Timoteo 6:19, NW) E’yo ’di e’da adaru kini ama ecoki asi ’ba “idri ada ada ri” isuzu ewu driale ri ma alea ra. Adaru, ama ka ki eca ezata koko ’bo, ama di nga ovu idri ru ’dani ’dani, ifini kini ama di nga o’a ekile ndra Mungu ni le ama ma o’aki rile. Amani ngazu o’azu paradisia nyakua ’dia azo koko ru, asi anzu be, azini ayiko si ria, ama di nga ayiko “idri ada ada niri” isu—idri ’dani ’dani ri’i. (1 Timoteo 6:12) ’Di ovuni asi ’baza onyiru ni ku ya?

²² Ama di “idri ada ada ri bi ci” ngoni ru ya? E’yo Paulo ni si alu ’da ma alea, ’yo Kristiani ni kini “yi ma ’ye onyiru” azini “afa yini ovuzu yi be lonyiru kakau ’diyi ma ovu ’yeta onyiru ’diyi.” (1 Timoteo 6:18) ’Di e’da nditiri kini, e’yo okporu ri amani e’yo amani oni Biblia ma alea ’diyi ki ’yezu ’yeta si ri. Te e’yo Paulo ni ’yo ri ma ifi di kini ama ecoki “idri ada ada ri” isu afa amani ’ye ’diyi ki si ’dini ya? Yo, feta ’dile ’diyi “feta  ceni avasi” engapi Mungu vu ri. (’Ba Rumia ’Diyi 5:15) Te, Yehovani o’a ayikosi orodri fezu ’ba eri ma azi ngapi asi adaru be ’diyi pini. Eri le mini o’azu “idri ada ada ri” ma alea. Idri ’dile ayiko ru, asi anzu be, ’dani ’dani ri ewu dria ’dale ria ’ba awipi leta Munguni ma alea ’diyi pini.

²³ Le ama alu alu ma zi di ama ceni ceni ’dini, ‘Ma ’di adaru Munguni inzi geri erini fe Biblia ma alea ’ba ma inzi i ani ri si ya?’ Akaki ama zi ’dile o’du driasi, dika omvita ni ka ovu ee, ifini kini ama ’di geri kililiru ri ma alea. Ama ecoki di ovu uri koko nizu kini Yehova ni adaru pari amani apazu ama zizo ri. Eri nga ’ba ini a’ita be ’diyi ma ta mba ra e’yo ewaru ma aleasi ewu asiza ni ’diyi ma alea. Yehovani vini nga fe amani fizu wudrikuru o’diru ’yepi ecapi ri ma alea. Ama di nga ovu ayikosi fizu ewu nde ’da ma alea! Ama vini di nga ovu ayikosi amani peta kililiru ri pezu ewu asizu ’diyi ma alea risi! Mi ka peta ’dile ’diyi pe sawa ’di ma alea, mi nga “idri ada ada ri,” ndra Yehova Mungu ni le ’ba ada ni, ovupi ’dani ’dani ri isu ra!

E’YO BIBLIA NI IMBA RI

▪ Ama leta adaruri e’da Munguni amani eri ma azita ta mbazu azini e’yo alenia ’diyi ’yezu ’yetasi risi.—1 Yohana 5:3.

▪ E’yo Munguni ma laza si, Yehova ni izizo asi driasi risi, ’ba azi ’diyi ki imbazu e’yo erini ma dria risi, azini eri inzizu okuta Kristiani ni eyi okuzu tualu ri ma alea risi ama nga azakoma isu awizu leta Munguni ri ma alea.—Matayo 24:24; 28:19, 29; Yohana 17:3; 1 ’Ba Tesalonikia ’Diyi 5:17; ’Ba Ebraniani 10:24, 25.

▪ ’Ba awipi Leta Munguni ma alea ’diyi ki asi ’baza be “idri ada ada ri” isuzu.—1 Timoteo 6:12, 19; Yuda 21.

[Zita e’yo onizu ’diyi]

1, 2. Ama ecoki pari apazu zizoru kililiri isu andrusi ngoa ya?

3. Ama ecoki di Yehova ni ’ba pari amani apazu zizoru ri ru ngoni ru ya?

4, 5. Geri Yehova ni ima leta e’dazu amani ’diyi ki ngoki ya?

6. Mi eco di leta Yehovani e’da mini ri ma ti omvi ngoni ru ya?

7. Leta Mungu ni lezuri ma ifi aga mini egazu mi le eri ra ri te ya? Mi ece.

8, 9. Ama ecoki ama ma leta azini awa’difo Munguniri e’da ngoni ru ya?

10. Mi ece orodri ’bani muzu drile e’yo onizu Yehova Mungu ma dria ri ma e’yo.

11. Imbata Yesuni ri fe ndra ’ba eri ma vuti obipi ’diyi pini egata ngole ri i ya?

12, 13. (a) A’du afa ’ye i ni ’ba wudrikurua ’diyi ma kalafe ndepi ni ’diyi pi ma leta Mungu ni lezu ri pi ma dria leta Biblia lezu ri be? (b) Ama ecoki fe leta amani rini ambizu ku ngoni ru ya?

14. Izita eco ama aza ko leta amani Yehovani lezuri ’bazu idriru ngoni ngoni ya?

15, 16. E’yo baru Suru niri oluzu ri eri azi orodriru ni dika drileba ru ni a’du ma e’yo si ya?

17. Le azi ’bani fe Kristiani dri andrusi ri ma ngaki mbele mbele a’du ma e’yo si ya?

18. Le ama ma inziki Yehova ni ’ba dria ma drilea tualu Kristiani ada ’diyi pie a’du ma e’yo si ya?

19. Ama ecoki leta kanisa Kristiani ni ma alea ri ’ba okporu ngoni ngoni ya?

20, 21. “Idri ada ada ri” a’duni, azini eri asi ’baza onyiru ni a’du ma e’yo si?

22. Mi eco “idri ada ada ri bi ci” ngoni ru ya?

23. Awizu leta Mungu niri ma alea ri e’yo azi okporu ni a’du ma e’yo si ya?

[E’da peji ma alea ri 184]

Mi nga Yehovani ’ba pari mini apazu mi zizo ri ru ewu ekile akuku le ’diyi ma alea ra ya?

[E’da peji ma alea ri 187]

Ekile eja ni fezu aci ni ve drile drile rile, mi ma leta Yehova niri le afa azi ni ki ra erini ecozu ovuzu okporu beni

[E’da peji ma alea ri 190]

Yehova le mi isu ayiko “idri ada ada ri” ma alea. Mi le ra ya?