ယေဟောဝါ၏ဆုံးမတော်မူခြင်းကို အမြဲလက်ခံပါ
ယေဟောဝါ၏ဆုံးမတော်မူခြင်းကို အမြဲလက်ခံပါ
‘ယေဟောဝါဆုံးမတော်မူခြင်းကို မမှတ်ဘဲမနေနှင့်။’—သု. ၃:၁၁။
၁။ ဘုရားသခင်၏ဆုံးမတော်မူခြင်းကို အဘယ်ကြောင့်လက်ခံသင့်သနည်း။
ကျွန်ုပ်တို့ယောက်စီယောက်တိုင်း ဘုရားသခင်၏ဆုံးမတော်မူခြင်းကို လက်ခံစေသည့် ကောင်းမွန်သောအကြောင်းရင်းတစ်ရပ်ကို ရှေးဣသရေလဘုရင် ရှောလမုန် ဤသို့ဖော်ပြ၏– ‘ငါ့သား ယေဟောဝါဆုံးမတော်မူခြင်းကို မမှတ်ဘဲမနေနှင့်။ သင်၏အပြစ်ကိုစစ်ဆေးတော်မူသောအခါ စိတ်မပျက်စေနှင့်။ ဘုရားသခင်သည် ချစ်တော်မူသောသူကို ဆုံးမတော်မူတတ်၏။ နှစ်သက်တော်မူသောသားကို ဒဏ်ခတ်တော်မူတတ်၏။’ (သု. ၃:၁၁၊ ၁၂) မှန်ပါသည်၊ ကောင်းကင်ခမည်းတော် သင့်အားဆုံးမရခြင်းမှာ သင့်ကို ချစ်သောကြောင့်ဖြစ်သည်။
၂။ “ဆုံးမခြင်း” ကိုမည်သို့ဖွင့်ဆိုသနည်း။ လူတစ်ဦးသည် မည်သို့ဆုံးမ ခံရနိုင်သနည်း။
၂ “ဆုံးမခြင်း” သည် ရိုက်နှက်ဆုံးမခြင်း၊ ပဲ့ပြင်ခြင်း၊ သွန်သင်ခြင်းနှင့် ပညာပေးခြင်းတို့ကို ရည်ညွှန်းသည်။ တမန်တော်ပေါလု ဤသို့ရေးခဲ့၏– “ဆုံးမခြင်းမည်သည်ကား ခံရစဉ်အခါ ဝမ်းမြောက်စရာမထင်၊ ဝမ်းနည်းစရာထင်တတ်၏။ သို့သော်လည်း၊ ဆုံးမခြင်းကိုခံရသောသူတို့သည် နောက်မှ ငြိမ်သက်ခြင်းနှင့်စပ်ဆိုင်သော ဖြောင့်မတ်ခြင်းအကျိုးကို ခံရကြ၏။” (ဟေဗြဲ ၁၂:၁၁) ဘုရားသခင်၏ဆုံးမခြင်းကို လက်ခံကျင့်သုံးခြင်းသည် ဖြောင့်မတ်သောလမ်းစဉ်လိုက်ရန် အထောက်အကူပြုနိုင်ပြီး သန့်ရှင်းသောဘုရားသခင် ယေဟောဝါနှင့် ပို၍ရင်းနှီးစေနိုင်သည်။ (ဆာလံ ၉၉:၅) ပဲ့ပြင်ခြင်းသည် ယုံကြည်သူချင်းများထံမှ၊ ခရစ်ယာန်အစည်းအဝေးများတွင် သင်ယူသိရှိရာများမှ၊ ဘုရားသခင့်နှုတ်မြွက်စကားတော်ကို လေ့လာရာမှနှင့် ‘တည်ကြည်သောကျေးကျွန်’ ထုတ်ဝေသောစာပေများမှ လာနိုင်ပါသည်။ (လုကာ ၁၂:၄၂-၄၄) ပြုပြင်ပြောင်းလဲဖို့လိုအပ်ရာကို သင့်အားသတိပြုမိစေသည့်အခါ သင်အလွန်ကျေးဇူးတင်ပေမည်! သို့သော် ကြီးလေးသောအပြစ်ကျူးလွန်မိလျှင် အဘယ်ဆုံးမမှု လိုအပ်မည်နည်း။
အချို့သူတို့ နှင်ထုတ်ခံရသည့်အကြောင်းရင်း
၃။ အဘယ်အချိန်တွင် နှင်ထုတ်သနည်း။
၃ ဘုရားသခင့်ကျေးကျွန်များသည် သမ္မာကျမ်းစာနှင့် ခရစ်ယာန်စာပေများကို လေ့လာကြသည်။ ယေဟောဝါ၏စံနှုန်းများကို အစည်းအဝေးများ၊ စည်းဝေးပွဲများနှင့် စည်းဝေးကြီးများတွင် ဆွေးနွေးကြသည်။
ထို့ကြောင့် ခရစ်ယာန်များထံမှ ယေဟောဝါအဘယ်အရာတောင်းဆိုသည်ကို သူတို့သိကြသည်။ အသင်းသားတစ်ဦးသည် ကြီးလေးသည့်အပြစ်ကို နောင်တမယူဘဲပြုကျင့်နေမှသာ နှင်ထုတ်ခြင်းခံရသည်။၄၊ ၅။ ဤတွင် ကျမ်းစာထဲမှ အဘယ်နှင်ထုတ်ခြင်း ပုံနမူနာကို ဖော်ပြထားသနည်း။ အသင်းတော်သည် ထိုသူကို ပြန်လက်ခံရန် အဘယ်ကြောင့် တိုက်တွန်းခံခဲ့ရသနည်း။
