Oui ! Lo « Bondié, k’i soulaj sak la pèrd kouraj » la done anou la Bib (2 Korintien 7:6). Mèm si la Bib lé pa in liv k’i trèt bann problèm mantal, li la èd in bonpé domoun niabou bann zidé suisid. Son bann konsèy util i pé èd aou osi.

•  Kèl konsèy éfikas la Bib i done ?

•  Èské dan la Bib néna bann domoun té vé pu viv ?

•  Kèl vèrsé la Bib i pé èd aou sobat kont bann zidé suisid ?

•  Kosa i fo fé si in kamarad i di aou ké li vé mor ?

•  É si ma la fine ésèy suisid amoin ?

• ● Di sak ou rosan.

   Sak la Bib i di : « In vré kamarad i fé mont son lamour toultan, é sé in frèr ké lé né pou bann jour difisil » (Provèrb 17:17).

   Kosa i vé dir : Nou la bézoin ké lé zot i soutien anou, kan nou néna bann zidé i tourmant anou.

   Si ou gard out bann santiman pou ou mèm, sa i pé ni in fardo tro lour pou ou porté. Mé si ou rouv out kèr èk in moun, sra pli fasil pou suporté, é pétèt out fason pansé sra diféran.

   Ésèy sa : Jordi mèm, alé koz èk in moun, pétèt in moun out famiy, oubien in kamarad ké ou fé konfians a. Ou pé ékri osi sak ou rosan dan out kèr.

• ● Alé oir in doktèr.

   Sak la Bib i di : « Lé pa domoun lé an form ké la bézoin doktèr, mé bann malad » (Matié 9:12).

   Kosa i vé dir : Kan nou lé malad nou doi alé oir in doktèr.

   Bann zidé suisid i pé èt lo sign in maladi la tèt oubien in maladi i chanboul bann santiman. Si lé komsa, mèt la ont dé koté, parské sa lé kom ninport kèl maladi. I pé trouv trètman pou bann maladi mantal oubien in maladi i chanboul bann santiman.

   Ésèy sa : Alé oir in doktèr san tardé.

• ● Oubli pa ké Bondié i sousi ali dé ou.

   Sak la Bib i di : « Èské lé pa vré, i vand 5 moino pou 2 piès larjan ké na poin tro la valèr ? Antouka an parmi banna na poin inn ké Bondié i mèt dé koté. [...] Pa bézoin zot la pèr ; zot na plis la valèr ké in bonpé moino » (Luk 12:6, 7).

   Kosa i vé dir : Ou néna in bonpé la valèr pou Bondié.

   Pétèt ou san aou tousèl, mé Bondié i oi out soufrans. Li fé in kont èk ou, mèm si ou la pèrd lo gou pou viv. Ala kosa Psom 51:17 i di « In kèr k’i souf é ké lé déchiré, a Bondié, ou sar pa rojèt ali ». Bondié i vé ké ou viv, parské li èm aou.

   Ésèy sa : Trouv bann prèv dan la Bib ké Bondié i èm aou. I trouv détroi dann chapit 24 lo liv létud la Bib Approchez-​vous de Jéhovah.

• ● Koz èk Bondié dan la priyèr.

   Sak la Bib i di : ‘Rojèt tout zot traka su Bondié, parské li sousi ali in bonpé pou zot’ (1 Pièr 5:7).

   Kosa i vé dir : Bondié i invit aou pou rouv out kèr pou di ali sak lé tro lour pou ou porté.

   Bondié i pé done aou la trankilité dan out fondkèr, é osi la fors pou alé dovan (Filipien 4:6, 7, 13). Sé komsa ké li soutien sak i kri ali (Psom 55:22).

   Ésèy sa : Pri Bondié jordi mèm. Kri ali par son non, Jéova, é di ali sak ou rosan dann fon out kèr (Psom 83:18). Domand ali èd aou pou tienbo ansanm.

• ● Réfléchi su lèspoir ké la Bib i done pou lavnir.

   Sak la Bib i di : « Nou néna lèspérans la, kom lank in bato pou nout vi, ké lé sur é solid an mèm tan » (Ébré 6:19, dapré lo ti not).

   Kosa i vé dir : Out bann santiman i pé monté désand, kom in bato k’lé sakouyé par bann vag la mèr dann siklone. Mé lèspoir la Bib i done, i pé èd aou apèz out bann santiman.

   Lèspoir la, lé pa rienk in rèv : li lé bazé su lo promès Bondié i done, pou fé disparèt tout bann zafèr i fé souf anou (Révélasion 21:4).

   Ésèy sa : Aprann ankor plis su lèspoir la Bib i done, é pousa, lir lo loson 5 dan lo ti liv Bondieu néna bann gayar nouvèl pou nou !.

• ● Fé in zafèr ké ou èm.

   Sak la Bib i di : « In kèr ké lé kontan lé in bon tizane » (Provèrb 17:22).

