ບົດຮຽນ 4
ພະເຍຊູຄລິດແມ່ນໃຜ?
1. ຊີວິດຂອງພະເຍຊູເລີ່ມຕົ້ນແນວໃດ?
ພະເຍຊູບໍ່ຄືກັບມະນຸດ ພະອົງເປັນກາຍວິນຍານທີ່ຢູ່ໃນສະຫວັນກ່ອນພະອົງລົງມາເກີດເທິງໂລກ. (ໂຢຮັນ 8:23) ພະເຍຊູເປັນສິ່ງທຳອິດທີ່ພະເຈົ້າສ້າງ ແລະພະເຍຊູໄດ້ຊ່ວຍພະເຈົ້າສ້າງສິ່ງອື່ນໆທັງໝົດ. ຍ້ອນວ່າພະອົງເປັນຜູ້ດຽວທີ່ພະເຢໂຫວາສ້າງໂດຍກົງ ຈຶ່ງເໝາະສົມແລ້ວທີ່ຈະເອີ້ນພະເຍຊູວ່າ “ພະບຸດອົງດຽວ.” (ໂຢຮັນ 1:14) ພະເຍຊູເປັນໂຄສົກຂອງພະເຈົ້າ ດັ່ງນັ້ນພະອົງຈຶ່ງຖືກເອີ້ນວ່າ “ພະຄຳ.”—ອ່ານສຸພາສິດ 8:22, 23, 30; ໂກໂລດ 1:15, 16
2. ເປັນຫຍັງພະເຍຊູຈຶ່ງລົງມາເທິງໂລກ?
ພະເຈົ້າຍົກຍ້າຍຊີວິດພະເຍຊູຈາກສະຫວັນໃຫ້ມາຢູ່ໃນທ້ອງຂອງຍິງສາວປອດຄົນຢິວຊື່ມາລີ. ດັ່ງນັ້ນ ພະເຍຊູຈຶ່ງບໍ່ມີພໍ່ທີ່ເປັນມະນຸດ. (ລືກາ 1:30-35) ພະເຍຊູມາໃນໂລກດ້ວຍເຫດຜົນ (1) ເພື່ອຈະສອນຄວາມຈິງກ່ຽວກັບພະເຈົ້າ, (2) ເພື່ອເປັນຕົວຢ່າງໃຫ້ເຮົາໃນການເຮັດຕາມນໍ້າໃຈຂອງພະເຈົ້າ ແມ່ນແຕ່ເມື່ອເຮົາມີຄວາມຫຍຸ້ງຍາກ, (3) ເພື່ອສະລະຊີວິດສົມບູນແບບໃຫ້ເປັນ “ຄ່າໄຖ່.”—ອ່ານມັດທາຍ 20:28
3. ເປັນຫຍັງເຮົາຈຶ່ງຈຳເປັນຕ້ອງມີຄ່າໄຖ່?
ຄ່າໄຖ່ເປັນສິ່ງທີ່ໃຊ້ເພື່ອໃຫ້ຄົນເຮົາພົ້ນຈາກຄວາມຕາຍ. (ອົບພະຍົບ 21:29, 30) ຕັ້ງແຕ່ເບື້ອງຕົ້ນ ພະເຈົ້າບໍ່ໄດ້ມຸ່ງໝາຍໃຫ້ມະນຸດເຖົ້າລົງແລະຕາຍ. ເຮົາຮູ້ໄດ້ແນວໃດ? ພະເຈົ້າບອກອາດາມມະນຸດຄົນທຳອິດວ່າ ຖ້າລາວເຮັດສິ່ງທີ່ຄຳພີໄບເບິນເອີ້ນວ່າ “ບາບ” ລາວຈະຕາຍ. ດັ່ງນັ້ນ ຖ້າອາດາມບໍ່ໄດ້ເຮັດບາບ ລາວກໍຈະບໍ່ຕາຍເລີຍ. (ຕົ້ນເດີມ 2:16, 17; 5:5) ຄຳພີໄບເບິນກ່າວວ່າຄວາມຕາຍ “ເຂົ້າມາ” ເຖິງມະນຸດໂດຍທາງອາດາມ ດັ່ງນັ້ນ ລາວຈຶ່ງຖ່າຍທອດຄວາມບາບແລະຄວາມຕາຍໃຫ້ກັບລູກຫຼານໝົດທຸກຄົນ. ພວກເຮົາຈຳເປັນຕ້ອງມີຄ່າໄຖ່ເພື່ອໃຫ້ພົ້ນຈາກຄວາມຕາຍທີ່ເຮົາໄດ້ຮັບຈາກອາດາມ.—ອ່ານໂລມ 5:12; 6:23
ໃຜຈະເປັນຄ່າໄຖ່ເພື່ອໄຖ່ຖອນພວກເຮົາຈາກຄວາມຕາຍ? ເມື່ອເຮົາຕາຍໄປ ເຮົາກໍໄດ້ຊຳລະໂທດບາບຂອງເຮົາເອງ. ມະນຸດທີ່ຜິດບາບບໍ່ສາມາດໃຊ້ຊີວິດເພື່ອເປັນຄ່າໄຖ່ໃຫ້ກັນໄດ້.—ອ່ານ4. ເປັນຫຍັງພະເຍຊູຈຶ່ງຕາຍ?