၄ ကျမ်းစာတွင်ပါသော နှင်ထုတ်သည့် ပုံနမူနာတစ်ခုကို သုံးသပ်ကြည့်ပါ။ “အဘ၏မယားကိုသိမ်းယူခြင်းတည်းဟူသော [ပြင်ပ] လူတို့တွင်ပင် မကြားရသော မေထုန်၌မှီဝဲသောသူ” ကို ကောရိန္သုအသင်းတော်သည် သည်းခံခွင့်ပြုထားခဲ့ကြသည်။ ပေါလုက ကောရိန္သုအသင်းတော်၏ “ဝိညာဉ်သည် . . . ကယ်တင်ခြင်းသို့ရောက်မည်အကြောင်း သူ၏ကိုယ်ခန္ဓာပျက်စီးဖို့ရာ သူ့ကိုစာတန်လက်သို့အပ်နှံကြ” ရန်တိုက်တွန်းခဲ့သည်။ (၁ ကောရိန္သု ၅:၁-၅) နှင်ထုတ်လိုက်သောအခါ ထိုအပြစ်ပြုသူကို စာတန်လက်သို့အပ်နှံလိုက်သည်ဖြစ်၍ သူသည် စာတန့်လောကအဝင်တစ်ဦး ပြန်ဖြစ်သွားသည်။ (၁ ယောဟန် ၅:၁၉) ထိုသူကိုနှင်ထုတ်ခြင်းသည် အသင်းတော်အတွင်း ဆိုးညစ်သောဇာတိသဘောလွှမ်းမိုးမှုကို ဖယ်ရှားခြင်းဖြစ်ပြီး ဘုရားသခင်ကိုကြောက်ရွံ့သော “စိတ်ဝိညာဉ်” သို့မဟုတ် စိတ်သဘောထားကို ထိန်းသိမ်းကာကွယ်ရာရောက်သည်။—၂ တိမောသေ ၄:၂၂; ၁ ကောရိန္သု ၅:၁၁-၁၃။
၅ ယင်းနောက် များမကြာမီတွင် ပေါလုက ကောရိန္သုမြို့ရှိခရစ်ယာန်များအား အမှားပြုသူကို ပြန်လက်ခံရန် တိုက်တွန်းခဲ့သည်။ အဘယ်ကြောင့်နည်း။ ကောရိန္သုအသင်းသားများကို ‘စာတန် အနိုင်မယူ’ စေရန်ဖြစ်သည်ဟု တမန်တော်ပြောခဲ့၏။ အပြစ်ပြုသူသည် နောင်တရပြီး သူ၏အသက်တာကို စင်ကြယ်စွာပြန်လည်နေထိုင်ခဲ့ကြောင်း ထင်ရှားသည်။ (၂ ကောရိန္သု ၂:၈-၁၁) ကောရိန္သုအသင်းသားများသည် နောင်တရသူကို ပြန်လက်ခံဖို့ ငြင်းဆိုမည်ဆိုပါက အကြင်နာမဲ့ရာ၊ ခွင့်မလွှတ်ရာကျမည်ဖြစ်သည်။ ထိုသို့ဖြစ်ရန် စာတန်အလိုရှိရာ စာတန် သူတို့ကိုအနိုင်ယူသွားပေမည်။ မကြာမီပင် သူတို့သည် နောင်တရသူအား ‘အပြစ်ကိုလွှတ်၍ နှစ်သိမ့်’ မှုပေးခဲ့ကြပုံရသည်။—၂ ကောရိန္သု ၂:၅-၇။
၆။ နှင်ထုတ်ခြင်းက အဘယ်အရာကို ဖြစ်မြောက်စေနိုင်သနည်း။
၆ နှင်ထုတ်ခြင်းက အဘယ်အရာကို ဖြစ်မြောက်စေသနည်း။ ယေဟောဝါ၏ သန့်ရှင်းသောနာမတော်ကို ကဲ့ရဲ့ရှုတ်ချစရာ မဖြစ်စေသည့်အပြင် ကိုယ်တော့်လူမျိုး၏ နာမည်ကောင်းကို ကာကွယ်ပေးသည်။ (၁ ပေတရု ၁:၁၄-၁၆) နောင်တမယူသောအပြစ်ပြုသူကို အသင်းတော်မှဖယ်ရှားခြင်းဖြင့် ဘုရားသခင့်စံနှုန်းများကို ထောက်ခံရာကျပြီး အသင်းတော်၏ဝိညာဉ်ရေးသန့်ရှင်းမှုကို ထိန်းသိမ်းရာရောက်သည်။ နောင်တမယူသူကိုလည်း အသိတရားဝင်လာစေပေမည်။
နောင်တယူခြင်းသည် ထူးခြားစေ
၇။ ဒါဝိဒ်သည် မိမိ၏အပြစ်ကိုဝန်ခံရန် ပျက်ကွက်သည့်အခါ အဘယ်အကျိုးဆက်ခံစားခဲ့ရသနည်း။
၇ ကြီးလေးသောအပြစ်ပြုသူ အများစုသည် စစ်မှန်သည့်နောင်တရကြပြီး အသင်းတော်မှ နှင်ထုတ်ခြင်းကို မခံရကြပါ။ အချို့သူတို့အဖို့မူ စစ်မှန်သည့်နောင်တယူရန် လွယ်ကူမည်မဟုတ်။ ဆာလံ ၃၂ ကိုစပ်ဆိုခဲ့သော ဣသရေလဘုရင်ဒါဝိဒ်ကို သုံးသပ်ကြည့်ပါ။ ဗာသရှေဘနှင့်ပတ်သက်ပုံရသည့် သူ၏ကြီးလေးသောအပြစ်ကို အချိန်အတန်ကြာသည်အထိ ဝန်မခံခဲ့ကြောင်း ထိုသီချင်းတွင်ဖော်ပြထားသည်။ ရလဒ်မှာ သူ၏အပြစ်ကြောင့်ခံစားရသည့် ဝမ်းနည်းကြေကွဲမှုက နွေကာလ၏အပူရှိန်ကြောင့် သွေ့ခြောက်သောအပင်ကဲ့သို့ သူ၏ခွန်အားလျော့နည်းခဲ့သည်။ ဒါဝိဒ်သည် ကာယရေးရော စိတ်ဓာတ်ရေးပါ ဝေဒနာခံစားခဲ့ရသည်။ သို့သော် သူ ‘လွန်ကျူးသောအရာကို ဖော်ပြတောင်းပန်သောအခါ ယေဟောဝါသည် သူ၏ပြစ်မှားခြင်းအပြစ်ကို လွှတ်တော်မူခဲ့သည်။’ (ဆာလံ ၃၂:၃-၅) ၎င်းနောက် ဒါဝိဒ်ဤသို့သီဆိုခဲ့၏– ‘ထာဝရဘုရားသခင် အပြစ်တင်တော်မူခြင်းနှင့် လွတ်သောသူသည် မင်္ဂလာရှိ၏။’ (ဆာလံ ၃၂:၁၊ ၂) ဘုရားသခင့်ကရုဏာတော်ခံစားရခြင်းသည် အလွန်ကောင်းမြတ်လှသည်!
