Quwa saˈino yaaddo manninatekkinna surrekki gawajjitara dandiitanno. Isinni togoo yaaddo, yaachishanni noohe qarrinni roorino qarra nafa abbitara dandiitanno.

•  Busha odoo macciishsha, laˈˈa, woy nabbawa batissooti. Alamete aana ikkanni noo qarri daafira mitto mittonka coye afa dihasiissannohe. Dadillissanno odoo batisse laˈˈattoha, macciishshattoha woy nabbawattoha ikkiro, roore waajjattonna hexxo mudhatto gede assitannohe.

   Qullaawu Maxaafi biddishsha: “Dadillaamu wodani . . . mannimma maniissanno.”—Lawishsha 17:22.

   “Haaro odoonna biso shorodhi assannore interneetete widoonni laˈˈa araado ikkitankera dandiitanno; kayi kuni busha rosichooti. Odoo batise laˈˈa agurummota, yaachishannoeri ajino.”—Jooni.

   Heda hasiissanno xaˈmo: Haarote fultanno odoo baalanta laˈˈa hasiissannohe?

•  Mittu gari pirogiraame heedhohe. Barru baala goxoottowiinni kaˈˈattota, sagale itattota, qaete mitore assiˈrattotanna goxatto saate mittu garita assiˈrate sharrami. Baalankare pirogiraametenni assiˈrattoha ikkiro, roore wodanaaˈmatto; hattono yaachishannoheri ajanno.

   Qullaawu Maxaafi biddishsha: “Jawaatu manchi hedo jirotenni xaadissanno.”—Lawishsha 21:5.

   “Koroonu fayya ubbu taaera, asseemmore baalankare facci asse agure roore yanna boohaaranni sayiseemmo. Yannaˈya roore hayyotenni horoonsiˈra hasiˈroommo daafira, barru barrunku looseemmo loosira pirogiraame fushshiˈroommo.”—Joosefi.

   Heda hasiissanno xaˈmo: Barru barrunku dancha coye assite hagiidhatto gede kaaˈlitanno pirogiraame noohe?

•  Dancha danchare hedi. ‘Hatto assoommoro’ yitanni saino coyira quwa saˈe gaabbanna albillitte ikkara dandaannoha busha coye illachisha roore yaadatto gedella assitannohe. Hatteentenni, galatatto gede assannoheha lame woy sase coye hedate woˈnaali.

   Qullaawu Maxaafi biddishsha: “Galatu mannano ikke.”—Qolasiyaasi Sokka 3:15.

   “Qullaawa Maxaafa nabbawa, bushare macciishsheemmakki gedenna dancha danchare hedeemma gede kaaˈlitinoe. Tini shiimare labburono, lowore kaaˈlitanno!”—Liisa.

   Heda hasiissanno xaˈmo: Roore woyite heeshshokki giddo ikkannoha dancha coye agurte busha busha calla hedatto?

•  Wolootu daafira hedi. Yaaddo batidhannohe woyite mannunniwa gambo giwa rakkahera dandiitanno; kayi hatteentenni qarrantinore kaaˈla dandaatto gara hedi.

   Qullaawu Maxaafi biddishsha: “Mittu mittunku woleho woyyannore hedo ikkinnina, umisira woyyannore calla laoonke.”—Filiphisiyusi Sokka 2:4.

   “Woloota kaaˈlannore assa hagiidheemma gede assitannoe. Hatto asseemma woyite insano hagiidhanno, anerano yaachishannoeri ajanno. Isinni woloota kaaˈlate diinaggaaweemma woyite, yaadeemma yanna nafa diheedhannoe.”—Maariya.

   Heda hasiissanno xaˈmo: Afootto manni giddo baxxitino kaaˈlo hasiissannori ayeooti? Ati insa kaaˈlate maa assa dandaatto?

•  Fayyimmakki agadhi. Ganyite ispoorte loosi, hattono dancha gede fooliishshiˈri. Kiˈanno sagale sagaˈli. Ordu fayyimma agadhakki dadillaamo ikkattokki gedenna yaaddo gargadhatto gede kaaˈlitannohe.

   Qullaawu Maxaafi biddishsha: ‘Manninate kaajjishiˈrate rosi shiimare kaaˈlanno.’—1 Ximootewoosi 4:8.

   “Aninna qaaqqiˈya hasiˈnummo gede gobba fulle ispoorte loosa didandiineemmo; hakko daafira ispoorte ganyine mine loonseemmo. Tini roore hagiirraamma ikkineemmo gedenna mimmitoho roore shaqqaddanna cincineemmore ikkineemmo gede kaaˈlitinonke.”—Kateriini.

   Heda hasiissanno xaˈmo: Fayyimmakki agadhate, itatto sagalenna ispoorte loosatto gara roore woyyeessiˈra hasiissannohekka?

 Batinyu manni yaaddo gargadhate tenne amaale harunsano agurranna, Qullaawu Maxaafi kulanno hexxo daafira rosansano kaaˈlitinonsa. “Maganu Mangiste Maa Assitanno?” yaanno birxicho nabbawi.