“उसले परिश्रम गरोस्‌ र आफ्नै हातले असल काम गरोस्‌ ताकि खाँचोमा परेको मानिसलाई दिन ऊसित केही होस्‌।”—एफिसी ४:२८.

सृष्टिकर्ता हामीलाई कामप्रति सकारात्मक दृष्टिकोण राख्न प्रोत्साहन दिनुहुन्छ। किन? परिश्रमी मानिस आनन्दित हुन्छन्‌ किनभने तिनले आफू र आफ्नो परिवारको भौतिक आवश्‍यकता पूरा गर्न सक्छन्‌। तिनी खाँचोमा परेको मानिसलाई समेत मदत दिन सक्ने अवस्थामा हुन सक्छन्‌। तिनलाई काम दिने व्यक्‍तिले पनि तिनको मोल गर्नेछन्‌। त्यसैले असल कामदारले आफ्नो जागिर गुमाउने सम्भावना कम हुन्छ। पवित्र-शास्त्रमा मेहनतको फललाई “परमेश्‍वरको वरदान” भनिएको छ।—उपदेशक ३:१३.

“हामीसित सफा अन्तस्करण छ भनेर हामी विश्‍वस्त छौँ किनकि हामी सबै कुरामा इमानदार भई चल्न चाहन्छौँ।”—हिब्रू १३:१८.

हामी इमानदार छौँ भने आत्म-सम्मान कायम राख्न सक्नेछौँ, मनोशान्ति पाउनेछौँ र राम्ररी निदाउन पनि सक्नेछौँ। यसबाहेक अरूले हामीमाथि भरोसा गर्नेछन्‌ र हाम्रो आदर गर्नेछन्‌। बेइमान मानिसहरूले आफूलाई यस्ता असल कुराहरूबाट वञ्चित गराइरहेका हुन्छन्‌। साथै तिनीहरूलाई आफ्नो अन्तस्करणले घोच्न सक्छ अनि आफ्नो बेइमानी अरूले थाह पाउलान्‌ भन्‍ने डर पनि हुन्छ।

“तिमीहरूको जीवनशैली पैसाको प्रेमबाट मुक्‍त होस्‌, अहिले आफूसित भएका कुराहरूमा सन्तुष्ट होओ।”—हिब्रू १३:५.

हामीलाई खानेकुरा र अन्य आधारभूत आवश्‍यकता-हरूको लागि पैसा चाहिन्छ। तर ‘पैसालाई प्रेम’ गर्नु एकदमै खतरनाक हुन सक्छ। पैसालाई प्रेम गर्ने मानिसले आफ्नो प्रायजसो समय र शक्‍ति अझ धेरै पैसा कमाउनमै लगाउन सक्छ। पैसा कमाउनमै तल्लीन हुने व्यक्‍तिको वैवाहिक सम्बन्धमा नराम्रो असर पर्नुका साथै तिनले आफ्नो छोराछोरीलाई समय पनि दिन सक्दैनन्‌। यसले तिनको स्वास्थ्यमा पनि नराम्रो असर पार्न सक्छ। (१ तिमोथि ६:९, १०) साथै पैसालाई प्रेम गर्ने मानिस बेइमान काम गर्ने प्रलोभनमा पनि पर्न सक्छ। एक बुद्धिमान्‌ मानिसले यसो भने: “वफादार मानिसले प्रशस्त आशिष्‌ पाउँछ तर रातारात धनी बन्‍न खोज्ने मानिस निर्दोष रहिरहन सक्दैन।”—हितोपदेश २८:२०.

“बुद्धि र सोच्ने क्षमता जोगाइराख।”—हितोपदेश ३:२१.

राम्रो शिक्षाले हामीलाई जिम्मेवार वयस्क र असल आमाबुबा बन्‍न मदत गर्छ। तर यस्तो शिक्षाले मात्र हामी सधैँभरि आनन्दित र खुसी हुन सक्दैनौँ। जीवनको हरेक पक्षमा साँच्चै सफल हुन ईश्‍वरले दिनुहुने शिक्षा चाहिन्छ। ईश्‍वरको कुरा सुन्‍ने व्यक्‍तिबारे पवित्र-शास्त्रमा यस्तो भनिएको छ: “उसले जे गर्छ, त्यसमा ऊ सफल हुन्छ।”—भजन १:१-३.