Geeshsha Maxaafay, “Iitati biittaa haariyo wode asai oolees” yaagees.—Leemiso 29:2.

Huqqunnidi haariyaageeti asaa bolli daro tuggay gakkanaadan oottidoogaa taarikiyaappe akeekoos. Haariya ubbati hegaa mala gidennaagee qoncce. Issoti issoti asau loˈˈobaa qoppana danddayoosona. SHin, haariyo maataa demmi simmidi, maatau keesettiyoogan eti qoppidobay polettennan attiyoogaa darotoo akeekoosona. Woy eti bantta maataa banttau goˈˈaa demmanau woy asa qohanau bessenna ogiyan goˈettana danddayoosona. Kase Amarkkaa Suntta gididi oottida, Henri Kisinggeri, “Taarikee hada daafuraa, qassi qoppidi polibeennabaa qonccissees” yaagiis.

Geeshsha Maxaafaykka, “ba hemetaa suurissanaagee aawu shene gidennaagaa” yootees. (Ermmaasa 10:23) Nagarancha gidida asaa naatussi bantta hanotaa giigissanau, koshshiya aadhida eratettaynne akeekay baawa. Asay ba hemetaa suurissanau danddayennaba gidikko, haariyo asaagaa waati suurissana danddayii? Haariyaageeti tuggaa xayssana danddayennay aybissakko akeekadii? Iita aysoy woy haaroy darotoo tuggau gaaso gidiyoogee qoncce!

Yesuusi, “Intte issoi issuwaara siiqettikko, ta erissiyo ashkkarata gidiyoogaa asai ubbai erana” yaagiis.—Yohaannisa 13:35.

Ubba haymaanootiyaa asttamaareti siiquwaabaanne issippetettaabaa sabbakoosona. SHin eti banttana kaalliyaageeti asa ixxiyoogaa agganaadan oottiya siiquwaa tamaarissibookkona. Haymaanootee, asay issoy issuwaa siiqanaadan maaddiyoogaappe, darotoo shaahettanaadan, ooyettanaadaaninne zariyan ixettanaadan oottees. Haymaanootiyaa eranchaa, Hans Kuni Kiristtiyaaniti end zi Worlid Rilijins giyo ba maxaafaa kuushshan, “Keehi iitanne wolqqaama gidida polotika olati haymaanootee denttettidoogeetanne maayidoogeeta” yaagiis.

 Qassi, ekkennan woy gelennan asho gaytotettaa poliyoogaa, wodiraa laammiyoogaanne attuma asay attuma asaara macca asay macca asaara asho gaytotettaa poliyoogaa daro haymaanootiyaa qeeseti paqqadoosona. Hegee harggiyaa, shahaaraa kesissiyoogaa, koyennan shahaariyoogaa, aqo deˈoy laalettiyoogaanne daro azzanuwaa kaalettiis.

“Asi huuphiyan huuphiyan ba huuphe iita amuwan gooshettiyo wodenne cimettiyo wode paacettees. Hegaappe guyyiyan, amoi shahaaridi, nagaraa yelees.”—Yaaqooba 1:14, 15.

Nuuni ubbay laattido nagaraa gaasuwan balabaa oottanau koyiyo gishshau, “nu asatettainne nu wozanai koyidobaa” oottennaadan baaxetana koshshees. (Efisoona 2:3) Gidikkokka, amottiyoobaa polanau hanotay injjetiyo wode, hegaappe haakkiyoogee keehi metana danddayees. Nuuni iita amuwaa poliyaaba gidikko, hegee keehi azzanttiyaabaa kaalettana danddayees.

Piroz Meta giyo xaafee, “Wolqqaama tuggay gakkiyoy nu iita amuwaa gaasuwaana; nuuni ufayssaa keehi koyiyoogaa, yaaretiyoogaanne gitabaa amottiyoogaa gaasuwaana” yaagidi xaafiis. Ushshay, jallissiya xalee, ceeree, bessenna asho gaytotettay, qassi hegaa mala ubba qommo amoynne amalee, loˈˈo eeshshay deˈiyo daro asati kandduwaaban moorettanaadan oottiis; qassi eta soo asay, laggetinne harati tuggatanaadan oottiis. Nagarancha gidida asaa naatu hanotaa xeelliyaagan, Geeshsha Maxaafay yootiyoobaa maayoos: “Mereta ubbai issippe hanno gakkanaassi, maccaasa leessoi oiqqin ooliyoogaadan, sahuwan ooliyoogaa nuuni eroos.”—Roome 8:22.

Seexaanay ‘ha saˈaa xoossa’ gidiyoogaanne daydantta geetettiya wolqqaama gidida iita ayyaanati a exa gidiyoogaa Geeshsha maxaafay yootees.—2 Qoronttoosa 4:4; Ajjuutaa 12:9.

Seexaanaagaadan daydanttati asaa haariiddinne balettiiddi deˈoosona. Kiitettida PHauloosi hegaa akeekidi, hagaadan giis: “Nuuni saluwaa sohuwan de7⁠iya iita ayyaana wolqqatuura, haariyaageetuura, godatettai de7⁠iyoogeetuuranne ha xuma biittaa haariyaageetuura olettiyoogaappe attin, asaara baaxetokko.”—Efisoona 6:12.

Daydanttati asaa qohiyoogan ufayttiyaaba gidikkokka, eta waanna halchoy hegaa gidenna. Eti Ubbaappe Xoqqiya Xoossaa, Yihoowappe asaa haassana koyoosona. (Mazamure 83:18) Xoolinttiyaa paydiyoogaa, shareechiyoogaanne qaadaa yootiyoogaa malabati daydanttati asaa balettanaunne haaranau goˈettiyo ogetuppe amaridaageeta. Yihooway nuuni hegaa mala iitabaappe haakkanaadan akeekissiyoy, qassi Seexaanaanne daydanttata eqettiya ubbaa iitabaappe naagiyoy hegaassa.—Yaaqooba 4:7.

Naaˈˈu shaˈa gidiya layttappe kase, Geeshsha Maxaafan, “Wurssetta gallassi waissiya wodee yaanaagaa akeeka” geetettidi kaseti odettiis.

He wodee wayssiyaagaa gidanaadan oottidabaa kaallidi hagaadan gees: “Asati banttana siiqiyaageeta, miishshaa siiqiyaageeta, ceeqettiyaageeta, ayyiyaageeta, . . . siiqoi bainnaageeta, sigettennaageeta, zigirssanchchata, banttana naagennaageeta, kehennaageeta, lo77⁠obaa dosennaageeta, kashi erikke giyaageeta, eesotiyaageeta, otoruwan sugettiyaageeta, qassi Xoossaappe aattidi, ufaittiyoobaa dosiyaageeta gidana.” Ha wodiyan beˈiyo tugga ubbau waanna gaasoy nuuni ‘wurssetta gallassan’ deˈiyoogaa.—2 Ximootiyoosa 3:1-4.

Nuuni beˈido qofaappe akeekiyoogaadan, asaa naati loˈˈobaa oottanau koyiyaaba gidikkokka, tuggaa xayssana danddayennay aybissakko qoncce gidennee? Yaatin, maaduwaa auppe demmana danddayiyoo? Dabloosanne a kaalliyaageetu “oosuwaa xaissanau” qaalaa gelida Medhidaagaakko nuuni xeellana koshshees. (1 Yohaannisa 3:8) Kaalliya huuphe yohoy, Xoossay tuggau gaaso gidiya ubbabaa xayssanau ay oottanaakko qonccissees.