၈၊ ၉။ နောင်တရကြောင်း မည်သို့တင်ပြသနည်း။ ယင်းသည် နှင်ထုတ်ခံရသူတစ်ဦးကို ပြန်လည်လက်ခံခြင်းကိစ္စတွင် မည်မျှအရေးပါသနည်း။
၈ သို့ဖြစ်၍ အပြစ်ပြုသူတစ်ဦးသည် ကရုဏာခံရရန် နောင်တယူရမည်မှာ ရှင်းနေပါသည်။ သို့သော် မိမိ၏အပြစ်ဖော်ထုတ်ခံရမည်ကို ရှက်ခြင်း၊ ကြောက်ခြင်းမရှိခြင်းသည် နောင်တရခြင်းဖြစ်သည်။ “နောင်တရခြင်း” မည်သည် အကျင့်ဆိုးနှင့် အပြစ်အတွက်ဝမ်းနည်းမှုကြောင့် “စိတ်ကိုပြောင်းလဲလိုက်ခြင်း” ဖြစ်သည်။ နောင်တယူသူတစ်ဦးသည် “ကျိုးပဲ့ကြေမွသောနှလုံး” ရှိပြီး ဖြစ်နိုင်မည်ဆိုလျှင် ‘အမှားကိုပြုပြင်’ လိုသည်။—ဆာလံ ၅၁:၁၇; ၂ ကောရိန္သု ၇:၁၁၊ ကဘ။
၉ ခရစ်ယာန်အသင်းတော်အတွင်း ပြန်လက်ခံခြင်းကိစ္စတွင် နောင်တယူခြင်းသည် အလွန်အရေးကြီးသောအချက်ဖြစ်သည်။ နှင်ထုတ်ခံရသူတစ်ဦးကို အချိန်အကန့်အသတ်တစ်ခုကြာပြီးနောက် အသင်းတော်တွင် အလိုအလျောက် ပြန်လက်ခံမည်မဟုတ်ပါ။ သူ့ကိုပြန်လက်ခံနိုင်ရန် သူ၏နှလုံးအခြေအနေသည် ပြောင်းလဲမှုရှိရမည်။ မိမိ၏အပြစ်သည် ကြီးလေးကြောင်း၊ ယေဟောဝါနှင့် အသင်းတော်ကို ကဲ့ရဲ့ရှုတ်ချစရာဖြစ်စေခဲ့ကြောင်းတို့ကို ထိုသူအသိအမှတ်ပြုရမည်။ အပြစ်ပြုသူသည် နောင်တယူရမည်၊ ခွင့်လွှတ်ခံရရန် ထက်သန်စွာ ဆုတောင်းရမည်၊ ဘုရားသခင်၏ ဖြောင့်မတ်သောတောင်းဆိုချက်များကို လုပ်ဆောင်ရမည်။ ပြန်လက်ခံရန်တောင်းဆိုသည့်အခါ သူသည် နောင်တရသည့်အထောက်အထားများ ပေါ်လွင်နေသင့်ပြီး “နောင်တရခြင်းနှင့်ထိုက်တန်သောအကျင့်ကို” တင်ပြသင့်သည်။—တမန်တော် ၂၆:၂၀။
အမှားကို အဘယ်ကြောင့်ဝန်ခံရသနည်း
၁၀၊ ၁၁။ အပြစ်ကိုဖုံးကွယ်ရန် အဘယ်ကြောင့် မကြိုးစားသင့်သနည်း။
၁၀ အပြစ်ပြုသူအချို့က ဤသို့ဆင်ခြင်ကြပေမည်– ‘တစ်ယောက်ယောက်ကို ငါ့ရဲ့အပြစ်အကြောင်း ပြောပြလိုက်ရင် အဖြေရခက်တဲ့မေးခွန်းတွေ ဖြေနေရဦးမယ်၊ နှင်ထုတ်တာလည်းခံရနိုင်တယ်။ ဒီအတိုင်းထားလိုက်မယ်ဆိုရင် အဲ့ဒါတွေကို ရှောင်နိုင်မယ်၊ အသင်းတော်ကဘယ်သူမှလည်း သိမှာမှမဟုတ်တာ။’ ထိုသို့စဉ်းစားခြင်းဖြင့် အရေးကြီးသောအချက်အချို့ကို ထည့်တွက်ရန် ပျက်ကွက်ကြသည်။ အဘယ်အရာများနည်း။
၁၁ ယေဟောဝါသည် “ချစ်သနားခြင်းမေတ္တာကရုဏာနှင့်ပြည့်စုံ၍ စိတ်ရှည်ခြင်း၊ ကျေးဇူးပြုခြင်း၊ သစ္စာစောင့်ခြင်းနှင့် ကြွယ်ဝတော်မူထသော၊ အထောင်အသောင်းများသောသူတို့အား သနားခြင်းကျေးဇူးတရားကို စောင့်တော်မူထသော၊ . . . တရားတော်ကိုလွန်ကျူးခြင်း၊ ပြစ်မှားခြင်းအပြစ်တို့ကို ဖြေလွှတ်” တော်မူသောအရှင်ဖြစ်သည်။ သို့သော် ကိုယ်တော်သည် မိမိ၏လူမျိုးကို “အတော်အတန်ဆုံးမ” ကာ ပဲ့ပြင်တော်မူသည်။ (ထွက်မြောက်ရာ ၃၄:၆၊ ၇; ယေရမိ ၃၀:၁၁) အကယ်၍ သင်သည် ကြီးလေးသောအပြစ်ပြုမိပြီး သင်၏အပြစ်ကို ဝှက်ထားဖို့ကြိုးစားမည်ဆိုလျှင် ဘုရားသခင်၏ ကရုဏာတော်ကို မည်သို့ရနိုင်မည်နည်း။ ယေဟောဝါသည် ယင်းကိုသိရှိတော်မူပြီး အမှားကို မသိကျိုးကျွန်ပြုမည်မဟုတ်ပါ။—သု. ၁၅:၃; ဟဗက္ကုတ် ၁:၁၃။
