UA FESILI MAI TALAVOU
O ā Mea e Tatau Ona Ou Iloa e Faatatau i le Faia o Text?
:-) O le lafoina o text o se auala lelei e fesootaʻi ai ma au uō, pe afai e faaaogā lelei.
:-( Ae pe a sesē ona faaaogā, e mafai ona faaleagaina ai faigāuō po o lou talaaga foʻi.
O le a faailoa mai i lenei mataupu mea e tatau ona e iloa e faatatau i
O loo iai foʻi i lenei mataupu:
Tagata e te text i ai
O le toʻatele o talavou e manatu i le faia o feʻau tusitusia po o text, o se auala tāua e fesootaʻi ai. O le text, e mafai ai ona e fesootaʻi i so o se tasi po o tagata uma o loo iai a latou numera i lau telefoni, seʻi vaganā i latou e lē faatagaina e ou mātua.
“E lē fiafia loʻu tamā e ma te talanoa ma loʻu uso i ni tama. Afai e ma te faia faapea, e tatau ona ma talanoa i le tama e faaaogā ai le telefoni fale o loo i le potu mālōlō, ma pe afai o loo iai foʻi ma isi i inā.”—Lenore.
Mea e tatau ona e iloa: Pe afai e te taʻuina lau numera i so o se tagata, o le a e feagai la ma ni faafitauli.
“Afai e te lē faaeteete po o ai e iloaina lau numera, e mafai la ona lafo atu e isi iā oe ni feʻau tusitusia, po o ni ata e te lē manaʻo i ai.”—Scott.
“Pe afai e masani ona e text atu i se tasi o le isi itupā, e vave lava ona e māfana atu i lenā tagata.”—Steven.
Manatu o le Tusi Paia: “O lē ua iai le utaga mamao e na te iloa atu le mala ma lafi ai.
” (Faataoto 22:3) O le faia o ni gaoioiga faautauta, e mafai ona ʻalofia ai le tele o faafitauli.
Tala moni: “E iai se tama na ma masani, ma e tele ina ma text. Na ou manatu iā te ia o saʻu uō lelei ma e na o le pau lenā. Ou te leʻi manatu o loo iai se faafitauli, seʻia oo ina faailoa mai e iai ona faalogona alofa mo aʻu. Pe a toe tepa i tua, ua ou iloa ai sa lē tatau ona ou faaalu le tele o le taimi faatasi ma ia ma text i ai.
”—Melinda.
Mātau: O le ā sou manatu, o le ā se aafiaga o le faauōga a Melinda ma lenei tama, ona o lea ua ia iloa faalogona moni o le tama?
Toe tepa i tua! O le ā se isi auala na ono taulima ai e Melinda le tulaga o mea, ina ia tumau ai pea le la faauōga e aunoa ma le iai o se faiā fetosinaaʻi?
Faamatalaga e lafo atu i au text
E faigofie le lafo atu po o le mauaina o se text. Ae e iai taimi e sesē ai le auala e manatu ai tagata i a tatou text.
Mea e tatau ona e iloa: O faamatalaga e lafo atu i text po o feʻau tusitusia, e mafai ona ese le auala e faauiga ai e isi.
“Pe a faitau se text, e te lē iloa po o ā faalogona ma le ituaiga o leo o loo aumai ai le feʻau, e tusa lava po o loo faaaogā mai i le text ni faailoga e iloa ai faalogona o le tagata. E ono tulaʻi mai ai ni feeseeseaʻiga.”—Briana.
“E iai isi teineiti ou te iloa, ua taʻuleagaina o latou talaaga ma manatu i ai o ni ē e faatafai, ona o a latou text na lafo atu i isi tama.”—Laura.
Manatu o le Tusi Paia: “O tagata lelei e mafaufau muamua a o leʻi tali atu.
” (Faataoto 15:28, Good News Translation) O le ā le lesona? Ia faitau muamua lau text a o leʻi lafoina atu.
