Zvaungaita Kuti Uve Munhu Anogutsikana
Tingava tiri vakuru kana kuti vadiki, tese tinoda kufara uye kuva vanhu vanogutsikana. Ndizvo zvinodiwawo neMusiki wedu kuti tiite. Saka akatipawo mazano anonyatsoshanda.
Shanda Nesimba
“Ngaashande nesimba, achiita basa rakanaka nemaoko ake, kuti ave nechekupawo anoshayiwa.”—VAEFESO 4:28.
Musiki wedu anotikurudzira kuti tive vanhu vanofarira kushanda. Nemhaka yei? Munhu anoshanda nesimba anofara nekuti anokwanisa kuriritira mhuri yake. Anogonawo kutobatsira mumwe munhu anenge achitambura. Anofarirwawo nemunhu waanoshandira. Saka kashoma kuti munhu anoshanda nesimba adzingwe basa. Magwaro anoti zvinhu zvakanaka zvinobva pakushanda nesimba kunoita munhu, “chipo chaMwari.”—Muparidzi 3:13.
Iva Munhu Akatendeseka
“Tinovimba kuti tine hana yakatendeseka, sezvo tichida kuva akatendeseka pazvinhu zvese zvatinoita.”—VAHEBHERU 13:18.
Kana tiri vanhu vakatendeseka tinova nechiremerera, tinova nepfungwa dzakagadzikana, uye tinorara hope dzakanaka. Uyewo vamwe vachavimba nesu uye vachatiremekedza. Vanhu vasina kutendeseka havawani zvinhu zvese izvi, uyewo hana yavo inogona kugara ichivanetsa vachityira kuti zvinhu zvavari kuita zvinogona kuzobuda pachena.
Usanyanya Kukoshesa Mari
“Mararamiro enyu ngaarege kuva ekuda mari, uye gutsikanai nezvinenge zviripo.”—VAHEBHERU 13:5.
Mari tinoida kuti titenge zvekudya nezvimwewo zvinhu zvinokosha. Asi “kuda mari” kunogona kutikanganisa. Kunoita kuti munhu ashandise nguva yake yakawanda nesimba rake achitsvaga imwe mari. Kuda mari zvakadai kunogona kukanganisa wanano yake, kumushayisa nguva yekuva nevana vake, uye kunyange kukanganisa utano hwake. (1 Timoti 6:9, 10) Uyewo munhu anoda mari anogona kupedzisira ava kuita zvinhu zvechitsotsi. Mumwe munyori akati: “Munhu akatendeka achawana makomborero akawanda, asi uya anomhanyirira kuda kupfuma haazorambi asina mhosva.”—Zvirevo 28:20.
Sarudza Dzidzo Inonyatsobatsira
“Chengetedza uchenjeri hunobatsira uye gara uchishandisa pfungwa.”—ZVIREVO 3:21.
Dzidzo yakanaka inotibatsira kuti tikure tiri vanhu vanovimbwa navo uye tova vabereki vakanaka. Asi dzidzo yatinowana kuchikoro haisiriyo inoita kuti munhu anyatsofara muupenyu. Kuti tinyatsobudirira pane zvese zvatinoita muupenyu, tinoda dzidzo yatinopiwa naMwari. Magwaro anotaura nezvemunhu anoteerera Mwari achiti: “Zvese zvaanoita zvichabudirira.”—Pisarema 1:1-3.
Zvimwe Zvaunogona Kufarira
NHARIREYOMURINDI
Zvaungaita Kuti Ufarire Kushanda Nesimba
Cherechedza mamwe mazano ari muBhaibheri anogona kukubatsira kuti ugutsikane nebasa rako uye urifarire.
MUKAI!
Zvekuita Zviri Kukuwandira Here?
Vanhu vakawanda vanoomerwa nekuita zvese zvinodiwa kumba nekubasa. Chii chiri kuita kuti zvidaro? Zvingagadziriswa sei?
MUKAI!
Nzira Yekuwana Mufaro—Kugutsikana Uye Kuva Nerupo
Vakawanda vanoti mufaro unobva pakuva nepfuma. Asi ichokwadi here kuti pfuma ndiyo inoita kuti munhu afare? Ongororo dzakaitwa dzinoratidzei?