၁၂၊ ၁၃။ အမှားကိုဖုံးကွယ်ထားဖို့ကြိုးစားလျှင် အဘယ်အရာဖြစ်နိုင်သနည်း။
၁၂ သင်သည် ကြီးလေးသောအပြစ် ကျူးလွန်ခဲ့ပါက အပြစ်ဝန်ခံခြင်းသည် စင်ကြယ်သောကိုယ်ကိုကိုယ်သိသောစိတ် ပြန်လည်ရရှိရန် အထောက်အကူပြုနိုင်သည်။ (၁ တိမောသေ ၁:၁၈-၂၀) သို့သော် အပြစ်ဝန်ခံရန် ပျက်ကွက်ပါက ကိုယ်ကိုကိုယ်သိသောစိတ် ညစ်ညူးစေနိုင်ပြီး အပြစ်ပို၍ကျူးလွန်မိနိုင်သည်။ သင်၏အပြစ်သည် အခြားသူ သို့မဟုတ် အသင်းတော်ကို ဆန့်ကျင်ခြင်းမျှသာမဟုတ်သည်ကို သတိရပါ။ ဘုရားသခင်ကို ဆန့်ကျင်ခြင်းဖြစ်သည်။ ဆာလံဆရာက ဤသို့သီဆိုခဲ့၏– ‘ထာဝရဘုရားသခင်၏ပလ္လင်တော်သည် ကောင်းကင်ပေါ်မှာတည်၏။ မျက်စိတော်သည်ကြည့်ရှု၍ မျက်ခမ်းတော်သည် လူသားတို့ကို စစ်တော်မူ၏။ ထာဝရဘုရားသခင်သည် ဖြောင့်မတ်သောသူ [နှင့် မတရားသောသူတို့] ကိုစုံစမ်းတော်မူ၏။’—ဆာလံ ၁၁:၄၊ ၅။
၁၃ ကြီးလေးသည့်အပြစ်ကို ဖုံးကွယ်ထားပြီး စင်ကြယ်သောခရစ်ယာန်အသင်းတော်အတွင်းနေရန် ကြိုးစားသူမည်သူမဆိုကို ယေဟောဝါ ကောင်းချီးပေးမည်မဟုတ်ပါ။ (ယာကုပ် ၄:၆) ထို့ကြောင့် သင်သည် အပြစ်ပြုမိပြီးနောက် မှန်ကန်ရာကိုလုပ်ဆောင်လိုပါက နှိမ့်ချစွာအပြစ်ဝန်ခံဖို့ မတွန့်ဆုတ်ပါနှင့်။ သို့မဟုတ်လျှင် သင်၏ ကိုယ်ကိုကိုယ်သိသောစိတ်သည် မကြည်မလင်ဖြစ်မည်၊ အထူးသဖြင့် သင်ပြစ်မှားမိသော ကြီးလေးသည့်အပြစ်မျိုးနှင့်ပတ်သက်သည့် ဆုံးမစကားများကို ဖတ်ရှု၊ ကြားနာရချိန်တို့တွင်ဖြစ်သည်။ ယေဟောဝါသည် ဘုရင်ရှောလု၏အဖြစ်တွင်ကဲ့သို့ သင့်ထံမှ ကိုယ်တော်၏ဝိညာဉ်တော်ရုပ်သိမ်းလိုက်လျှင်ကော အသို့နည်း။ (၁ ဓမ္မရာဇဝင် ၁၆:၁၄) ဘုရားသခင်၏ဝိညာဉ်တော်မရှိလျှင် သင်သည် ပို၍ကြီးလေးသောအပြစ်ကိုပင် ကျူးလွန်မိနိုင်သည်။
တည်ကြည်သော သင့်ညီအစ်ကိုများကို ယုံကြည်ပါ
၁၄။ အမှားပြုသူသည် ယာကုပ် ၅:၁၄၊ ၁၅ ပါဆုံးမစကားကို အဘယ်ကြောင့်လိုက်နာသင့်သနည်း။
၁၄ ထို့ကြောင့် နောင်တရသောအပြစ်ပြုမိသူသည် အဘယ်အရာပြုလုပ်သင့်သနည်း။ “သင်းအုပ်တို့ကိုခေါ်၍ သူတို့သည် သခင်ဘုရား၏နာမတော်ကိုအမှီပြုလျက် လူနာကိုဆီနှင့်လူး၍ သူ့အပေါ်မှာဆုတောင်းကြစေ။ ထိုသို့ပြုလျှင် ယုံကြည်ခြင်း [ဖြင့်ဆုတောင်းချက်] သည် လူနာကိုကယ်ဆယ်၍ သခင်ဘုရားသည် သူ့ကိုထမြောက်စေတော်မူမည်။” (ယာကုပ် ၅:၁၄၊ ၁၅) “နောင်တရခြင်းနှင့် ထိုက်တန်သောအကျင့်ကို ကျင့်” ရာတွင် အကြီးအကဲများထံသို့ချဉ်းကပ်ခြင်းသည် နည်းတစ်နည်းဖြစ်သည်။ (မဿဲ ၃:၈) တည်ကြည်ပြီး မေတ္တာပြည့်ဝသည့် ထိုအမျိုးသားများသည် ‘ယေဟောဝါ၏နာမတော်ကိုအမှီပြုလျက် ဆီနှင့်လူး၍ ဆုတောင်း’ ပေးကြပေမည်။ အနာသက်သာစေသောဆီကဲ့သို့ သူတို့ပေးသော ကျမ်းစာအခြေပြုဆုံးမစကားသည် အမှန်နောင်တရသူမည်သူမဆိုအတွက် နှစ်သိမ့်မှုဖြစ်စေမည်။—ယေရမိ ၈:၂၂။
၁၅၊ ၁၆။ ယေဇကျေလ ၃၄:၁၅၊ ၁၆ တွင်မှတ်တမ်းတင်ထားသည့် ဘုရားသခင့်ပုံသက်သေကို ခရစ်ယာန်အကြီးအကဲများ မည်သို့လိုက်လျှောက်ကြသနည်း။
၁၅ ဘီစီ ၅၃၇ တွင် ဂျူးလူမျိုးကို ဗာဗုလုန်သုံ့ပန်းဘဝမှလွတ်မြောက်ပေးပြီး ဝိညာဉ်ရေးဣသရေလအမျိုးကို အေဒီ ၁၉၁၉ တွင် ‘မဟာဗာဗုလုန်’ မှ လွတ်မြောက်ပေးခြင်းတို့သည် ကျွန်ုပ်တို့၏သိုးထိန်းကြီး ယေဟောဝါ၏ အလွန်မေတ္တာပြည့်ဝသော ပုံနမူနာပင်ဖြစ်သည်! (ဗျာ. ၁၇:၃-၅; ဂလာတိ ၆:၁၆) သို့ဖြင့် ဘုရားသခင်သည် ဤကတိတော်ကို ပြည့်စုံစေခဲ့သည်– “ငါသည် ငါ့သိုးများကိုကျွေးမွေးမည်။ အိပ်ရာကိုလည်း ငါပေးမည်။ ပျောက်သောသိုးကို ငါရှာမည်။ သူတစ်ပါးနှင်သောသိုးကို လိုက်၍ဆောင်ခဲ့မည်။ အရိုးကျိုးသောသိုးကို အဝတ်နှင့်စည်းမည်။ အားနည်းသောသိုးကို မစမည်။”—ယေဇကျေလ ၃၄:၁၅၊ ၁၆။
၁၆ ယေဟောဝါသည် မိမိ၏ပုံဆောင်သိုးများကိုကျွေးမွေးကာ လုံခြုံသောနေရာတွင်နားစေတော်မူပြီး ပျောက်သောသိုးတို့ကို ရှာတော်မူခဲ့သည်။ အလားတူပင် ခရစ်ယာန်သိုးထိန်းများသည် ဘုရားသခင်၏သိုးများ ဝိညာဉ်ရေးအစာ ကောင်းစွာစားသုံးနိုင်ရန်နှင့် လုံခြုံမှုရှိရန် သေချာစေကြသည်။ အကြီးအကဲများသည် အသင်းတော်မှ
လမ်းလွဲနေသောသိုးကို ရှာဖွေကြသည်။ ဘုရားသခင်သည် “အရိုးကျိုးသောသိုးကို အဝတ်နှင့်စည်း” တော်မူသကဲ့သို့ ကြီးကြပ်မှူးများသည် တစ်ဦးတစ်ယောက်၏အပြော သို့မဟုတ် မိမိကိုယ်တိုင်၏လုပ်ရပ်များကြောင့် ထိခိုက်ဒဏ်ရာရနေသူတို့ကို “အဝတ်နှင့်စည်း” ပေးကြသည်။ ထို့ပြင် ဘုရားသခင်သည် ‘အားနည်း၍ ဖျားနာနေသောသိုးတို့ကို မစ’ တော်မူသကဲ့သို့ အကြီးအကဲများသည် ဝိညာဉ်ရေးတွင် ဖျားနာနေသူ၊ ဖြစ်နိုင်သည်မှာ မိမိကိုယ်တိုင်၏အမှားကြောင့် ဖျားနာနေသူတို့ကို အကူအညီပေးကြသည်။သိုးထိန်းများ ကူညီပေးကြပုံ
၁၇။ အကြီးအကဲများ၏ ဝိညာဉ်ရေးအကူအညီကိုယူရန် အဘယ်ကြောင့် မတွန့်ဆုတ်သင့်သနည်း။