ບໍ່ຄືກັບເຮົາ ພະເຍຊູເປັນມະນຸດທີ່ສົມບູນແບບ. ດັ່ງນັ້ນ ພະອົງຈຶ່ງບໍ່ຕ້ອງຕາຍຍ້ອນຄວາມຜິດບາບ. ພະອົງບໍ່ເຄີຍເຮັດຜິດບາບເລີຍ. ພະອົງຕາຍເພື່ອເປັນຄ່າໄຖ່ໃຫ້ຄົນອື່ນ. ພະເຈົ້າສະແດງຄວາມຮັກອັນໃຫຍ່ຫຼວງຕໍ່ມະນຸດຊາດໂດຍສົ່ງລູກຊາຍຂອງພະອົງໃຫ້ມາຕາຍເພື່ອເຮົາ. ພະເຍຊູຍັງສະແດງຄວາມຮັກຕໍ່ເຮົາໂດຍການເຊື່ອຟັງພໍ່ຂອງພະອົງ ແລະມອບຊີວິດຂອງພະອົງເພື່ອເປັນຄ່າໄຖ່ໃຫ້ພວກເຮົາ.—ອ່ານໂຢຮັນ 3:16; ໂລມ 5:18, 19
ເບິ່ງວິດີໂອ ເປັນຫຍັງພະເຍຊູຈຶ່ງຕາຍ?
5. ປັດຈຸບັນນີ້ພະເຍຊູກຳລັງເຮັດຫຍັງ?
ເມື່ອຕອນຢູ່ໃນໂລກ ພະເຍຊູໄດ້ປິ່ນປົວຄົນເຈັບປ່ວຍ ປຸກຄົນຕາຍ ແລະຊ່ວຍຄົນໃຫ້ພົ້ນຈາກອັນຕະລາຍ. ໂດຍວິທີນີ້ ພະອົງສະແດງໃຫ້ເຫັນສິ່ງທີ່ພະອົງຈະເຮັດໃນອະນາຄົດສຳລັບມະນຸດທີ່ເຊື່ອຟັງ. (ມັດທາຍ 15:30, 31; ໂຢຮັນ 5:28) ຫຼັງຈາກພະເຍຊູຕາຍພະເຈົ້າໄດ້ປຸກພະອົງໃຫ້ເປັນກາຍວິນຍານ. (1 ເປໂຕ 3:18) ແລ້ວພະເຍຊູໄດ້ລໍຖ້າຢູ່ເບື້ອງຂວາຂອງພະເຈົ້າຈົນກວ່າພະເຢໂຫວາຈະແຕ່ງຕັ້ງພະອົງໃຫ້ເປັນກະສັດປົກຄອງໂລກ. (ເຫບເລີ 10:12, 13) ປັດຈຸບັນນີ້ ພະເຍຊູປົກຄອງເປັນກະສັດໃນສະຫວັນ ແລະມອບໝາຍໃຫ້ສາວົກຂອງພະອົງປະກາດຂ່າວດີໄປທົ່ວໂລກ.—ອ່ານດານຽນ 7:13, 14; ມັດທາຍ 24:14
ອີກບໍ່ດົນ ພະເຍຊູຈະໃຊ້ອຳນາດກະສັດເຮັດໃຫ້ຄວາມທຸກລຳບາກ ແລະຜູ້ທີ່ເປັນຕົ້ນເຫດຂອງຄວາມທຸກລຳບາກນັ້ນສາບສູນໄປ. ທຸກຄົນທີ່ສະແດງຄວາມເຊື່ອໂດຍການເຊື່ອຟັງພະເຍຊູຈະຊື່ນຊົມກັບຊີວິດໃນອຸທິຍານເທິງໂລກນີ້.—ອ່ານຄຳເພງ 37:9-11