Kɛzi ɛdwenle nwo ɛ?

• Asoo esiane wɔ nu kɛ ɛbalua nwɔlɔra kengavolɛma nee ndenle gyɛne zo wɔanwu kenle bie edwɛkɛ ɔ?

• Sunsum ɛtane nyɛleɛ nwo nwɔra le nwɔhoa debie anzɛɛ esiane wɔ nu?

Edwɛkɛ ɛhye bahilehile deɛmɔti bie mɔ suzu kɛ sunsum ɛtane nyɛleɛ yɛ anyelielɛ yɛɛ deɛmɔti ɔwɔ kɛ yɛnea boɛ la anu.

•  Duzu a maa menli nye die nwo a?

•  Duzu ati a ɔwɔ kɛ ɛnea boɛ a?

•  Mɔɔ ɛbahola wɔayɛ la

•  Mɔɔ ɛ tipɛnema ka la

Menli mɔɔ yɛ anyelielɛ ninyɛne la ta twe adwenle kɔ sunsum ɛtane nyɛleɛ zo wɔ vidio nu, TV zo gyimalilɛ nu, vidio game yɛɛ mbuluku nu. Ɛhye ɛmaa mgbavolɛ nee mbɛlɛra dɔɔnwo anye ɛlie ninyɛne le kɛ nwɔlɔra nu mɔɔ bɛnea bɛka kenle bie edwɛkɛ, mbɔnsam, menli mɔɔ no mogya yɛɛ nyɛnema anwo. Duzu ati ɔ? Mualɛ ne bie ɛne:

• Akpɔsemadiyɛlɛ: Bɛkulo kɛ bɛnwu kɛ saa amgba sunsum ɛleka bie wɔ ɛkɛ a

• Bɛdwenle bɛ kenle bie nwo: Bɛkulo kɛ bɛnwu mɔɔ bazi kenle bie la

• Ngitanwolilɛ: Bɛkulo kɛ bɛ nee bɛ alɔvolɛ mɔɔ bɛwu la di ngitanwo

Adwenle ɛhye mɔ ɛnle ɛtane. Kɛ neazo la, awie biala kulo kɛ ɔnwu mɔɔ bazi kenle bie la yɛɛ yɛ nwo dɔ yɛ alɔvolɛ mɔɔ bɛwu la. Noko esiane bie mɔ wɔ ɛkɛ mɔɔ ɔwɔ kɛ ɛnwu ye a.

Baebolo ne fa kɔkɔbɔlɛ mɔɔ anyebolo wɔ nu la maa wɔ sunsum ɛtane nyɛleɛ nwo. Kɛ neazo la, ɔka kɛ:

“Bɛ nuhua biala mmayɛ sunsum nu debie biala mɔɔ kile kɛ ɔbiza awie anwo edwɛkɛ, anzɛɛ ɔbɔ awie munzule, anzɛɛ ɔye ngonyia, anzɛɛ ɔkye awie mɔ sili, anzɛɛ ɔtendɛ nwomenle nloa azo, anzɛɛ ɔbɔ bayivolɛ ɛbɛla. Awie biala mɔɔ yɛ ninyɛne ɛhye mɔ la bɔ munzule wɔ [Gyihova] anyunlu.”​—Mɛla ne 18:10-​12.

Duzu ati a Baebolo ne tendɛ tia sunsum ɛtane nyɛleɛ ɛ?

• Sunsum ɛtane nyɛleɛ maa yɛgyinla mbɔnsam ne mɔ anzi. Baebolo ne kilehile kɛ, anwumabɔvolɛma bie mɔ dele Nyamenle anwo atua na bɛrayɛle ye agbɔvolɛ. (Mɔlebɛbo 6:2; Dwuudu 6) Anwumabɔvolɛ atisesebɛ ɛhye mɔ dua abisahɔlɛ, menli mɔɔ ka kenle bie edwɛkɛ, menli mɔɔ bɔ awie mɔ munzule yɛɛ nwɔlɔra kengavolɛma anwo zo bɛlɛbɛla awie mɔ. Saa yɛyɛ ninyɛne ɛhye mɔ bie a, ɛnee ɔkile kɛ yɛgyi Nyamenle agbɔvolɛ ne mɔ anzi.

• Sunsum ɛtane nyɛleɛ si adwenle mɔɔ menli lɛ kɛ alesama bie mɔ kola ka kenle bie edwɛkɛ la adua. Noko, Nyamenle ala a bahola aha kɛ: “Medame a mɔlebɛbo ne menganle awieleɛ edwɛkɛ ne na mɔmoane menganle mɔɔ basisi la anwo bie” a.​—Ayezaya 46:10; Gyemise 4:13, 14.

• Sunsum ɛtane nyɛleɛ si diedi mɔɔ menli lɛ kɛ mowuamra kola nee anyewɔzoamra tendɛ la adua. Noko Baebolo ne ka kɛ: “Mowuamra ɛnze ɛhwee. . . Gyima anzɛɛ ndwenlenwo anzɛɛ adwenle anzɛɛ nrɛlɛbɛ biala ɛnle Ɛbolɔ mɔɔ ɛlɛkɔ la.”​—Nolobɔvo ne 9:5, 10.

Ɔlua ndelebɛbo ɛhye mɔ ati, Gyihova Alasevolɛ twe bɛ nwo fi sunsum ɛtane nyɛleɛ biala anwo. Eza bɛkpo anyelielɛ ninyɛne mɔɔ ninyɛne le kɛ zombie, menli mɔɔ bɛno mogya anzɛɛ bɛyɛ ninyɛne mɔɔ sonla ɛngola ye yɛ wɔ nu la. Bɛlɛra bie mɔɔ bɛfɛlɛ ye Maria la hanle kɛ; “Saa sunsum ɛtane nyɛleɛ wɔ nu a, ɛnee ɔnle kɛ menea.” *

• Fa yɛ wɔ bodane kɛ ‘ɛbanyia adwenle mɔɔ anu te la’ wɔ Gyihova anyunlu ɔlua anyelielɛ ninyɛne anzɛɛ amaamuo biala mɔɔ sunsum ɛtane nyɛleɛ wɔ nu mɔɔ ɛbahwe ɛ nwo wɔavi nwo la azo.​—Gyima ne 24:16.

• Ye sunsum ɛtane debie biala mɔɔ ɛlɛ la fi ɛ nwo. Kenga Gyima ne 19:19, 20 na yɛ neazo kpalɛ mɔɔ alimoa Kilisienema yɛle wɔ ɛhye anwo la nzonlɛ.

Kakye ɛhye: Saa ɛkpo anyelielɛ ninyɛne mɔɔ sunsum ɛtane nyɛleɛ wɔ nu la a, ɛnee ɛlɛgyinla Gyihova anzi. Ɛhye maa ye ahonle di fɛlɛko!​—Mrɛlɛbulɛ 27:11.