၁၇ အကြီးအကဲများသည် ဤဆုံးမစကားကို ဝမ်းမြောက်စွာ လိုက်လျှောက်ကြသည်– ‘ဆက်၍ကရုဏာပြပါ . . . ယင်းကို ကြောက်ရွံ့သောစိတ်ဖြင့် ဆောင်ရွက်ပါ။’ (ယုဒ ၂၃၊ ကဘ) အချို့ခရစ်ယာန်များသည် လိင်အကျင့်ယိုယွင်းမှုထဲ ကျဆင်းခြင်းဖြင့် ကြီးလေးသည့်အပြစ် ပြုခဲ့ကြသည်။ သို့သော် သူတို့သည် စစ်မှန်သည့်နောင်တရမည်ဆိုလျှင် သူတို့အား ဝိညာဉ်ရေးအကူအညီပေးရန် စိတ်ထက်သန်ကြသော အကြီးအကဲများ၏ ကရုဏာမေတ္တာပါသော ကူညီပေးမှုကို မျှော်လင့်နိုင်ပါသည်။ ပေါလုက မိမိကိုယ်တိုင်အပါအဝင် ထိုသို့သောအမျိုးသားများနှင့်ပတ်သက်၍ ဤသို့ဆိုခဲ့၏– “ငါတို့သည် သင်တို့ယုံ၏ကြည်ခြင်းကို အစိုးရသည်မဟုတ်။ သင်တို့၏ဝမ်းမြောက်ခြင်းအကြောင်းကို ကူမ၍သာပြုကြ၏။” (၂ ကောရိန္သု ၁:၂၄) သို့ဖြစ်၍ သူတို့၏ဝိညာဉ်ရေးအကူအညီကိုယူရန် ဘယ်တော့မျှ မတွန့်ဆုတ်ပါနှင့်။
၁၈။ အကြီးအကဲများသည် အမှားပြုမိသူယုံကြည်သူချင်းတို့ကို မည်သို့ကိုင်တွယ်ကြသနည်း။
၁၈ သင်သည် ကြီးလေးသည့်အပြစ်ပြုမိပြီဆိုလျှင် အကြီးအကဲများကို အဘယ်ကြောင့် ယုံကြည်စိတ်ချနိုင်သနည်း။ သူတို့သည် ဘုရားသခင့်သိုးတော်စု၏ အဓိကသိုးထိန်းများဖြစ်သောကြောင့်ဖြစ်သည်။ (၁ ပေတရု ၅:၁-၄) အနာတရဖြစ်နေသည့်အတွက် အော်မြည်နေသော ယဉ်ပါးသည့်သိုးတစ်ကောင်ကို မေတ္တာပြည့်ဝသော မည်သည့်သိုးထိန်းမျှ အပြစ်ပေးမည်မဟုတ်ပါ။ ထို့ကြောင့် အမှားပြုမိသောယုံကြည်သူချင်းများကို အကြီးအကဲများ ကိုင်တွယ်ရာတွင် အမှားပြုသည့်အတွက် မည်သို့အပြစ်ပေးရမည် ဟူသည့်အချက်အပေါ်မဟုတ်ဘဲ အပြစ်အပေါ်အာရုံစိုက်ကာ ဖြစ်နိုင်မည်ဆိုလျှင် ဝိညာဉ်ရေးပြန်လည်ရှင်သန်လာစေရန် ပြုကြသည်။ (ယာကုပ် ၅:၁၃-၂၀) အကြီးအကဲများသည် ဖြောင့်မတ်စွာစီရင်ကြပြီး ‘သိုးများကို သနားကြင်နာစွာ ဆက်ဆံ’ ကြရမည်။ (တမန်တော် ၂၀:၂၉၊ ၃၀; ဟေရှာယ ၃၂:၁၊ ၂) ခရစ်ယာန်အားလုံးကဲ့သို့ပင် အကြီးအကဲများသည် “တရားသဖြင့်ပြုခြင်း၊ ကရုဏာကိုနှစ်သက်ခြင်း၊ သင်၏ဘုရားသခင့်ရှေ့တော်၌ နှိမ့်ချသောစိတ်နှင့်ကျင့်နေ” ကြသည်။ (မိက္ခာ ၆:၈) ထိုအရည်အချင်းများသည် “[ယေဟောဝါ၏] အထံတော်၌ကျက်စားသော သိုးစု” ၏အသက်တာ၊ မြင့်မြတ်သောလုပ်ငန်းတော်တို့နှင့်ပတ်သက်သည့် ဆုံးဖြတ်ချက်များချရာတွင် အရေးပါသည်။—ဆာလံ ၁၀၀:၃။
၁၉။ ခရစ်ယာန်အကြီးအကဲများသည် အဘယ်သဘောထားဖြင့် တစ်စုံတစ်ဦးကို ပြုပြင်တည့်မတ်ပေးဖို့ ကြိုးစားကြသနည်း။
၁၉ ခရစ်ယာန်သိုးထိန်းများသည် သန့်ရှင်းသောဝိညာဉ်တော်ဖြင့် ခန့်အပ်ခံရသူတို့ဖြစ်ပြီး ယင်း၏ဦးဆောင်မှုကို ရှာကြံကြသည်။ ‘လူသည် သတိလစ်၍ တစ်စုံတစ်ခုသော အပြစ်ကိုပြုမိလျှင်’—အမှတ်တမဲ့ မှားယွင်းမိလျှင်—ဝိညာဉ်ရေးတွင် ရင့်ကျက်သောအမျိုးသားများသည် “သိမ်မွေ့နူးညံ့သောသဘောနှင့် ထိုသို့သောသူကိုမစ၍၊ ဂလာတိ ၆:၁; တမန်တော် ၂၀:၂၈) ထောက်ထားစာနာတတ်သော ဆရာဝန်တစ်ဦးသည် ကြိုးနေသောလက်ကို