මිනිසුන්ව නිර්මාණය කරපු දවසේ ඉඳන්ම අපේ නිර්මාතෘ මිනිසුන්ට කියන්න ඕන දේවල් දේවදූතයන් සහ ඔහුගේ අනාගතවක්තෘවරුන් මාර්ගයෙන් දැනුම් දුන්නා. ඒ වගේම ඔහුගේ පණිවිඩය ගැනත් මිනිසුන්ට ලබා දෙන්න යන ආශීර්වාද ගැනත් ඔහු ලියවිල්ලක සටහන් කරන්නත් සැලැස්සුවා. දෙවියන් පොරොන්දු වෙලා තියෙනවා අපිට සතුටින් පිරුණු අනාගතයක් දෙනවා කියලා. ඒ පොරොන්දු ගැන දැනගන්න පුළුවන් කොහෙන්ද?

දෙවියන්ගේ පණිවිඩය ගැන සඳහන් වෙන්නේ ශුද්ධ ලියවිල්ලේ. (2 තිමෝති 3:16) දෙවියන් තමන්ගේ අනාගතවක්තෘවරුන් මාර්ගයෙන් ඒ දේවල් ලියන්න සැලැස්සුවේ කොහොමද? මුලින්ම දෙවියන් තමන්ගේ අදහස් එයාලට දැනුම් දුන්නා. ඊටපස්සේ එයාලා ඒ දේවල් ලිව්වා. (2 පේතෘස් 1:21) ඒක තේරුම්ගන්න මෙහෙම හිතන්න. ව්‍යාපාරිකයෙක් ලියුමක් ලියන්න තමන්ගේ ලේකම්ව පාවිච්චි කරනවා. ඒ දේවල් ලියන්නේ ලේකම් වුණත් ඇත්තටම ඒ ලියුමේ තියෙන්නේ ව්‍යාපාරිකයාගේ අදහස්. ඒ වගේ තමයි දෙවියන් ශුද්ධ ලියවිල්ල ලියන්න මිනිසුන්ව පාවිච්චි කළත් ඔහු තමයි ඒකේ කර්තෘ. මොකද ඒකේ තියෙන්නේ දෙවියන්ගේ අදහස්.

හැම කෙනෙක්ම දෙවියන්ගේ පණිවිඩය කියවලා ඒක තේරුම්ගන්න එක හුඟක් වැදගත්. ඒ නිසා තමයි ශුද්ධ ලියවිල්ලේ තියෙන සදාකාල ශුභාරංචිය ගැන ‘සියලු ජාතීන්ටත් ගෝත්‍රවලටත් සියලු භාෂා’ කතා කරන අයටත් දැනගන්න දෙවියන් අවස්ථාව දීලා තියෙන්නේ. (එළිදරව් 14:6) දෙවියන්ගේ වචනය සම්පූර්ණයෙන්ම හරි කොටස් වශයෙන් හරි භාෂා 3,000කට වැඩි ගණනකට පරිවර්තනය කරලා තියෙනවා. වෙන කිසිම පොතක් ඒ තරම් භාෂා ගණනකට පරිවර්තනය කරලා නැහැ.