   Kosa i vé dir : Kan nou fé in zafèr k’i rand anou éré, sa i pé èd anou pou san anou mié dan nout tèt é aoir bann méyèr santiman.

   Ésèy sa : Fé bann zafèr ké dabitud i fé aou plézir. Par égzanp, ékout la muzik k’i mèt lanbians, lir in zafèr ké lé ankourajan oubien fé in laktivité ké ou èm pou okip out tan. Ou sra ankor plis kontan si ou èd lé zot, mèm si sé bann ti zafèr (Akt 20:35).

• ● Pran soin out kor.

   Sak la Bib i di : « Fé légzèrsis fizik lé util » (1 Timoté 4:8).

   Kosa i vé dir : Nou san anou bien kan nou fé souvan in laktivité fizik, kan nou dor bien é kan nou manj sak lé bon pou nout santé.

   Ésèy sa : Fé la march rapid, mèm si lé jus pou 15 minit.

• ● Oubli pa ké sak ou viv é out bann santiman i pé chanjé.

   Sak la Bib i di : « Zot i koné pa koman zot vi i sra domin » (Jak 4:14).

   Kosa i vé dir : In problèm k’i fatig nout tèt, mèm in problèm ké nou pans ké nou va pa trouv lo bout, i pé èt jus pou in instan.

   Mèm si sak ou viv jordi i done lèr ké na poin lèspoir, sa i pé chanjé domin. Alor, ésèy fé avèk lo mié k’ou pé (2 Korintien 4:8). Si ou suisid aou, ou poura pu artourn dèrièr, alor ké somanké out bann problèm lé pou in pé d’tan.

   Ésèy sa : Lir dan la Bib zistoir domoun, tèlman zot lavé pu okin lèspoir, zot té i vé mor. Ou va oir ké zot vi lé vnu pliméyèr, souvandéfoi, in fason zot té atand pa. Ala détroi légzanp.

 Oui. La Bib i parl désèrtin moun ké la vréman di : « Mi vé mor. » Bondié la pa roproch azot pousa, mé li la of son lèd. Li pé fé parèy pou ou.

Éli

•  ● Kisa li lété ? Éli té fé konèt domoun bann mésaj Bondié, é li lavé kouraj. Mé défoi, li osi li té dékourajé. « Éli lété in bonom ké lavé bann santiman parèy lé not », dapré Jak 5:17.

•  ● Akoz li té vé mor ? In lépok dan son vi, Éli lavé pèr, li té san ali tousèl é li té pans li té vo pa rien. Alor, li la supli Jéova : « Fé mor amoin » (1 Roi 19:4).

•  ● Kosa la èd ali ? Éli la di Bondié tout sak li lavé su lo kèr. Koman Bondié la done ali kouraj ? Bondié la pran soin d’li, é la fé oir ali son puisans. Li la rasur Éli, é pousa, la di èk li, ké lavé ankor bézoin d’li, é la anvoy in moun kapab é janti pou èd ali.

•  ▸ Lir sak la ariv Éli : 1 Roi 19:2-18.

Job

•  ● Kisa li lété ? Job lété in bonom lavé in ta larjan, li lavé in gran famiy. Li lavé in ladorasion fidèl pou lo vré Bondié.

•  ● Akoz li té vé mor ? In kou mèm, la vi Job la pran in mové tournan. Li la pèrd tout sak li navé. Tout son bann zanfan lé mor akoz in gro kou d’van ké la abat su zot . Li la trap in maladi térib. É pou fini, son bann soidizan kamarad lavé lo kèr dur, zot la akuz ali, kan zot la di sé son fot si li lé dann malizé. Li la di : « Mi détès mon vi ; ma la pu lo gou pou viv » (Job 7:16).

•  ● Kosa la èd ali ? Job la pri Bondié é li la dévid son kèr avèk dot moun (Job 10:1-3). Éliou, in dalon ké té konpran ali, la ankouraj Job, é la èd ali oir in not fason sak li viv. An plis ké sa, Job la aksèp èk gran kèr bann konsèy é lèd ké Bondié la aport ali.

•  ▸ Lir sak la ariv Job : Job 1:1-3, 13-22 ; 2:7 ; 3:1-13 ; 36:1-7 ; 38:1-3 ; 42:1, 2, 10-13.

Moiz

•  ● Kisa li lété ? Moiz té fé parti bann chèf lo pèp Israèl é li té in profèt fidèl.

•  ● Akoz li té vé mor ? Moiz lavé bann gran rèsponsabilité, domoun té kritik ali toultan é li té san ali fatigé. Sé sa mèm la pous ali pou di Bondié : « Siouplé, tué amoin toutsuit la » (Nonm 11:11, 15).

•  ● Kosa la èd ali ? Moiz la di Bondié sak li té rosan. Bondié la diminué son kantité travay é sa la fé ké li té moin strésé.

•  ▸ Lir sak la ariv Moiz : Nonm 11:4-6, 10-17.