ဂရုတစိုက်ဖြင့် ပြန်ဆက်ပေးသကဲ့သို့ အကြီးအကဲများသည် ထိုသူ၏စဉ်းစားတွေးခေါ်ပုံကို ပြုပြင်ပေးရန် ကြိုးစားရာတွင် ပြဿနာကို ဂရုစိုက်ကြသော်လည်း မလိုအပ်ဘဲနာကျင်မှုမဖြစ်စေရန် နူးညံ့သိမ်မွေ့မှုနှင့်အတူ ဘုရားသခင့်စံနှုန်းများကို ပြတ်ပြတ်သားသား ကိုင်စွဲကြသည်။ (ကောလောသဲ ၃:၁၂) အကြီးအကဲများသည် ဆုတောင်းပြီး ကျမ်းချက်များကိုအခြေခံကာ ကရုဏာပြသင့်မပြသင့်ကို ဆုံးဖြတ်ကြသောကြောင့် သူတို့၏ဆုံးဖြတ်ချက်သည် ကိစ္စရပ်အပေါ် ဘုရားသခင့်ရှုမြင်ပုံကို ထင်ဟပ်နေပါလိမ့်မည်။—မဿဲ ၁၈:၁၈။
သူ၏နေရာ၌တည်မြဲတည်စေပြန်ကြ” ရန်ကြိုးစားကြသည်။ (၂၀။ တစ်စုံတစ်ဦးကို ဆုံးမပြီးကြောင်း အသင်းတော်ကိုကြေညာရန် အဘယ်အချိန်တွင် လိုအပ်မည်နည်း။
၂၀ ပြုမိသည့်အပြစ်ကို လူအတော်များများ သိထားကြသည်၊ သို့မဟုတ် ထိုသို့သိလာနိုင်သည်ဆိုပါက အသင်းတော်၏ဂုဏ်သိက္ခာကို ကာကွယ်ရန်အလို့ငှာ အသင်းတော်တွင် ကြေညာခြင်းသည် သင့်လျော်ပေမည်။ အသင်းတော်ကိုအသိပေးဖို့လိုအပ်မည်ဆိုလျှင်လည်း ကြေညာပေမည်။ တရားရေးဆုံးမ ခံရချိန်အတွင်း ဝိညာဉ်ရေးတွင်ပြန်ကျန်းမာလာခြင်းကို လူတစ်ဦး၏လုပ်ဆောင်မှု အခိုက်အတန့်အကန့်အသတ်ဖြစ်စေသည့် ထိခိုက်ဒဏ်ရာရရာမှ ပြန်လည်ကောင်းလာခြင်းနှင့် နှိုင်းယှဉ်နိုင်ပေမည်။ နောင်တရသူသည် အချိန်အပိုင်းအခြားတစ်ခုအထိ အစည်းအဝေးများတွင် မှတ်ချက်ပေးမည့်အစား နားထောင်ခြင်းသည် ပို၍အကျိုးဖြစ်ပေမည်။ သူသည် ဝိညာဉ်ရေးတွင်အားနည်းနေမည်ဆိုလျှင် ပြန်လည်အားရှိလာဖို့ တစ်ဦးဦးနှင့်ကျမ်းစာလေ့လာရန် အကြီးအကဲများ စီစဉ်ပေးမည်။ ဤသို့ဖြင့် သူသည် ‘ယုံကြည်ခြင်း၌ စိတ်သန်သောသူ’ ပြန်ဖြစ်လာပေမည်။ (တိတု ၂:၂) ယင်းတို့အားလုံးသည် အမှားပြုသူကို အပြစ်ပေးသည့်ရည်ရွယ်ချက်ဖြင့်မဟုတ်ဘဲ မေတ္တာဖြင့်ပြုလုပ်ပေးခြင်းဖြစ်သည်။
၂၁။ အမှားပြုခြင်းဆိုင်ရာ အချို့ကိစ္စရပ်များကို မည်သို့ကိုင်တွယ်ကြမည်နည်း။
၂၁ အကြီးအကဲများသည် နည်းအမျိုးမျိုးဖြင့် ဝိညာဉ်ရေးအကူအညီပေးနိုင်ကြသည်။ ဥပမာ၊ ညီအစ်ကိုတစ်ဦးသည် ယခင်က သောက်ကြူးသည့်ပြဿနာရှိခဲ့ဖူးပြီး အိမ်၌မိမိတစ်ဦးတည်းရှိစဉ် တစ်ကြိမ်၊ နှစ်ကြိမ် သောက်ကြူးခဲ့သည်ဆိုပါစို့။ သို့မဟုတ်၊ ဆေးလိပ်ဖြတ်ခဲ့သည်မှာ ကြာပြီဖြစ်သော်လည်း အားနည်းချိန်အတွင်း တစ်ကြိမ်နှစ်ကြိမ် ပြန်သောက်မိသည်ဆိုပါစို့။ သူသည် ဘုရားသခင်ထံဆုတောင်းပြီး ကိုယ်တော်ခွင့်လွှတ်တော်မူသည်ဟု ယုံကြည်စိတ်ချလျှင်ပင် ထိုသို့သောအပြစ် အကျင့်ဖြစ်မသွားစေရန် အကြီးအကဲတစ်ဦးအား အကူအညီတောင်းခံသင့်သည်။ အကြီးအကဲတစ်ဦး သို့မဟုတ် နှစ်ဦးသည် ယင်းကို ကိုင်တွယ်ပေလိမ့်မည်။ သို့သော် ပါဝင်ပတ်သက်ခဲ့သည့် အခြားအရာများရှိနိုင်သောကြောင့် အကြီးအကဲ(များ)သည် ဦးစီးကြီးကြပ်မှူးအား အသိပေးပေမည်။