Le taimi e text ai
O le faaaogā o le mafaufau lelei, e te faaalia ai le magafagafa po o ā taimi talafeagai e te lafoina ai ni text.
Mea e tatau ona e iloa: Pe afai e te lē magafagafa i le taimi e fai ai au text, atonu o le a manatu tagata e te lē faaaloalo ma e lē toe fia uō ai iā te oe.
“E faigofie ona lē magafagafa i taimi e faia ai text. O nisi taimi ou te text ai i se isi a o talanoa faafesagaʻi ma saʻu uō, pe o loo aai faatasi foʻi lo matou aiga.”—Allison.
“E mataʻutia le text a o aveina le taavale. O le taimi ā e te tepa ese ai ma le auala, e mafai ona e oo atu ai i se faalavelave faafuaseʻi.”—Anne.
Manatu o le Tusi Paia: “E iai le taimi e atofaina mo mea uma . . . o le taimi e filemu ai ma le taimi e tautala ai.
” (Failauga 3:1, 7) E pei ona aogā lenei taʻiala i taimi e tautala ai, e aogā foʻi i taimi e faia ai ni a tatou text.
Fesoasoani
Tagata e te text i ai
;-) Usitaʻi i fautuaga a ou mātua.—Kolose 3:20.
;-) Ia filifili lelei tagata e taʻu i ai lau numera. Pe a e teena ma le faaaloalo le taʻu atu i isi o faamatalaga e fitoitonu iā te oe lava, e aofia ai lau numera, o le a e atiaʻe ai se tomai e fesoasoani iā te oe pe a avea ma tagata matua.
;-) Aua le lafoina atu ni text e iai ni faamatalaga e atagia atu ai uiga faatafai, i se tasi e te lē o fia uō i ai. Pe a amata ona iai ni faalogona alofa o le tasi mo le isi, e mafai ona iʻu ai i ni tulaga e mafatia ai.
“Na ou atiaʻe se faiā lelei ma oʻu mātua e tusa ai ma le faaaogāina o laʻu telefoni, o lea na la faatuatuaina ai aʻu i le faia o filifiliga atamai e faatatau i tagata e tuu latou numera i laʻu telefoni.”—Briana.
Faamatalaga e lafo atu i au text
;-) A o leʻi lafoina atu lau feʻau tusitusia, fesili ifo, ‘Po o le text le auala sili e fesootaʻi ai, e tusa ai o se tulaga o loo tulaʻi mai?’ Atonu e sili ona lelei le vili atu pe talanoa faafesagaʻi ma le tagata.
;-) Aua e te lafoina atu so o se faamatalaga e lē mafai ona e fai atu i se tagata, pe a lua talanoa faafesagaʻi. Ua faapea mai Sarah, e 23 ona tausaga: “
Afai o se faamatalaga e lē mafai ona e fai atu saʻo i se tagata, e lē tatau foʻi la ona e lafoina atu i se text.
”.
“Pe a lafo atu e se tasi ni ata matagā, taʻu i ou mātua. O le a avea o se puipuiga, ma faatuatuaina ai pea oe e ou mātua.”—Sirvan.
Le taimi e text ai
;-) Filifili lelei taimi e faaaogā ai lau telefoni. Ua faapea mai se tamaʻitaʻi e igoa iā Olivia: “
Ou te lē alu ma laʻu telefoni i le taimi o le meaʻai a lo matou aiga, pe a o fai ni aʻu suʻesuʻega po o meaaʻoga
”. “E tapē foʻi a o fai le sauniga, ina neʻi faaosoosoina aʻu e siaki.
”;-) Ia manatu mamafa. (Filipi 2:4) Aua le text a o talanoa faafesagaʻi ma le isi tagata.
“Na ou faia ni tulafono e pei o le aua le text a o iai faatasi ma aʻu uō, sei vaganā e iai se māfuaaga tatau. Ou te lē taʻuina foʻi laʻu numera i ē ou te lē masani lelei ai.”—Janelly.