ဘုရားသခင်ဆုံးမတော်မူခြင်းကို ဆက်၍လက်ခံနေပါ
၂၂၊ ၂၃။ ဘုရားသခင်၏ဆုံးမတော်မူခြင်းကို အဘယ်ကြောင့် ဆက်၍လက်ခံသင့်သနည်း။
၂၂ ဘုရားသခင့်မျက်နှာသာရရှိရန် ခရစ်ယာန်ယောက်တိုင်းသည် ယေဟောဝါ၏ဆုံးမခြင်းကို ဂရုပြုရမည်။ (၁ တိမောသေ ၅:၂၀) သင်သည် ကျမ်းစာနှင့် ခရစ်ယာန်စာပေများကိုလေ့လာသည့်အခါ သို့မဟုတ် ယေဟောဝါလူမျိုး၏အစည်းအဝေးများ၊ စည်းဝေးပွဲများနှင့် စည်းဝေးကြီးများတွင်တင်ဆက်သော ဆုံးမစကားများကို ကြားရသည့်အခါ မည်သည့်ပဲ့ပြင်မှုကိုမဆို လက်တွေ့လိုက်နာကျင့်သုံးပါ။ ယေဟောဝါအလိုတော်နှင့်အညီ လုပ်ဆောင်ရန် နိုးနိုးကြားကြားရှိပါ။ သို့ဖြစ်လျှင် ဘုရားသခင်ဆုံးမတော်မူခြင်းသည် အပြစ်မပြုမိစေရန်ကာကွယ်ပေးသည့် ခိုင်ခံ့သောအုတ်တံတိုင်းကဲ့သို့ ဝိညာဉ်ရေးအကာအကွယ်တစ်ခုအဖြစ် သင့်အား အထောက်အကူပြုပေမည်။
၂၃ ဘုရားသခင်ဆုံးမတော်မူခြင်းကို လက်ခံခြင်းသည် သင့်အား ဘုရားသခင့်မေတ္တာ၌ တည်နေစေလိမ့်မည်။ မှန်ပါသည်၊ အချို့သူတို့သည် ခရစ်ယာန်အသင်းတော်မှ နှင်ထုတ်ခံရသော်လည်း သင်သည် ‘သင်၏နှလုံးကို စောင့်ရှောက်’ ကာ ‘ပညာရှိကဲ့သို့ ကျင့်ဆောင်’ မည်ဆိုပါက ယင်းသို့ဖြစ်စရာ အကြောင်းမရှိပါ။ (သု. ၄:၂၃; ဧဖက် ၅:၁၅) သို့သော် ယခု သင်သည် နှင်ထုတ်ခံထားရသူဖြစ်ပါက ပြန်လက်ခံစေသည့် အဆင့်များကို အဘယ်ကြောင့်မတက်လှမ်းဘဲနေမည်နည်း။ ဘုရားသခင်ထံအပ်နှံထားကြသူအားလုံးသည် ကိုယ်တော်အား “ရွှင်လန်းသောစိတ်” နှင့်တည်ကြည်စွာဝတ်ပြုကိုးကွယ်ရန် ကိုယ်တော်အလိုရှိတော်မူသည်။ (တရားဟောရာ ၂၈:၄၇) သင်သည် ယေဟောဝါ၏ဆုံးမတော်မူခြင်းကို အမြဲလက်ခံမည်ဆိုပါက ထိုသို့ထာဝစဉ်ဝတ်ပြုကိုးကွယ်နိုင်မည်။—ဆာလံ ၁၀၀:၂။
သင်မည်သို့ဖြေဆိုမည်နည်း
• အချို့သူတို့သည် ခရစ်ယာန်အသင်းတော်မှ အဘယ်ကြောင့်နှင်ထုတ်ခံရသနည်း။
• စစ်မှန်သောနောင်တတွင် အဘယ်အရာပါဝင်သနည်း။
• ကြီးလေးသောအပြစ်ကို အဘယ်ကြောင့်ဝန်ခံသင့်သနည်း။
• ခရစ်ယာန်အကြီးအကဲများသည် နောင်တရသောအမှားပြုသူကို အဘယ်နည်းများဖြင့် အကူအညီပေးကြသနည်း။
[လေ့လာရန်မေးခွန်းများ]
[စာမျက်နှာ ၂၆ ပါ ရုပ်ပုံ]
တမန်တော်ပေါလုသည် နှင်ထုတ်ခြင်းနှင့်ပတ်သက်သည့် ညွှန်ကြားချက်များကို ကောရိန္သုအသင်းတော်ထံ အဘယ်ကြောင့် ပေးပို့ခဲ့သနည်း
[စာမျက်နှာ ၂၉ ပါ ရုပ်ပုံ]
ရှေးခေတ်သိုးထိန်းများကဲ့သို့ပင် ခရစ်ယာန်အကြီးအကဲများသည် ဒဏ်ရာရနေသော ဘုရားသခင်၏သိုးတို့ကို “အဝတ်နှင့်စည်း” ပေးကြ